រាជធានីភ្នំពេញ ៖ យុវជន៣០ក្រុម និងស្ដ្រី៥០ក្រុម ស្មើនឹងអត្តពលិក៤៤៩នាក់ មកពី៤៩ប្រទេស ជុំវិញពិភពលោក បានមកដល់ក្នុងព្រះរាជាណាចក្រកម្ពុជា ដើម្បីមកចូលរួមប្រជែងណ្ដើមយកជើងឯក នៅក្នុងព្រឹត្តិការណ៍ ការប្រកួតកីឡាប៉េតង់ជើងឯកពិភពលោកយុវជន និងស្ដ្រី លើកទី១៧ ឆ្នាំ២០១៩ ដែលកម្ពុជាទទួលបានសិទ្ធធ្វើជាម្ចាស់ផ្ទះលើកដំបូង នឹងចាប់ផ្ដើមការប្រកួតនៅថ្ងៃទី១៩ និងបញ្ចប់នៅថ្ងៃទី២៣ ខែវិច្ឆិកា ឆ្នាំ២០១៩ខាងមុខ ។
ខណៈមានវិញ្ញាសាប្រកួតផ្នែកយុវជនមាន ២វិញ្ញាសា គឺវិញ្ញាសាវាយយកពិន្ទុ និងវិញ្ញាសាវាយ ៣ទល់៣ ។ រីឯផ្នែកស្ដ្រីមាន ២វិញ្ញាសា គឺវិញ្ញាសាវាយយកពិន្ទុ និងវិញ្ញាសាវាយ ៣ទល់៣ ។ ចំណែកវិញ្ញាសា សមាគមមាន ២វិញ្ញាសា គឺវាយ៣ ទល់៣ ។
ចំណុចមួយដែលរំលេចក្នុងព្រឹត្តិការណ៍នេះ គឺសម្រស់កីឡាការិនីប៉េតង់ម្នាក់ ស្ថិតនៅក្នុងក្រុមជម្រើសជាតិរបស់ប្រទេសអាឡឺម៉ង់ ធ្វើអោយអ្នកជំនាញខាងប្រព័ន្ធផ្សព្វផ្សាយនានានៅក្នុងស្រុក តាមប្រមាញ់រូបនាងច្រើនជាងគេ ។
ជាក់ស្តែងបើតាមរយៈគណនីហ្វេសប៊ុករបស់លោក Sovieth Yorn ក៏ដូចលោក Sovanna Kem ដែរគឺតាមប្រមាញ់រូបនាង កំពុងតែហាត់សមលើទីលាន នៅមជ្ឈមណ្ឌលជាតិហ្វឹកហ្វឺន និងកីឡា ក្នុងកីឡដ្ឋានជាតិ មុនការប្រកួតប៉េតង់ពិភពលោកលើកទី១៧ ចាប់ផ្តើម ទៅទៀត ។
យ៉ាងណាអ្នកសារព័ត៌មានយើងនៅមិនទាន់ស្គាល់អត្តសញ្ញាណ កីឡាការិនីប៉េតង់ រូបស្រស់សោភា ជនជាតិអាឡឺម៉ង់រូបនេះ នៅឡើយទេ ៕
