រាជធានីភ្នំពេញ ៖ ក្រសួងបរិស្ថាន នៃព្រះរាជាណាចក្រកម្ពុជា គ្រោងនឹងបិទការប្រើប្រាស់ទុយោប្លាស្ទីកគ្រប់ប្រភេទទាំងអស់(សម្រាប់បឺត) នៅកម្ពុជា ខណៈដែលផលិតផលប្រភេទនេះ បានបង្កផលប៉ះពាល់យ៉ាងធ្ងន់ធ្ងដល់សុខភាព និងបរិស្ថាន ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានអះអាងកាលពីពេលថ្មីៗនេះ ក្នុងកិច្ចសម្ភាសជាមួយអ្នកសារព័ត៌មាន នៅសន្និសីទសារព័ត៌មានស្ដីពីសូរ្យតន្ត្រី ដើម្បីកិច្ចគាំពារបរិស្ថានសូមនិយាយថាទេ «ចំពោះប្លាស្ទិក» ។
លោក នេត្រ ភក្ត្រា បានបញ្ជាក់យ៉ាងដូច្នេះថា ក្រសួងបរិស្ថាន កំពុងរៀបចំនីតិវិធីច្បាប់មួយចំនួន ដើម្បីឈានទៅបិទការចរាចរណ៍ ផលិតទុយោប្លាស្ទីក និងបិទការប្រើប្រាស់ទុយោនេះទាំងស្រុងតែម្ដង នៅកម្ពុជា ។ ប៉ុន្ដែទោះបីជាយ៉ាងណា លោកមិនទាន់អាចកំណត់ថា នឹងចាប់ផ្ដើមអនុវត្ដនៅពេលណានោះទេ ។
អ្នកនាំពាក្យក្រសួងបរិស្ថាន បានអោយដឹងបន្តថា ការគ្រោងបិទការប្រើប្រាស់ទុយោបឺតប្លាស្ទីក ទាំងស្រុងនៅពេលខាងមុខនេះ បន្ទាប់ពីទុយោប្លាស្ទីក គឺជាផលិតផលមួយ ដែលប្រើប្រាស់តែម្ដង ហើយយើងបោះចោល ដោយបង្កជាហានិភ័យយ៉ាងធ្ងន់ធ្ងរ ដល់មនុស្ស សត្វ បរិស្ថាន ធនធានធម្មជាតិ និងជីវៈចម្រុះជាដើម ។
លោកបន្ថែមថា ការបិទមិនឱ្យប្រើប្រាស់ និងចរាចរណ៍នេះ គឺក្រសួង សម្រេចដាក់អោយប្រើប្រាស់មធ្យោបាយផ្សេងៗជំនួសវិញ ដូចជា ដើមថ្នក់ទឹក បំពង់ឬស្សី និងទុយោក្រដាសជាដើម ដែលជាផលិតផលប្រើប្រាស់តែម្ដងហើយ មិនប៉ះពាល់ដល់សុខភាព និងបរិស្ថាន ធ្ងន់ធ្ងរនោះឡើយ ។
បើយោងតាមរបាយការណ៍ កម្ពុជាក្នុងមួយថ្ងៃៗ សំរាមដែលបានបង្កើនឡើង១ម៉ឺនតោន ហើយក្នុងមួយឆ្នាំៗប្រមាណជិត៤លានតោន ហើយក្នុងបរិមាណសំរាមជិត៤លានតោ មាន២០ភាគរយ ជាសំណល់ប្លាស្ទិក ។ចំណែកនៅរាជធានីភ្នំពេញ សំរាមដែលបង្កើតឡើង មួយថ្ងៃៗ បញរមាណជាង៣ពាន់តោន ។ រីឯនៅខេត្តព្រះសីហនុ មានសំរាមក្នុងមួយថ្ងៃ ជិត១ពាន់តោ និងខេត្តសៀមរាប មានជាង៤០០តោន ក្នុងមួយថ្ងៃៗ ។ ដែលបរិមាណនៃសំណល់ប្លាស្ទិក មាន៧,៣% នៅក្រុងភ្នំពេញ មាន ២០,៧% នៅក្រុងសៀមរាប និងមាន ៣៤%នៅក្រុងព្រះសីហនុ ៕