រាជអានីភ្នំពេញ ៖ ស្ត្រីម្នាក់ទើបនឹងចេញពីធ្វើការពេលយប់ លុះត្រឡប់ទៅដល់មុខផ្ទះ ក៏ទូរស័ព្ទហៅបងប្អូនឱ្យបើកទ្វារឱ្យ ស្រាប់តែលេខមុខជនសង្ស័យ២នាក់ ជិះម៉ូតូមកឈប់ក្បែរ រួចក៏ធ្វើសកម្មភាពវាយនាងចំនួន៥ដៃចំផ្ទៃមុខ បណ្តាលឱ្យបាក់ខ្ទង់ច្រមុះ រងរបួស រួចក៏ប្លន់យកទូរស័ព្ទទំនើបជិះគេចខ្លួនបាត់ស្រមោល ។
ហេតុការណ៍នេះ បានកើតឡើងកាលពីវេលាម៉ោង២និង១០នាទីរំលងអធ្រាត្រ ឈានចូលថ្ងៃទី០៧ វិច្ឆិកា ២០១៩ នៅចំណុចខាងមុខផ្ទះរបស់ស្ត្រីរងគ្រោះ ស្ថិតនៅតាមបណ្តោយផ្លូវ១២២ កែងផ្លូវ២១៥ នៅចំណុចក្បែរនឹងស្តុបដេអិន ស្ថិតក្នុងសង្កាត់ផ្សារដេប៉ូ៣ ខណ្ឌទួលគោក ។
តាមសម្តីស្ត្រីរងគ្រោះឈ្មោះ ឡា លីន អាយុ៣៦ឆ្នាំ បានរៀបរាប់ប្រាប់សមត្ថកិច្ចថា នៅមុនពេលកើតហេតុ គាត់ទើបតែចេញមកពីធ្វើការនៅឯម្តុំដេអិន រួចក៏ដើរមកដល់មុខផ្ទះ នៅវេលាម៉ោងកើតហេតុខាងលើ គាត់ក៏ដកទូរស័ព្ទខល ហៅបងប្អូនដើម្បីអោយបើកទ្វារឲ្យ ស្រាប់តែបន្តិចក្រោយមក ខណៈដែលអ្នកផ្ទះមិនទាន់ចេញមកបើកទ្វារឱ្យផង ក៏លេចមុខជនសង្ស័យចំនួន២នាក់ ជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ មិនចាំស្លាកលេខ បានជិះមកជិតគាត់រួចធ្វើសកម្មភាពវាយប្លន់យកទូរស័ព្ទដៃ ដោយដាល់គាត់ចំនួន៥ដៃចំកណ្តាលមុខ បណ្តាលឱ្យរងរបួសបាក់ខ្ទងច្រមុះ ។
ភ្លាមៗនោះ គាត់បានស្រែកឱ្យគេជួយដែរ ប៉ុន្តែដោយសារនៅម្តុំទីតាំងកើតហេតុខាងលើនោះ មានសភាពស្ងាត់ ទើបជនសង្ស័យធ្វើសកម្មភាពរួច រត់គេចដោយសុវត្ថិភាព ។
ក្រោយកើតហេតុ ជនរងគ្រោះបានត្រឹមតែទៅដាក់ពាក្យបណ្តឹងនៅប៉ុស្តិ៍ផ្សារដេប៉ូទី៣ ដើម្បីឱ្យសមត្ថកិច្ចធ្វើការស្រាវជ្រាវចាប់ខ្លួនជនសង្ស័យយកមកផ្តន្ទាទោសតាមច្បាប់ ៕