ក្រុងកោះរ៉ុង, ខេត្តព្រះសីហនុ ៖ ទីបំផុតទៅ នារីជនជាតិអង់គ្លេសវ័យ ២២ឆ្នាំ ដែលបានបាត់ខ្លូននៅកោះរ៉ុង ខេត្តព្រះសីហនុ អស់រយៈពេល៧ថ្ងៃ ត្រូវបានសមត្ថកិច្ចរកឃើញសពរបស់នាង នារសៀលថ្ងៃទី៣១ ខែតុលា ឆ្នាំ២០១៩នេះ ដោយអណ្ដែតរហូតទៅដល់ខេត្តកោះកុង ជាប់ព្រំដែនទឹកប្រទេសថៃ ដែលមានចម្ងាយប្រមាណជា៨០គីឡូម៉ែត្រ ពីកោះរ៉ុង ។
បើតាមលោកឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលំហរសមុទ្រ បានថ្លែងប្រាប់សារព័ត៌មានអោយដឹងថា សពនារីជនជាតិអង់គ្លេស ត្រូវបានរកឃើញនៅម្ដុំកោះឆ្លាម ក្នុងខេត្តកោះកុង ។ សាកសពកញ្ញា Amelia Bambridge ត្រូវបានគេប្រទះឃើញអណ្តែតលើផ្ទៃសមុទ្រប្រហែល៨០គីឡូម៉ែត្រពីកោះរ៉ុង ដែលជាកន្លែងដែលនាងបានបាត់ខ្លួន ។ ផ្អែកលើអត្តសញ្ញាណដែលផ្តល់ឱ្យយើង រូបសាក់លើដងខ្លួន និងសម្លៀកបំពាក់នាង ដែលគេបានឃើញចុងក្រោយ យើងជឿជាក់ថា គឺជាសាកសពនាងប្រាកដមែន ។ ហើយនៅពេលនេះ កម្លាំងរបស់លោកកំពុងតែនាំសពរបស់នាងមកលើគោក ដើម្បីធ្វើកោសល្យវិច្ច័យបន្ថែមទៀត ។
ដូចគ្នានឹងគណនីហ្វេសប៊ុករបស់ឧកញ៉ាទៀ វិចិត្រ ដែលលោកជាអ្នកស្ម័គ្រចិត្តចូលរួមស្វែងរកដែលនោះ បានបង្ហោះនៅមុននេះ មានខ្លឹមសារថា «រកឃើញហើយ! ទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ សហការជាមួយនឹងក្រុមហ៊ុន ជីធីវីស៊ី ស្ពីតប៊ូត កម្ពុជា បានស្វែងរកស្ដ្រីជនជាតិអង់គ្លេសដែលមានឈ្មោះ Amelia Bambridge អស់រយៈពេល៧ថ្ងៃ មកដល់ថ្ងៃ៣១ ខែតុលា ឆ្នាំ២០១៩នេះ បានជួបប្រទះឃើញសាកសពស្ដ្រីរងគ្រោះអណ្ដែតនៅលើផ្ទៃសមុទ្រនៅចំណុច (ខន ដរ) ក្បែរព្រំដែនសមុទ្រកម្ពុជា-ថៃ N10°47.691–E102°26.645 ។
តាមរយៈខមមិន(Commment)ជាច្រើននាក់ចូលរួមរំលែកទុក្ខដល់គ្រួសារនៃសព នៅក្នុងគណនីហ្វេសប៊ុកលោកឧកញ៉ាទៀ វិចិត្រ ហើយក៏មានខ្លះមានចម្ងល់ថា ហេតុអីសពនារីអង់គ្លេសអណ្តែតបានឆ្ងាយម្ល៉េះ ប្រមាណ៨០គីឡូម៉ែត្រពីកោះរ៉ុង ? ខណៈពេលដែលបាត់ខ្លួនត្រឹម៧ថ្ងៃ (ដោយពួកគេថែមទាំងបញ្ជាក់ចម្ងាយក្នុងរូបភាព ពីផែនទីGoogle Map) ថែមទៀតផង ។
អ្នកនិយមលេងហ្វេសប៊ុកបញ្ចេញមតិថា «៧ថ្ងៃ អណ្តែតរាប់រយគីឡូ ? សង្ស័យគេសម្លាប់ហើយយកទៅបោះចោលឆ្ងាយពីកន្លែងកើតហេតុ» ។ ចំណែកលោក និច ម៉ាច ៖ ខ្ញុំឆ្ងល់តិច ? ថាជនជាតិភាគច្រើនចូលមុជទឹក គឺស្លៀកពាក់ប៊ីគីនី ស្ទើតែ99% ចុះហេតុអី គាត់បែរជាស្លៀកអាវយឺតទៅវិញ ?
យ៉ាងណា ចម្ងល់ទាំងនេះ អ្នកយកព័ត៍មានយើងនៅមិនទាន់ទទួលបានរបាយច្បាស់ការណ៍ណាមួយពីសមត្ថកិច្ចជំនាញ ស្តីពីការស្លាប់របស់ស្ត្រីរងគ្រោះថា បណ្តាលមកពីមូលហេតុអ្វីនៅឡើយទេ ដោយរង់ចាំការធ្វើកោសល្យវិច័យសិន ព្រោះនៅពេលនេះសាកសពនារីរងគ្រោះ ត្រូវបានសមត្ថកិច្ចរៀបចំដឹកជញ្ជូននាំមកកាន់កំពង់ផែក្រុងព្រះសីហនុ ដើម្បីធ្វើការងារបន្តតាមនិតិវិធី ៕
សូមរម្លឹកថា ស្គាល់សាកសពអណ្ដែត ផ្អែកលើស្នាមសាក់ និងសម្លៀកបំពាក់ចុងក្រោយនាង