ក្រុងកោះរ៉ុង, ខេត្តព្រះសីហនុ ៖ នារសៀលថ្ងៃទី៣១ ខែតុលា ឆ្នាំ២០១៩នេះ នារីជនជាតិអង់គ្លេសម្នាក់ ដែលបានបាត់ខ្លូន កាលពី១សប្តាហ៍មុននេះនៅលើកោះរ៉ុង ត្រូវបានសមត្ថកិច្ចរកឃើញសពរបស់នាងហើយ ដោយអណ្ដែតរហូតទៅដល់ខេត្តកោះកុង ជាប់ព្រំដែនទឹកប្រទេសថៃ ដែលមានចម្ងាយប្រមាណជា៨០គីឡូម៉ែត្រ ពីកោះរ៉ុង ។
បើតាមលោកឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលំហរសមុទ្រ បានថ្លែងប្រាប់សារព័ត៌មានអោយដឹងថា សពនារីជនជាតិអង់គ្លេស ត្រូវបានរកឃើញនៅម្ដុំកោះឆ្លាម ក្នុងខេត្តកោះកុង ។
លោកឧត្តមសេនីយ៍ឯក ទៀ សុខា មេបញ្ជាការរងកងទ័ពជើងទឹក និងជាប្រធានផ្នែកល្បាតសមុទ្រ បាននិយាយបន្តថា សាកសពកញ្ញា Amelia Bambridge ត្រូវបានគេប្រទះឃើញអណ្តែតលើផ្ទៃសមុទ្រប្រហែល ៨០ គីឡូម៉ែត្រពីកោះរ៉ុង ដែលជាកន្លែងដែលនាងបានបាត់ខ្លួន ។ ហើយនៅពេលនេះ កម្លាំងរបស់លោកកំពុងតែនាំសពរបស់នាងមកលើគោក ដើម្បីធ្វើកោសល្យវិច្ច័យបន្ថែមទៀត ។
លោកបន្ថែមថា ផ្អែកលើអត្តសញ្ញាណដែលផ្តល់ឱ្យយើង រូបសាក់លើដងខ្លួន និងសម្លៀកបំពាក់នាង ដែលគេបានឃើញចុងក្រោយ យើងជឿជាក់ថា គឺជាសាកសពនាងប្រាកដមែន ។
សូមជម្រាបថា បើតាមរូបភាពនៃសាកសព គឺមានរូបសាក់នៅកំភួនដៃស្តាំ ដូចគ្នានឹងពាក្យសម្តីរបស់ប្អូនស្រីAmelia ឈ្មោះ Georgie Bambridge បានថ្លែងប្រាប់សារព័ត៌មាន BBC ថា បងស្រីរបស់នាង គឺមានស្នាមសាក់រូបសត្វគោ នៅកំភួនដៃ និងមានស្នាមសាក់រូបសត្វឆ្មា នៅលើជើង ។
ទោះជាយ៉ាងណា នៅពេលនេះសាកសពនារីរងគ្រោះ ត្រូវបានសមត្ថកិច្ចរៀបចំដឹកជញ្ជូននាំមកកាន់កំពង់ផែក្រុងព្រះសីហនុ ដើម្បីធ្វើការងារបន្តតាមនិតិវិធី ។
អ្នកយកព័ត៍មានយើងនៅមិនទាន់ទទួលបានរបាយការណ៍ណាមួយពីសមត្ថកិច្ចជំនាញ អំពីការស្លាប់របស់ស្ត្រីរងគ្រោះថា បណ្តាលមកពីហេតុអ្វីនៅឡើយទេ ដោយរង់ចាំការធ្វើកោសល្យវិច័យសិន ៕
សូមបញ្ជាក់ថា ព័ត៌មានយ៉ាងណានោះ យើងនឹងផ្សាយជូនបន្តបន្ទាប់…
