ឈូក គឺជារុក្ខជាតិដែលបានផ្ដល់ផលប្រយោជន៏ដល់ជីវភាពរស់នៅប្រចាំថ្ងៃ ក្រៅពីយកផ្កាទៅប្រើប្រាស់ ក្រអៅយកទៅធ្វើម្ហូប ផ្លែក៏មានប្រយោជន៍សម្រាប់យកគ្រាប់ទៅបរិភោគ ។ ការរៀបចំដាំដុះឈូក វាមិនសូវពិបាក ហើយក៏មិនជាស្រួលណាស់ណាដែរ ក្នុងការថែទាំ ។ ខាងក្រោមនេះ ជាបច្ចេកទេសដាំដុះឈូក ។
១/. ការជ្រើសរើសពូជ ៖
– គួរជ្រើសរើសប្រភេទពូជឈូកបាយ ព្រោះពូជនេះនឹងផ្តល់ផលច្រើន ពិសេសមានគ្រាប់ណែនជាងពូជឈូកបេង ដែលមានផ្កាពណ៌ និងមានរយៈពេលដាំ ៦ខែ
២/. ការរៀបចំដី ៖
– ជ្រើសរើសយកស្រែប្រភេទដីបាតភូមិ ព្រោះវាជាដីសម្បូរជីជាតិ
– មុនពេលដាំ ត្រូវភ្ជួរដី១ទៅ២ដង ដើម្បីកម្ចាត់ស្មៅ
– ពេលភ្ជួររួច ត្រូវទុកដីរយៈពេល ៣ទៅ ៧ថ្ងៃ ទើបភ្ជួរលើកទី២ និងរាស់ដីឱ្យរាបស្មើជាការស្រេច
– ក្រោយរៀបចំដីរួច ចាំបាច់ត្រូវបញ្ចូលទឹកក្នុងស្រែ ដើម្បីឱ្យងាប់ស្មៅ ហើយបន្ទាប់មក ជ្រើសរើសកូនឈូកណាដែលថ្លោសល្អ មិនត្រូវយកកូនដែលខ្ចីពេក ឬចាស់ពេក មកដាំលើដីដែលបានរៀបចំនោះ ចន្លោះពីគ្នា៤តឹក
៣/. ការថែទាំ ៖
– ក្រោយដាំបានរយៈពេល៧ ទៅ១៥ថ្ងៃ ឈូកនឹងចាប់ផ្តើមដុះសន្លឹក
– ត្រូវចាប់ផ្តើមដើរដកស្មៅ ដើម្បីឱ្យឈូកដុះលូតលាស់លឿន
– អំឡុងពេលនេះ ចាំបាច់ត្រូវរក្សាទឹកក្នុងស្រែ មិនឱ្យលើសពី១ម៉ែត្រនោះឡើយ ដើម្បីការពារសត្វចង្រៃស៊ីស្លឹក
– ដំណាំនេះ បើដាំដុះក្នុងខែវស្សាពុំសូវមានសត្វចង្រៃបំផ្លាញទេ បើដាំនៅក្នុងខែប្រាំង នោះនឹងអាចមានកត្តាប្រឈមជំងឺ ឬសត្វចង្រៃបំផ្លាញច្រើន
– ដំណាំឈូកមានសត្វចង្រៃបំផ្លាញមួយចំនួនដូចជា សត្វក្រាវាមូលកឈូក ដង្កូវវាគ្រាប់
៤/. ការប្រមូលផល ៖
– ឈូកនឹងផ្តល់ផលជាបណ្តើរៗក្នុងរយៈពេលចាប់ពី ៣ខែ បើទោះបីជាឈូកមានអាយុ៦ខែទើបផ្តល់ផលក្តី ៕