រាជធានីភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អះអាងថា ការចាប់ខ្លួន អ្នកគាំទ្រសកម្មភាពទណ្ឌិត សម រង្ស៊ី មិនមែនជាការកំរាមកំហែងសិទ្ធិបញ្ចេញមតិនោះទេ គឺជាការអនុវត្តដើម្បីរក្សាសន្តិសុខ សណ្ដាប់ធ្នាប់សង្គមកម្ពុជា ។
សម្ដេចក្រឡាហោម ស ខេង បានថ្លែងប្រាប់អ្នកសារព័ត៌មាន ក្រោយបញ្ចប់មហាសន្និបាតអាណត្តិទី២ នៃសមាគមជាតិ ក្រុមប្រឹក្សារាជធានី-ខេត្ត នៅព្រឹកថ្ងៃទី៩ តុលានេះ នៅសណ្ឋាគារភ្នំពេញ ។
សម្ដេចក្រឡាហោម ថ្លែងបញ្ជាក់ថា ការចាប់ខ្លួនអ្នកគាំទ្រ សកម្មភាព ទណ្ឌិត សម រង្ស៊ី នៅក្រៅប្រទេស ដែលបានធ្វើការប្រមាថព្រះមហាក្សត្រ និងប៉ុនប៉ុងធ្វើរដ្ឋប្រហារ តាមរយៈបដិវត្តន៍ពណ៌ ក្នុងការប្រមូលកំលាំងមហាជន ដើម្បីផ្ដួលរំលំរាជរដ្ឋាភិបាលស្របច្បាប់នេះ គឺមិនមែនជាការគំរាមកំហែងលើសិទ្ធិបញ្ចេញមតិនោះទេ ពោលគឺជាការអនុវត្តទៅតាមច្បាប់ ដែល បានដើរហួសបន្ទាត់ក្រហម ក្នុងចេតនាធ្វើរដ្ឋប្រហារ ទំលាក់រាជរដ្ឋាភិបាលស្របច្បាប់ ។ ប្រសិនបើសកម្មជនអតីតគណបក្សសង្គ្រោះជាតិ នៅតែបន្តធ្វើអំពើខុសច្បាប់ ក្នុងរូបភាពក្បត់ជាតិ ដែលដើរតាមលោក សម រង្ស៊ី នឹងត្រូវអនុវត្តន៍ផែនការចាប់ខ្លួនជាបន្តទៀត ដើម្បីបញ្ជូនខ្លួនទៅតុលាការ ផ្ដន្ទាទោស ទៅតាមផ្លូវច្បាប់ ខណៈសកម្មជនគណបក្សសង្គ្រោះជាតិចំនួន ៣៤នាក់ ត្រូវបានសមត្ថកិច្ចចាប់ខ្លួនរួចហើយ ។
សម្ដេចក្រឡាហោម បានថ្លែងបញ្ជាក់ទៀតថា នាពេលបច្ចុប្បន្ននេះ តុលាការនៅតាមបណ្តារាជធានី-ខេត្តនានា នៅទូទាំងប្រទេស បានចេញដីការចាប់ខ្លួន និងចោទប្រកាន់អំពីពើក្បត់ជាតិ របស់អតីតសកកម្មជន និងអ្នកគាំទ្រ គណបក្សសង្គ្រោះជាតិជាបន្តបន្ទាប់ ក្រោយសម្តេចតេជោ ហ៊ុន សែន នាយករដ្ឋមន្ត្រីប្រកាសឲ្យចាប់ខ្លួន ប្រសិនបើពួកគេធ្វើអំពើក្បត់ជាតិ ៕
