ខេត្តពោធិ៍សាត់ ៖ បុរសម្នាក់ បានរងរបួសធ្ងន់ ដោយសារដើរទៅមើលវាលស្រែរបស់ខ្លួន ហើយក៏បានជាន់មីនមួយ បណ្តាលឲ្យផ្ទុះដាច់ជើងខាងស្តាំម្ខាង ត្រូវបានក្រុមគ្រួសារ បញ្ជូនទៅសង្គ្រោះបន្ទាន់ នៅឯមន្ទីរពេទ្យខេត្តត្រាត ប្រទេសថៃ ។
ហេតុការណ៍ផ្ទុះមីនដាច់ជើងនេះ បានកើតឡើងកាលពីវេលាម៉ោង៨និង៣នាទីនាព្រឹកថ្ងៃទី៨ តុលា ២០១៩ ស្ថិតនៅចំណុចភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ។
បើតាមរបាយការណ៍របស់នគរបាលស្រុកវាលវែង បានឲ្យដឹងថា ជនរងគ្រោះ ដែលបានរងរបួសដាច់ជើងម្ខាង ដោយសារដើរជាន់មីននោះ មានឈ្មោះ ឈន វីរៈ ភេទប្រុសអាយុ៣៩ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ ។
បច្ចុប្បន្នជនរងគ្រោះ កំពុងសម្រាកព្យាបាលនៅមន្ទីរពេទ្យខេត្តត្រាត ប្រទេសថៃ ៕
