ស្ទឹងត្រែង ៖ ចាប់តាំងពីថ្ងៃម្សិញមិញ រហូតមកដល់ព្រឹកថ្ងៃទី៤ ខែតុលា ឆ្នាំ២០១៩នេះ កម្លាំងសមត្ថកិច្ចជំនាញ នៃស្នងការនគរបាលខេត្តស្ទឹងត្រែង នៅពុំទាន់ឃាត់ខ្លួនជនសង្ស័យម្នាក់ត្រូវជាប្តី និងជាមន្ត្រីនគរបាលការពារព្រំដែន៧០១ នៅក្រុងស្ទឹងត្រែង ដែលប្រើច្រវាទូក វាយសម្លាប់ប្រពន្ធ នៅផ្ទះរបស់ខ្លួន នៅឡើយទេ ។
ហេតុការណ៍វាយសម្លាប់នេះបានកើតឡើងនៅព្រឹកថ្ងៃទី៣ ខែតុលា ឆ្នាំ២០១៩ ស្ថិតនៅភូមិកោះខនឌិន សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
សពស្ត្រីរងគ្រោះមានឈ្មោះ ផៃ ណា អាយុ២៧ឆ្នាំ រស់នៅភូមិកោះខនឌិន សង្កាត់សាមគ្គី ក្រុងស្ទឹងត្រែង មានកូន៤នាក់ ចំណែកប្តីឈ្មោះ តី ឯកសូគី នៅធ្វើការនៅអង្គភាពវរការពារព្រំដែន៧០១(គេចខ្លួនបាត់) ។
បើតាមសមត្ថកិច្ចជំនាញបានដាក់ការសង្ស័យថា សាកសពស្ត្រីរងគ្រោះ ត្រូវបានឃាតករជាប្តី ប្រើច្រវាទូក វាយជាច្រើនកន្លែង មានស្នាមជាំទ្រុឌចំនួនពីរកន្លែង នៅចំណុចភ្នែកខាងឆ្វេង និងមួយកន្លែងទៀតក្រោមចង្កាខាងឆ្វេង និងមានស្នាមហើមពកលើកញ្ចឹងក បណ្តាលឲ្យស្លាប់នៅនឹងកន្លែងកើតហេតុ ។ បន្ទាប់ពីពិនិត្យរួច នគរបាលជំនាញ សម្រេចប្រគល់សាកសព ជនរងគ្រោះ ជូនគ្រួសារ ដើម្បីធ្វើបុណ្យតាមប្រពៃណី ។ សមត្ថកិច្ចជំនាញ កំពុងបន្តស្រាវជ្រាវ ដើម្បីចាប់ខ្លួនជនសង្ស័យទៅផ្តន្ទាទោសតាមច្បាប់ ៕