រាជធានីភ្នំពេញ ៖ នៅថ្ងៃទី០២ ខែតុលា ឆ្នាំ២០១៩នេះ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីប្រកាសព័ត៌មានមួយ បំភ្លឺ និងទាត់ចោលការរិះគន់អ្នកលេងហ្វេសប៊ុកដែលបង្ហោះរូបភាព និងសាររិះគន់ ចំពោះអ្នកគ្រប់គ្រងឧទ្យានសួនសត្វភ្នំតាម៉ៅ ដោយចោទថា សត្វដែលស្គមស្គាំង នោះដោយសារខ្វះចំណី ។
ក្រសួងកសិកម្ម បានបញ្ជាក់ថា ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ របស់រដ្ឋបាលព្រៃឈើ នៃក្រសួងកសិកម្ម គឺជាមជ្ឈមណ្ឌលស្តារនីតិសម្បទាសត្វព្រៃគ្រប់ប្រភេទ ដោយមានមន្ត្រីបសុពេទ្យមើលថែទាំ ជាប្រចាំក្រោមកិច្ចសហការជាមួយ អង្គការដៃគូ ដូចជា Wildlife Alliance, FFI និង Free the Bear ។
ក្រសួងបញ្ជាក់ថា «សត្វព្រៃស្គមស្គាំងមួយចំនួនតូច នៅសួនសត្វភ្នំតាម៉ៅ មិនមែនដោយសារខ្វះចំណី តែជាសត្វមានជំងឺ ឬរងរបួសដោយសារការដាក់អន្ទាក់ ដោយខុសច្បាប់ ឬមានអ្នកចិញ្ចឹមមិនចង់ចិញ្ចឹម ឬមានបញ្ហាសុខភាពធ្លាក់ខ្លួនឈឺស្គមស្គាំង ក៏បានប្រគល់មកឲ្យរដ្ឋបាលព្រៃឈើ និងអង្គការដៃគូយកមកថែរក្សា និងព្យាបាល ដូច្នេះ ហើយទើបមានសត្វព្រៃខ្លះនៅទីនោះ ស្គមស្គាំងដែលមើលទៅហាក់ដូចជា ខ្វះចំណីអាហារជាដើម» ។
ក្រសួងកសិកម្មចេញបំភ្លឺខាងលើនេះ បន្ទាប់ពីមានមតិរិះគន់ជាច្រើននៅលើបណ្តាញសង្គម ជាក់ស្តែងបើតាមគណនីហ្វេសបុកមួយឈ្មោះ«ស្លាបប៉ាកាអព្យាក្រិត្យ » កាលពីថ្មីនេះបានសរសេរថា បានអ្នកគ្រប់គ្រងសួនសត្វភ្នំតាម៉ៅ យកលុយទៅចិញ្ចឹមស្អី បានទុកឲ្យសត្វព្រៃនៅសួនសត្វមួយនេះ ក្លាយជារបៀបនេះ ? ថវិកាជាតិក៏មាន លុយចំណូលអ្នកទេសចរណ៍ក៏មាន តើអភិវឌ្ឍន៍បានស្អីខ្លះហើយ ? សត្វឡើងស្គមៗ ដល់ថ្នាក់សូម្បីតែសត្វជ្រូកព្រៃក៏ស្គមចេញឆ្អឹងជំនីរដែរ ចប់ហើយ មើលទៅពិតជាវេទនាភ្នែកខ្លាំងណាស់ បើថា ចិញ្ចឹមពួកវាពិបាកពេក ព្រលែងពួកវាឲ្យអស់ទៅ យកពួកវាមកដាក់ក្នុងទ្រុងហើយ សូម្បីតែឲ្យគ្នារស់នៅស្រួលបន្តិចក៏មិនបានដែរ គួរតែព្រលែងពួកវាឲ្យរស់នៅតាមយថាកម្មចុះ បើយកវាមកចិញ្ចឹម ដាក់វាក្នុងទ្រុងហើយ នៅធ្វើឲ្យពួកវារស់នៅវេទនាភ្នែកយ៉ាងនេះទៀត។ ត្រូវគេយកមកដាក់ក្នុងទ្រុងរស់នៅគ្មានសេរីភាពហើយ ត្រូវរស់នៅយ៉ាងវេទនាទៀត… កុំថាឡើយភ្ញៀវទេសចរបរទេស សូម្បីតែទេសចរណ៍ខ្មែរគ្នាឯង ក៏លែងចង់ទៅលេងសួនសត្វអស់នោះដែរ ទៅលេងអី បើទៅលេងមិនបានសប្បាយចិត្តផង បែរជាបានចិត្តឈឺចាប់អាណិតសត្វព្រៃនៅនោះយ៉ាងនេះ ទៅលេងវាអី បើទៅដល់ឃើញវាវេទនាយ៉ាងនេះ យើងអ្នកទៅមើលឈឺចាប់ជំនួសពួកវាទៀត ។
ដូចគ្នានេះដែរ ក៏មានមតិផ្សេងទៀតលើកឡើងថា «សូមឯកឧត្តម វេង សុខុន រដ្ឋមន្ត្រីក្រសួងកសិកម្ម មេត្តាចុះមកពិនិត្យមើលសត្វនៅសួនសត្វភ្នំតាម៉ៅផង កុំជឿលើរបាយការណ៍របស់ប្រធានសួនសត្វពេក ។ សត្វអត់មានអីស៉ីឈឺស្គមជិតងាប់អស់ហើយ អាណិតជីវិតសត្វផង ។ ម្យ៉ាងទៀតនៅសួនសត្វភ្នំតាម៉ៅ មិនឆ្ងាយប៉ុន្មានទេ ឯកឧត្តម អាចឆ្លៀតពេលចុះពិនិត្យដោយផ្ទាល់ដើម្បីពង្រឹងការថែទាំសត្វនៅសួនសត្វនេះ ។ បើសត្វឈឺដូចមានសរសេរក្នុងរបាយការណ៍ គួរបញ្ជូនពេទ្យសត្វទៅព្យាបាលអោយមានប្រសិទ្ធិភាពផង» ៕