សណ្ដែកសៀងគឺជាប្រភេទដំណាំដែលត្រូវបានយកទៅកែច្នៃផលិតចេញជាម្ហូបអាហារ ព្រមទាំងឱសថ ព្រោះមានសារធាតុចិញ្ចឹមច្រើន។ សណ្ដែកសៀងជាដំណាំ ដែលអាចលូតលាស់បានស្ទើរគ្រប់រដូវនៅក្នុងតំបន់ដែលមានអាកាសធាតុក្ដៅ ហើយវាជាប្រភេទដំណាំដែលមិនប្រកាន់រដូវនោះទេ ។
១/. ការរៀបចំដាំដុះ ៖
– រៀបចំចាក់ដីដែលមានលាយជីកំប៉ុស្ត ឬលាមកសត្វ ចូលក្នុងផើងដំណាំ
– យកគ្រាប់ពូជ មកដាំ ដោយក្នុងរណ្តៅ ត្រូវដាក់២គ្រាប់ កប់ក្នុងជម្រៅ៣ទៅ៤សង់ទីម៉ែត្រ
– គួររក្សាទុកផើងដំណាំ នៅក្បែរ ជិតប្រភពទឹក និងនៅទីវាល គ្មានម្លប់
២/. ការថែទាំ ៖
– សណ្តែកសៀង ត្រូវការទឹកដោយមិនអាចខ្វះបាន ជាមធ្យមនៅវគ្គលូតលាស់ដើមស្លឹក វគ្គចេញផ្កា និងដាក់គ្រាប់
– កុំស្រោចទឹកជោគជាំពេក ព្រោះសណ្តែកសៀង ជាដំណាំមិនធន់នឹងការលិចទឹកទេ
– ឧស្សាហ៍ជ្រុំបំផុសដី ដកស្មៅ ដើម្បីបំបាត់ជម្រកសត្វល្អិត ជំងឺ និងការប្រកួតប្រជែងដណ្តើមជីជាតិពីដី
– ការជ្រុំដី ត្រូវជ្រុំឱ្យផុសស្រទាប់លើ ហើយកាយប្រមូលដី ពូនគល់សណ្តែកសៀង ក្រោយពីដាំបាន១៥ទៅ២០ថ្ងៃ
៣/. ការប្រមូលផល ៖
ក្រោយពីដាំបានរយៈពេល៣ទៅ៤ខែ (អាស្រ័យតាមពូជ) យើងអាចប្រមូលផលបាន ដោយពិនិត្យទៅលើការប្រែប្រួល ដើមស្លឹកដូចជា
– ដើម ស្លឹក មានពណ៌លឿង ប្រមាណ៩០ភាគរយ
– ស្លឹក ផ្នែកខាងក្រោម មានពណ៌លឿង ជ្រុះធ្លាក់បន្តបន្ទាប់
– សំបកផ្លែរលុង ហើយគ្រាប់ភ្លឺណែនរលោង
– ការប្រមូលផលយឺត ធ្វើឱ្យផ្លែរបើកសំបកជ្រុះគ្រាប់ចោល
– ការប្រមូលផល ត្រូវប្រើកណ្តៀវ ឬកាំបិតច្រូតកាត់ដើម ដាក់រាយហាលថ្ងៃឱ្យស្ងួតល្អ រួចយកដំបងគោះបំបែកយកគ្រាប់
៤/. ការរក្សាទុកពូជ ៖
– គ្រាប់សម្រាប់ទុកពូជ ត្រូវរែងទុកឱ្យស្អាត ហាលថ្ងៃលើកន្ទេលរយៈពេល៣ទៅ៤ថ្ងៃ រហូតដល់សំណើម ក្នុងគ្រាប់ធ្លាក់ចុះនៅសល់១៣ទៅ១៤ភាគរយ ។
– ច្រកទុកដាក់ក្នុងថង់ ឬបាវរក្សាទុកកន្លែងស្ងួត មានខ្យល់ចេញចូលល្អ ៕
