ទូភ្ញាក់កូនមាន់ ជាឧបករណ៏សម្រាប់ភ្ញាស់ស៊ុតដោយសិប្បនិម្មិត គឺភ្ញាស់ដោយមិនមានមេក្រាប។ ស៊ុតត្រូវដាក់ក្នុងទូភ្ញាស់ រហូតដល់កូនមាន់អាចញាស់ចេញមកក្រៅដោយខ្លួនឯង។
ការភ្ញាស់ស៊ុតមាន់ដោយប្រើទូពិតជាមានផលប្រយោជន៏លើសពីការរំពឹងទុក មានដូចជា៖
-អត្រាកូនមាន់ញាស់ខ្ពស់ (ញាស់មួយលើកៗ បានកូនច្រើន)
-កូនមាន់មានសុខភាពល្អ
-អាចកំណត់ ឬតម្រូវការតាមការចង់បាន៖ សីតុណ្ហភាព សំណើម រយៈពេលបង្វិលស៊ុត និងចរន្ដខ្យល់ចេញចូលល្អ
-មានអនាម័យល្អ
-ងាយស្រួលផ្ដល់វ៉ាក់ស៊ាំងការពារជម្ងឺ
-ចំនេញពេលវេលាថែទាំកូនមាន់។
១/. សម្ភារសម្រាប់ប្រើប្រាស់ធ្វើទូភ្ញាស់
៖
– កេសស្នោដាក់ផ្លែឈើចំនួន២
– ស្កុត១ដុំ
– ដែកគោលអង្កាម១ខាំ
– បំពង់ទីប ដែកអ៊ីណុកទំហំ៥ហ៊ុន ប្រវែង៥តឹក
– សំណាញ់ជ័រ៥តឹក
– ចង្កៀងប្រេងកាតតូច១
– ក្រដាសអាលុយមីញ៉ូម១ដុំធំ
– ទែម៉ូម៉ែត្រវាស់កម្តៅ១
– ចានដាក់ទឹក២
– ជំនៀរឈើតូចៗ ជម្រាកស្តើងៗ
២/. របៀបធ្វើទូភ្ញាស់ ៖
យកកេសផ្លែឈើមកសម្អាត និងកាត់ឱ្យបានស្មើល្អជាងមុន
បន្ទាប់មក យកក្រដាសអាលុយមីញ៉ូម
បិទឱ្យជាប់នៅផ្ទៃខាងក្នុងនៃកេសឱ្យជិតល្អ ហើយចាប់ផ្តើមយកជំនៀរឈើតូចៗ
មកដំ គាបសំណាញ់ជ័រជុំវិញ ដែលមានទទឹង និងបណ្តោយតាមទំហំប្រវែងទូ
និងទុកចោះប្រហោងចំកណ្តាលដើម្បីដាក់បំពង់ទីប ។
បន្ទាប់មក ចាប់ផ្តើមចោះទ្វារបិទបើកទូទំហំប្រហែល ១,២តឹក បួនជ្រុង ចំនួន២ខាងលើ ១សម្រាប់ដាក់ពង និងទែម៉ូម៉ែត្រ
ខាងក្រោមសម្រាប់ដាក់ទឹក និងចង្កៀងដុតកម្តៅជាការស្រេច ។
៣/. របៀបដាក់ពងមាន់ភ្ញាស់ ៖
យកពងមាន់ពីសម្បុកដែលមេកំពុងពង មកទុកឱ្យបានច្រើន ទើបចាប់ផ្តើមដាក់ក្នុងទូភ្ញាស់ ។ ក្នុងទូមួយ ដាក់បានចំនួន៨០-៨៥គ្រាប់ ក្នុងទូនោះ យើងចាប់ផ្តើមអុចចង្កៀងឱ្យមានកម្តៅត្រឹម ៣៧-៣៨អង្សាសេ មិនឱ្យកម្តៅខ្ពស់ និងទាបជាងនោះទេ ។ ត្រូវបង្វិលពងរាល់៣-៤ដងនៅពេលថ្ងៃ និង១-២ដងក្នុងមួយយប់ នៅពេលយប់ ការធ្វើបែបនេះ រហូតដល់២០-២១ថ្ងៃ ទើបកូនមាន់ញាស់ ៕
