កំពង់ចាម ៖ ស្ត្រីម្នាក់ត្រូវបុរសចំណាស់ដែលស្គាល់គ្នាតាមរយៈទូរស័ព្ទ បោកនាងដោយប្រើល្បិចនាំទៅទិញទូរស័ព្ទ ដោយមិនទាន់ឲ្យលុយទៅអ្នកលក់ផង បុរសនោះបានគេចខ្លួនបាត់ ទុកនាងឲ្យក្លាយជាអ្នករងគ្រោះ នៅកន្លែងអ្នកលក់ទូរស័ព្ទ កាលពីថ្ងៃទី០៩ ខែកញ្ញា ឆ្នាំ២០១៩ ។
មន្ត្រីប៉ូលិសបានឲ្យដឹងថា កម្លាំងជំនាញព្រហ្មទណ្ឌ បានចុះទៅដល់កន្លែងកើតហេតុ ហើយធ្វើការនាំខ្លួន ស្ត្រីម្នាក់ ឈ្មោះ វុទ្ធី ហៅស្រមោចខ្មៅ អាយុ២៤ឆ្នាំ ជនជាតិខ្មែរ រស់នៅស្រុកកណ្តាលស្ទឹង ខេត្តកណ្តាល នាំខ្លួនមកសាកសួរនៅអធិការដ្ឋាននគរបាលស្រុកចំការលើ ។
នៅពេលសាកសួរ ស្ត្រីសង្ស័យបានរៀបរាប់ថា នាងបានស្គាល់មនុស្សប្រុសម្នាក់បានប្រហែល០៣ថ្ងៃមកហើយ មិនស្គាល់ឈ្មោះ អាយុប្រហែល៥០ឆ្នាំ សម្បុរខ្មៅ មិនស្គាល់អាសយដ្ឋានទេ បានទំនាក់ទំនងស្នេហ៍គ្នាតាមទូរស័ព្ទ ហើយបុរសម្នាក់នោះ បាននិយាយថា នឹងទិញទូរស័ព្ទថ្មី និងក្រវិលឲ្យនាង នៅវេលាម៉ោងប្រហែល៧និង៣០នាទីព្រឹកថ្ងៃទី០៩ កញ្ញា មនុស្សប្រុសនោះបានណាត់ជួបនៅមុខវិទ្យាល័យឫស្សីកែវ ក្រុងភ្នំពេញ ហើយជិះម៉ូតូម៉ាកសេ១២៥ ពណ៌ខ្មៅ មិនស្គាល់សេរី មកដល់ផ្សារបុសខ្នុរ ស្រុកចំការលើ ក៏ចូលទិញទូរស័ព្ទ ម៉ាកអូប៉ូ ក្នុងតម្លៃ១៦៩ដុល្លារ ។
ស្ត្រីឈ្មោះ វុទ្ធី ហៅស្រមោចខ្មៅ បន្តថា ពេលទិញទូរស័ព្ទបានហើយ មនុស្សប្រុសនោះបានប្រាប់នាងថា យកទូរស័ព្ទនេះឲ្យកូនមើលមួយភ្លែតសិន ព្រោះកូនចង់បានម៉ាកហ្នឹងដែរ ដោយទុកឲ្យខ្លួនអង្គុយចាំនៅកន្លែងលក់ទូរស័ព្ទ ជាមួយកាបូរបស់បុរសនោះ បានមួយសន្ទុះខ្លួនមានការសង្ស័យ ទើបទូរស័ព្ទទៅមនុស្សប្រុសនោះ តែមិនចូល ហើយខ្លួនបានឲ្យអ្នកលក់ទូរស័ព្ទ យកឡាមមកវះកាបូបមើល ឃើញសុទ្ធតែក្រដាស ទើបដឹងថា ចាញ់បោកគេ ។
ស្ត្រីសង្ស័យខាងលើ ត្រូវបានឃាត់ខ្លួន នៅអធិការដ្ឋាននគរបាលស្រុកចំការលើ ដើម្បីបន្តការស្រាវជ្រាវ ៕
