ផ្លែសាឡាក់ ឬ ផ្លែរកាំ គឺជាផ្លែឈើដែលពេញនិយមទទួលទានរបស់ប្រជាជនក្នុងប្រទេសរបស់យើង។ អ្នកខ្លះក៏និយមទទួលទានលេងជាបង្អែម ឬម្ជូរលាងមាត់ អ្នកខ្លះក៏យកមកប្រលេះសាច់វាក្រឡុកជាមួយអំបិលម្ទេស ដោយសារតែវាមានរសជាតិជូរផ្អែមឆ្ងាញ់ពិសា ក្រៅអំពីរសជាតិជូរអែមឆ្ងាញ់ហើយនោះ ជាផ្លែឈើធម្មជាតិ និងមានប្រយោជន៍ចំពោះសុខភាពទៀតផង។
ព្យាបាលជំងឺ៖ រោគស្លេស្ម៍ ក្អក ហើមក្បាលជង្គង់ ទំលាក់ស្លេស្ម៍ និងឈាមក្តៅ។
លក្ខណៈរុក្ខជាតិ៖ ជាតាលព្រឹក្ស ធាងដុះចេញពីដី តាមធាងមានបន្លាច្រើន។
-ស្លឹក៖ ដុះចេញពីធាង ជាស្និតមិនរៀបរយ (រាងដូចស្លឹកផ្តៅសោម)
-កញ្ចុំផ្កា៖ ចេញពីគល់ប្រគាបស្លឹក
-ផ្លែ៖ ចេញជាធ្លាយ ផ្លែនីមួយរាងស៊ុតស្រួចចុងក្រហមជាំ មានរសជាតិជូរអែម
-សំបកផ្លែ៖ មានរោមច្រើនបែបជាបន្លា
កន្លែងដាំដុះ៖ ដុះដោយខ្លួនឯងនៅតាមតំបន់ភ្នំ ធ្លាប់ប្រទះឃើញនៅខេត្តកោះកុង។ បន្តពូជដោយគ្រាប់។
វិធីធ្វើ និងប្រើប្រាស់៖
-ផ្នែកប្រើប្រាស់៖ ផ្លែ ស្លឹក
-ផ្លែ៖ ទទួលទានព្យាបាលរោគស្លេស្ម៍ ក្អក និងហើមក្បាលជង្គង់
-ស្លឹក៖ ទំលាក់ស្លេស្ម៍ ឈាមក្តៅ
កំរិតប្រើ៖ ប្រើពី ៣០-៥០ក្រាម
ដាំផឹកក្នុងមួយថ្ងៃ។
សូមបញ្ជាក់ថាឱសថធម្មជាតិនេះអាចប្រើប្រាស់បានលុះត្រាតែបងប្អូនគ្មានជម្រើសផ្សេង
ដើម្បីចៀសវាងការធ្វេសប្រហែសដោយប្រការណាមួយ ៕
