កំប្លោក ជារុក្ខជាតិដុះក្នុងទឹកដែលមានស្ទើរតែគ្រប់ទីកន្លែងនៅក្នុងប្រទេសកម្ពុជា ដូចជាស្រះ បឹងបួរ ត្រពាំង ស្ទឹង ទន្លេ។ ម្យ៉ាងទៀតកំប្លោកជា រុក្ខជាតិងាយដុះ មានការលូតលាស់លឿនរហ័សដោយក្នុង១សប្ដាហ៏ វាអាចបំបែកខ្លួនបានជា២។ កំប្លោកត្រូវបានគេចាត់ទុកថាជារុក្ខជាតិដែលដុះលឿនជាងគេនៅក្នុងពិភពលោក ដោយសារតែការលូតលាស់របស់វាលឿន កន្លែងខ្លះហាក់ចាត់ទុកថាជាការបង្កបញ្ហាទៅវិញ។
ដោយសារតែការលូតលាស់របស់វាលឿន ដូចច្នេះហើយបរិមាណផលកំប្លោក ដូចជា ដើម ស្លឹក នឹងឬស យើងអាចទាញយកយកផលប្រយោជន៏របស់វាមកប្រើប្រាស់ក្នុងវិស័យកសិកម្មបានយ៉ាងច្រើនគ្រប់សណ្ឋាន។
ដូចនេះដើម្បីឲ្យដឹងថាតើកំប្លោកមានផលប្រយោជន៏ច្រើនដល់កម្រិតណានៅក្នុងវិស័យកសិកម្ម យើងនឹងធ្វើការរៀបរាប់ជូន ដូចខាងក្រោម៖
១. យើងអាចយកកំប្លោកខ្ចី ទៅប្រើជាចំណីសត្វ ដូចជា មាន់ ទា ជ្រូក គោ ក្របី ជាដើម ដោយសារតែ កំប្លោក មានប្រូតេអ៊ីនខ្ពស់ ប្រហែល២០% ។
២. កំប្លោកទាំងដើម ស្លឹក និងឬស ពេលទុកឲ្យរលួយទៅ ក្លាយជាជីធម្មជាតិដ៏ល្អ។ គេប្រើវា ជាធាតុ ផ្សំក្នុងការផលិតជីកំប៉ុស្ត។
៣. ដើម ស្លឹក និងឬសកំប្លោក យកទៅគ្របដី និងគល់ដំណាំ ជួយការពារសំណើមក្នុងដី ការពារស្មៅ កុំឲ្យដុះ ផ្តល់ភាពម្លប់ត្រជាក់ដល់សត្វល្អិត មានប្រយោជន៍ក្នុងដី និងពេលរលួយក្លាយជា ជីធម្មជាតិ ដីល្អ។
៤. ដើម និងស្លឹកកំប្លោក ពេលហាលឲ្យស្ងួតដូចចំបើង គេអាចយកទៅបណ្តុះផ្សិតបាន។
៥. ផ្កាកំប្លោកជាបន្លែធម្មជាតិ (អន្លក់) ដែលមានរសជាតិឆ្ងាញ់។
៦. កំប្លោក បើយើងរក្សាវាទុក ១ផ្នែកតូចនៃស្រះទឹកចិញ្ចឹមត្រី (ឧទាហរណ៍ ១/១០ នៃផ្ទះស្រះ) ឬសវា ជម្រកដល់ត្រី ហើយឬសរបស់វាក៏ជាចំណីដល់ត្រីដែរ។ យើងក៏ត្រូវការពារកុំឲ្យវារីកច្រើនពេក ដែលបណ្តាលឲ្យមានបញ្ហាដល់ត្រីវិញ តាមរយៈការធ្វើឲ្យទឹកខ្វះអុកស៊ីហ្សែន។
៧. កំប្លោកជារុក្ខជាតិ ដែលអាចជួយស្រូបជាតិពុលពីក្នុងទឹក។ វាក៏ជួយឲ្យទឹកថ្លាស្អាត តែក៏ត្រូវ ឧស្សាហ៍ស្រង់វាចេញដែរ។
៨. ផលប្រយោជន៍ផ្សេងៗទៀតដូចជា សរសៃររបស់វា ប្រើជាវត្ថុធាតុដើមសម្រាប់ការធ្វើខ្សែ ធ្វើអង្រឹង ធ្វើកន្ត្រកយួរ និងគ្រឿងសង្ហារឹមផ្សេងៗ។ល។
៩. កំប្លោកទាំងដើម និងស្លឹក យកធ្វើជាវត្ថុធាតុដើម ដើម្បីផលិតឧស្ម័នជីវ (Biogas)។
១០. គេយកទៅកែច្នៃបន្ថែម ដើម្បីធ្វើជាថ្នាំថែរក្សាសម្រស់ស្បែក និងសាប៊ូកក់សក់ (Shampoo)
១១. កំប្លោក ក៏គេអាចយកទៅប្រើជាឱសថបុរាណផ្សេងៗទៀតដូចជា ឈឺធ្មេញ ឈឺបំពង់ក។ ទាក់ទង ការប្រើប្រាស់ជាឱសថបុរាណ ទាមទារឲ្យមានការស្រាវជ្រាវផ្ទៀងផ្ទាត់បន្ថែមទៀត។
ដូចច្នេះបងប្អូនបានយល់ដឹងពីអត្ថប្រយោជន៏កំប្លោកដូចបានរៀបរាប់នៅខាងលើហើយ វាងាយស្រួលក្នុងការដាំដុះ និងអោយផលមិនចេះអស់ យើងគួរតែយកចិត្តទុកដាក់កែច្នៃក្នុងការប្រើប្រាស់ឲ្យបានច្រើន ៕
