ល្ហុង ជាដំណាំហូបផ្លែដែលមានពូជច្រើនប្រភេទខុសៗគ្នា ហើយវាត្រូវបានប្រជាកសិករយើងនិយមដាំដើម្បីទុកហូប និងយកទៅលក់លើទីផ្សារដើម្បីបានប្រាក់កម្រៃយកមកផ្គត់ផ្គង់ជីវភាពគ្រួសារ ម្យ៉ាងទៀតល្ហុងមានប្រយោជន៏ចំពោះសុខភាពបំផុត ទាំងផ្លែខ្ចីនិងទុំ វាសំបូរទៅដោយសារធាតុរ៉ែ វីតាមីនអា វីតាមីនសេ និងសារធាតុចិញ្ចឹមផ្សេងទៀតដែលល្អសម្រាប់ការទទួលទាន។
នៅប្រទេសកម្ពុជា យើងឃើញមានពូជល្ហុងពីរប្រភេទគឺ៖
–ល្ហុងដំឡូង៖ ល្ហុងប្រភេទនេះពុំសូវមានអ្នកដាំទេ ព្រោះវាមិនសូវឆ្ងាញ់ វាទុំមានសាច់ពណ៌លឿង មិនសូវផ្អែម គ្រាប់ច្រើន និងងាយដាំដុះ។
–ល្ហុងល័ក្ខ៖ ល្ហុងប្រភេទនេះគេនិយមចូលចិត្តដាំ ព្រោះវាមានរសជាតិឆ្ងាញ់។ ពូជនេះមានដើមនិងធាងពណ៌រាងស្វាយ។ ផ្លែខ្ចីមានពណ៌បៃតងខ្ចីរាងទ្រវែង និងមានគ្រាប់តិចតួច។ ផ្លែទុំមានពណ៌លឿង និងសាច់ពណ៌ក្រហម។
ដំណាំល្ហុងអាចដាំដុះនិងផ្ដល់ផ្លែបានក្នុងរយៈពេល ៦ឬ ៨ខែ ឬលើសនេះបន្ដិចបន្ទាប់ពីដាក់ដាំ។
១/.លក្ខខ័ណ្ឌដី និងអាកាសធាតុ
-ជាដីធូរ សំបូរជីជាតិ ជាពិសេសគឺដីកណ្ដេង
-របបទឹកភ្លៀង ១៥០០ម.ម ក្នុងមួយឆ្នាំ ឬតិចបំផុត ១០០ម.ម
-ជាតំបន់ត្រូពិច
-ដីមិនលិចទឹក
-គួរដាំនៅកន្លែងដែលមានរបាំងខ្យល់ ព្រោះវាអាចការពារវាពីការបាក់ដើមដោយសារខ្យល់
២/.របៀបបណ្ដុះកូន
-រៀបចំថ្នាលបណ្ដុះកូនដែលមានទទឹង ១ ម៉ែត្រ បណ្ដោយ ២ ម៉ែត្រ
-ធ្វើដីឲ្យម៉ត់ និងរើសស្មៅឲ្យស្អាត
-ធ្វើដំបូលប្រក់ដែលអាចឲ្យពន្លឺចាំងចូលបានខ្លះៗ
-រើសផ្លែទុំល្អមួយសម្រាប់ធ្វើពូជ និងយកគ្រាប់ទៅសាបក្នុងថ្នាលដែលធ្វើរួចដោយកប់ជម្រៅ ៥ម.ម។
៣/.ការថែទាំកូន៖
-ពេលកូនល្ហុងដុះបានកំពស់ល្មម ត្រូវគាស់វាដាក់ក្នុងថង់ប្លាស្ទិច
-ពេលមានអាយុ ១ខែកន្លះរាប់ពីថ្ងៃបណ្ដុះ អាចយកវាទៅដាំនៅចំការបាន
-ក្នុងមួយរណ្ដៅដាំ ២ ទៅ ៣ ដើម
-ពេលល្ហុងចេញផ្កា គេអាចទុកដើមឈ្មោល ១ ទៅ ២ ដើមក្នុងចំណោមដើមញី១០០ដើម ដើម្បីឲ្យមានដំណើរលំអង។
៤/.ការធ្វើដីដាំ៖
-ដីត្រូវភ្ជួរ ២ ទៅ ៣ សារ
-កាប់រណ្ដៅទំហំ ០.៧ ម៉ែត្រ ជម្រៅ ០.៥ ម៉ែត្រ
-ចន្លោះគុម្ព ២ ម៉ែត្រ
-ចន្លោះរង ២ ម៉ែត្រ
-ជីអាចម៌គោដាក់ក្នុងរណ្ដៅ
៥/.ប្រមូលផល៖
រយៈពេល ៦ ខែ ល្ហុងក៏ចេញផ្លែ។ ចាំរហូតដល់ល្ហុងអាចប្រមូលផលបានទើបចាប់ផ្ដើមប្រមូល
ការប្រមូលផលល្ហុងទុំដោយដាក់ចំបើងទ្រាប់ពីក្រោម ដើម្បីកុំឲ្យវាជ្រិញ។
បើកសិករអនុវត្តន៏តាមវិធីនេះឲ្យត្រូវតាមគោលការណ៏ នោះធានាថាកសិករនឹងទទួលបានផលជាទីគាប់ចិត្ត ៕
