ព្រះសីហនុ ៖ មន្ត្រីសាលាខេត្តព្រះសីហនុ បានប្រកាសនៅព្រឹកថ្ងៃទី០៩ ខែសីហា ឆ្នាំ២០១៩ នេះឲ្យដឹងថា ផ្លូវជាតិលេខ៤ ត្រង់ចំណុចគីឡូម៉ែត្រផ្លូវ១៧២-១៧៣ កំពុងរងការជន់លិចប្រមាណ៣០០-៥០០ម៉ែត្រដោយសារជំនន់ទឹកភ្លៀង, សូមបងប្អូនប្រជាពលរដ្ឋដែលធ្វើដំណើរតាមផ្លូវជាតិលេខ៤នេះ សូមជៀសទៅផ្លូវផ្សេង ។
ដោយឡែក ក្រុមហ៊ុន អានកូ វ៉ធើរសឹបផ្លាយ បានចេញសេចក្តីដំណឹងជាបន្ទាន់មួយអោយដឹងថា សូមជម្រាបជូនអតិថិជនទាំងអស់មេត្តាជ្រាថា ដោយសារតែជំនន់ទឹកភ្លៀងនៅតែបន្តធ្លាក់ជាច្រើនថ្ងៃជាប់ៗគ្នា ធ្វើអោយទឹកនៅទំនប់ក្បាលឆាយ មានការកើនឡើងជាគំហុក ហើយបានហូរច្រោះដាច់ផ្លូវ និងដួលរលំបង្គោលភ្លើងបណ្តាលអោយដាច់ចរន្តអគ្គិសនី ជាហេតុធ្វើអោយប៉ះពាល់ដល់ការផ្គត់ផ្គង់ទឹកនៅក្រុងព្រះសីហនុទាំងមូល ។ ក្រុមការងារកំពុងរកមធ្យោបាយ ដើម្បីដាំបង្គោលឡើងវិញ ។ អាស្រ័យដូចបានជម្រាបជូនខាងលើ សូមអតិថិជនទាំងអស់មេត្តាយល់យោគ។ សូមអរគុណ ។
ចំណែកឯ អគ្គិសនីនៅក្នុងខេត្តព្រះសីហនុ ត្រូវបានផ្អាកការផ្គត់ផ្គង់ចរន្តអគ្គិសនីបណ្តោះអាសន្ន នៅរសៀលថ្ងៃទី៩ ខែសីហា ឆ្នាំ២០១៩នេះ ដោយសារខ្យល់ព្យុះ ភ្លៀងខ្លាំង និងទឹកភ្លៀងហូរច្រោះធ្វើឲ្យទ្រេតបង្គោលភ្លើង ។ ហេតុការណ៍នេះ បានបណ្តាលឲ្យដាច់ចរន្តអគ្គិសនីនៅទីតាំងមួយចំនួននៅសង្កាត់លេខ១ សង្កាត់លេខ២ សង្កាត់លេខ៤ ក្រុងព្រះសីហនុ។ តែយ៉ាងណានោះ នៅពេលនេះ ក្រុមការងារបច្ចេកទេសកំពុងធ្វើការជួសជុលដើម្បីភ្ជាប់ចរន្តឡើងវិញ នេះបើតាមការបញ្ជាក់របស់លោក គួច ចំរើន អភិបាលខេត្តព្រះសីហនុ ។
បើតាមរបាយការណ៍ជាបណ្តោះអាសន្ន បានអោយដឹងថា ជំនន់ទឹកភ្លៀងបានលិចសម្ភាររបស់ប្រជាពលរដ្ឋ មានដូចជា ឡាន ម៉ូតូ និងសម្ភារប្រើប្រាស់ប្រចាំថ្ងៃជាច្រើនផ្សេងទៀតផងដែរ ។ នន់ទឹកភ្លៀងនេះបណ្តាលឲ្យ រលំរបងថ្មសង្កត់កម្មករសំណង់២នាក់ប្តីប្រពន្ធស្លាប់ (ធ្វើរោងស្នាក់នៅជាប់របងផ្ទះធ្វើពីថ្មរៀបឥដ្ឋ ស្ថិតក្នុងក្រុមទី២១ ភូមិ២ សង្កាត់១ ក្រុងព្រះសីហនុ ។ ដោយឡែក នៅចំណុចរោងចក្រផលិតឥដ្ឋ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ មានករណី បាក់រលំរបងមួយកើតឡើង បណ្តាលឲ្យសង្កត់លើមនុស្សម្នាក់ស្លាប់ នៅនឹងកន្លែងជាជនជាតិចិន។ ទឹកហូរធ្វើឲ្យដាច់ស្ពាន (ស្ពានពោងធុងសាំង) ១កន្លែង ស្ថិតនៅតំបន់តាលះ ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ ។ នៅលើផ្លូវជាតិលេខ៤៥ នៅចន្លោះគីឡូម៉ែត្រលេខ៧-៨ ទឹកហូរច្រោះធ្វើឱ្យស្រុតផ្លូវមួយចំហៀង ស្ថិតនៅភូមិអុង ឃុំរាមស្រុកព្រៃនប់ ៕