ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋក្រសួងមហាផ្ទៃ បានចេញប្រកាសតែងតាំងនាយនគរបាលជាតិ២រូប ជាអធិការរបស់ខណ្ឌ ដែលទើបតែបង្កើតថ្មី ខណ្ឌកំបូល និង ខណ្ឌបឹងកេងកង នៅក្នុងរាជធានីភ្នំពេញ ។
យោងតាមប្រកាស ស្តីពីការផ្ទេរភារកិច្ច និងតែងតាំងមុខតំណែងមន្ត្រីនគរបាលជាតិ ចុះថ្ងៃទី១៧ ខែឧសភា ឆ្នាំ២០១៩ បានឲ្យដឹងថា លោកវរសេនីយ៍ទោ ហង្ស មុនី អត្តលេខ១៣១៦២ បច្ចុប្បន្នជាអធិការរងខណ្ឌ សែន សុខ ត្រូវបានតែងតាំងមុខតំណែងថ្មី ជាអធិការខណ្ឌកំបូល និងលោកវរសេនីយ៍ទោ ស៊ឹម ពិសិដ្ឋ អត្តលេខ១៧៥២៦ បច្ចុប្បន្នជាអធិការរងខណ្ឌទួលគោក ត្រូវបានតែងតាំងជាអធិការខណ្ឌបឹងកេងកង ។
នៅព្រឹកថ្ងៃទី១៤ ខែមិថុនា នេះ លោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ ថ្លែងថា ក្រៅពីពិធីប្រកាសតែងតាំង អធិការនគរបាលខណ្ឌទាំង២រូបនេះ ក៏មានការប្រកាសតែងតាំង និងប្រគល់ភារកិច្ចថ្មី ព្រមទាំងបំពាក់ឋាន្ដរស័ក្ដិជូនដល់មន្ដ្រីនគរបាលជាច្រើននាក់ផ្សេងទៀត មានថ្នាក់វរសេនីយ៍ឯក ថ្នាក់វរសេនីយ៍ទោ ថ្នាក់វរសេនីយ៍ត្រី ថ្នាក់អនុសេនីយ៍ឯក និងថ្នាក់អនុសេនីយ៍ទោ ជាដើម ។
ស្នងការរាជធានីភ្នំពេញ បន្តថា «ខ្ញុំបានជំរុញឱ្យមន្ដ្រីនគរបាលនគរបាល ជាពិសេសអធិការ នគរបាលខណ្ឌទាំង២រូប ត្រូវខិតខំបំពេញការងារតាមបទបញ្ជាថ្នាក់លើ តបទៅនឹងអ្វីដែលទទួលបានការតែងតាំងនេះ» ។
សូមបញ្ជាក់ថា លោកវរសេនីយ៍ទោ ហង្ស មុនី និង លោកវរសេនីយ៍ទោ ស៊ឹម ពិសិដ្ឋ បានបំពេលការងារជាង៣០ឆ្នាំមកហើយ ចាប់ពីមន្ត្រីប៉ុស្តិ៍ ប្រធានក្រុម នាយរងប៉ុស្តិ៍ នាយប៉ុស្តិ៍ និងជាអធិការរង រហូតមកដល់ពេលនេះទទួលបានតំណែងថ្មី ជាអធិការខណ្ឌ ៕