រាជធានីភ្នំពេញ ៖ កម្លាំងសមត្ថកិច្ចទើបចាប់ខ្លួនយុវជនម្នាក់ដែលតែងតែលួចចូលហ្វេសប៊ុករបស់គេរហូតដល់ជាង២០០គណនី ដើម្បីឆបោកប្រាក់តាមគ្រប់រូបភាព ក្នុងនោះមានគណនីហ្វេសប៊ុកចំនួន៥០ ដែលចាញ់បោកយុវជនម្នាក់នេះ ។
នៅថ្ងៃទី ៣០ ខែឧសភា ឆ្នាំ២០១៩ ដោយមានការបញ្ជាផ្ទាល់ពីនាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ និងដោយមានការសម្របសម្រួលពីព្រះរាជអាជ្ញារង រៀល សុភិន រួមនឹងនាយកដ្ឋានប្រឆាំងបទល្មើសបច្ចេកវិទ្យា ដឹកនាំដោយលោកឧត្តមសេនីយ៍ទោ ស៊ីវ ឈាន់ អនុប្រធាននាយកដ្ឋានប្រឆាំងបទល្មើសបច្ចេកវិទ្យា បានសហការជាមួយការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ នគរបាលប៉ុស្តិ៍ទឹកល្អក់ទី២ និងអធិការដ្ឋាននគរបាលខណ្ឌទួលគោក រួមកម្លាំងគ្នាឃាត់ខ្លួនជនសង្ស័យម្នាក់ មានឈ្មោះ គ្រួច ស៊ីឆៃ ភេទប្រុស ជនជាតិខ្មែរ សញ្ជាតិខ្មែរ កើតថ្ងៃទី ១៧ ខែឧសភា ឆ្នាំ១៩៩៧ មុខរបរមិនពិតប្រាកដ នៅត្រង់ចំណុចផ្លូវលេខ១៨២ សង្កាត់ទឹកល្អក់២ ខណ្ឌទួលគោក រាជធានីភ្នំពេញ តាមពាក្យបណ្ដឹងរបស់ជនរងគ្រោះ ពីបទលួចចូលប្រើប្រាស់គណនីហ្វេសប៊ុកអ្នកដ៏ទៃដោយគ្មានការអនុញ្ញាតិ រួចឆាតទៅខ្ចីប្រាក់ពីមិត្តភក្តិនៅក្នុងហ្វេសប៊ុក ដោយតម្រូវឲ្យផ្ញើប្រាក់តាមក្រុមហ៊ុនវេរប្រាក់ ។
ជនសង្ស័យខាងលើបានសារភាពថា ពិតជាបានលួចចូលគណនីហ្វេសប៊ុកបានប្រហែល២០០គណនី និង ជាង៥០គណនីទទួលបានប្រាក់ពីការឆបោក ។
បច្ចុប្បន្ន នាយកដ្ឋានប្រឆាំងបទល្មើសបច្ចេកវិទ្យាបានកំពុងកសាងសំណុំរឿងបញ្ជូនទៅតុលាការ ។
ឯកឧត្តម ឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានមានប្រសាសន៍ និងក្រើនរំលឹកដល់បងប្អូនប្រជាពលរដ្ឋដែលប្រើប្រាស់បណ្ដាញសង្គមហ្វេសប៊ុក ត្រូវមានការប្រុងប្រយ័ត្នក្នុងករណីដែលមានការផ្ញើសារ ខ្ចីប្រាក់តាមបណ្ដាញសង្គម ដោយឱ្យផ្ញើប្រាក់ទៅលេខដែលមិនមែនជាលេខរបស់ម្ចាស់គណនីហ្វេសប៊ុក សូមឲ្យមានការទូរស័ព្ទ (Call) ទៅបញ្ជាក់ពីម្ចាស់បណ្ដាញសង្គមហ្វេសប៊ុកអំពីការខ្ចីប្រាក់មុននឹងផ្ញើប្រាក់ឱ្យ ៕
