កណ្ដាល ៖ មានករណីផ្ទុះមីនតោនដែលកប់ក្នុងដី បណ្ដាលឲ្យផ្ទុះប៉ើងបុរសម្នាក់ កំពុងបើកត្រាក់ទ័រស៊ីឈ្នួលភ្ជួរដីស្រែឲ្យគេ រងរបួសធ្ងន់ ហើយត្រាក់ទ័ររងការខូចខាតស្ទើរតែទាំងស្រុង ។
ហេតុការណ៍ផ្ទុះមីនតោននេះ បង្កការភ្ញាក់ផ្អើលឡើងនៅវេលាម៉ោង៨និង០៥នាទីព្រឹកថ្ងៃទី៣០ ខែឧសភា ឆ្នាំ២០១៩ ស្ថិតក្នុងភូមិចំការជោ ឃុំពើក ស្រុកអង្គស្នួល ខេត្តកណ្ដាល។
មន្ដ្រីនគរបាលស្រុកអង្គស្នួល បានឲ្យដឹងថា ជនរងគ្រោះ រងរបួសធ្ងន់ មានឈ្មោះ ធី ទី ភេទប្រុស អាយុ៣៣ឆ្នាំ មុខរបរស៊ីឈ្នួលភ្ជួរដីស្រែ មានទីលំនៅភូមិត្រពាំងខ្ទឹម ឃុំព្រាល ស្រុកកញ្ជ្រាច ខេត្តព្រៃវែង ។ ចំណែកឯត្រាក់ទ័រភ្ជួរដីខូចខាតស្ទើរទាំងស្រុង ។
ប្រភពដដែល បន្ដថា នៅមុនពេលកើតហេតុ ជនរងគ្រោះខាងលើ បានបើកត្រាក់ទ័ររបស់ខ្លួន មកភ្ជួរដីស្រែឲ្យស្ត្រីចំណាស់ម្នាក់ឈ្មោះ សំអុល រស់នៅភូមិឃុំកើតហេតុ ខណៈពេលដែលកំពុងតែភ្ជួរពុំទាន់បានប៉ុន្មានផង ស្រាប់តែជនរងគ្រោះភ្ជួរប៉ះចំមីន១គ្រាប់ បណ្ដាលឲ្យផ្ទុះប៉ើងត្រាក់ទ័រ ធ្វើឲ្យជនរងគ្រោះរងរបួសធ្ងន់ រីឯត្រាក់ទ័រវិញខូចខាតស្ទើរទាំងស្រុង ។
ភ្លាមៗនោះដែរ ក៏ផ្អើលឆោឡោដល់ប្រជាពលរដ្ឋជិតខាង ក៏បានរាយការណ៍ជូនសមត្ថកិច្ច មកធ្វើការអន្ដរាគមន៍ យកជនរងគ្រោះ ទៅសង្គ្រោះបន្ទាន់ នៅឯនៅមន្ទីរពេទ្យភ្នំពេញ ។
តាមការសន្និដ្ឋានរបស់សមត្ថកិច្ចជំនាញបញ្ជាក់ថា គ្រាប់មីនតោនដែលនៅមានគុណភាព ផ្ទុះបាននេះ ប្រហែលសល់ពីសម័យសង្គ្រាម គឺជាគ្រាប់ប្រភេទប្រឆាំងរថក្រោះ ៕