កីឡា ៖ អ្នកប្រដាល់សកលកម្ពុជាដែលកើត និងធំធាត់នៅសហរដ្ឋអាមេរិក អេរីក ប៉ែន (Eric Pen) ក្លាយជាជើងឯកប្រដាល់ទំងន់ធ្ងន់ប្រចាំតំបន់អាស៊ី (WBA ASIA SOUTH ) ក្រោយផ្តួលអ្នកប្រដាល់ឥណ្ឌូនេស៊ី ត្រឹមទឹក១ប៉ុណ្ណោះ ។
អេរីក ប៉ែន អាយុ២៧ឆ្នាំ បានបំបាក់កីឡាករ Satria Antasena អោយបោះបង់ការប្រកួតត្រឹមតែទឹកទី១នៅសង្វៀនទីក្រុងហូជីមិញ ។ នេះជាការប្រកួតដណ្ដើមខ្សែក្រវាត់ ក្នុងប្រទេសវៀតណាម ប្រភេទទម្ងន់ក្រោម១០០គីឡូក្រាម ។ ការប្រកួតនេះធ្វើឡើងត្រឹម១០ទឹកប៉ុណ្ណោះ ហើយកីឡាករកម្ពុជារូពនេះ ធ្វើបានល្អឥតខ្ចោះដោយអាចផ្ដួលដៃគូត្រឹមទឹក១ប៉ុណ្ណោះ ដើម្បីបានខ្សែក្រវាត់ ជាប្រវត្តិសាស្ត្រថ្មីនេះ ។
នេះជាការបង្ហាញខ្លួនលើកទី៣ របស់កីឡាករកម្ពុជាដែលរស់នៅសហរដ្ឋអាមេរិករូបនេះ ខណៈពីរប្រកួតដំបូងផ្តួលកីឡាករថៃឱ្យសន្លប់នៅបាងកក ពោលគឺការប្រកួតរបស់គេវិញក្នុងកម្រិតអាជីព៣ដងនេះ តែងផ្ដួលដៃគូសន្លប់រហូត ។
កីឡាករ អេរីក ប៉ែន កើតនៅថ្ងៃទី៦ ខែសីហា ឆ្នាំ១៩៩២ នៅក្រុង San Jose រដ្ឋ Californa សហរដ្ឋអាមេរិក ហើយមានម្តាយជាអ្នកខេត្តកំពតដែលភៀសខ្លួនទៅនៅអាមេរិកឆ្នាំ១៩៧៩។ បច្ចុប្បន្នអេរីកហ្វឹកហាត់ប្រដាល់នៅវៀតណាម៕