ខេត្តស្ទឹងត្រែង ៖ ជនជាតិវៀតណាមចំនួន៤នាក់ ត្រូវបានកម្លាំងកងរាជអាវុធហត្ថ ស្រុកសេសាន ធ្វើការឃាត់ខ្លួន ករណីប្រើប្រាស់អាវុធខុសច្បាប់ និងធ្វើសកម្មភាពបាញ់សត្វព្រៃ និងរក្សាទុកនូវគ្រាប់កែច្នៃជាច្រើន នៅក្នុងផ្ទះ ជាបទល្មើសជាក់ស្តែង ។
ប្រជាពលរដ្ឋក្នុងភូមិ បានរាយការណ៍ថា ពួកគាត់បានឃើញជនជាតិវៀតណាម ដែលមករស់នៅក្នុងភូមិញើន ឃុំស្តៅ ស្រុកសេសាន ខេត្តស្ទឹងត្រែង មានទាំងស្រីមានទាំងប្រុស ក្នុងលំនៅដ្ឋានជាប់មាត់ទន្លេសេសាន ហើយជាទម្លាប់ញឹកញាប់ បានចេញធ្វើសកម្មភាពបរបាញ់សត្វព្រៃនៅពេលយប់ តាមតំបន់ក្នុងព្រៃអភិរក្សហាមឃាត់ ។ ក្រុមជនជាតិវៀតណាមបានប្រើប្រាស់ជាប្រភេទកាំភ្លើង យកទៅបាញ់សត្វព្រៃគ្រប់ប្រភេទ ពិសេសសត្វក្ងោក ដែលជាសត្វដ៏កម្រ ត្រូវការពារ និងអភិរក្ស តែងមានការហាមឃាត់ពីសមត្ថកិច្ច និងអាជ្ញាធរ ជំនាញនោះទេ ។
ប្រភពដដែលបានបន្តថា នៅយប់ថ្ងៃទី៣០ មេសា ២០១៩ ពួកគាត់បានឃើញក្រុមជនជាតិវៀតណាមខាងលើ បានយកកាំភ្លើង ចេញទៅបរបាញ់សត្វ ហើយគាត់ក៏បានរាយការណ៍ ជូនអាជ្ញាធរ និងសមត្ថកិច្ច ទើបនៅព្រឹកថ្ងៃទី១ ឧសភា សមត្ថកិច្ចខាងកម្លាំងកងរាជអាវុធហត្ថស្រុកសេសាន បានចុះមកឃើញសត្វព្រៃ និងកាំភ្លើង ជាមួយនិងគ្រាប់ ប្រភេទកែច្នៃជាច្រើនគ្រាប់ រហូតឈានដល់ឃាត់ខ្លួនមនុស្ស៤នាក់ភ្លាមៗ ។
សមត្ថកិច្ចអាវុធហត្ថស្រុកសេសាន បានបញ្ជាក់ នៅព្រឹកថ្ងៃនេះថា ពិតជាបានឃាត់ខ្លួនជនជាតិវៀតណាមទាំងនោះមែន ក្រោយទទួលព័ត៌មានពីប្រជាពលរដ្ឋរាយការណ៍ សមត្ថកិច្ចក៏ចុះទៅឃើញសត្វព្រៃប្រភេទទន្សាយគល់ និងកាំភ្លើង រួមជាមួយគ្រាប់កាំភ្លើងជាច្រើន ដែលពួកគេបានរក្សាទុកនៅក្នុងផ្ទះ និងជាប្រភេទគ្រាប់កែច្នៃ អាចបាញ់ជះជាអំបែង មានសារធាតុគីមីប្រឈមនឹងហានិភ័យគ្រោះថ្នាក់បំផុត ដល់អាយុជីវិត ។
បច្ចុប្បន្នជនសង្ស័យទាំងអស់ ក្នុងនោះមានស្ត្រីម្នាក់ ត្រូវបាននាំខ្លួនទៅកាន់បញ្ជាការដ្ឋាន កងរាជអាវុធហត្ថខេត្ត ដើម្បីធ្វើកំណត់ហេតុតាមនីតិវិធី ៕
