ភ្នំពេញ ៖ លោក ជា សុវណ្ណថេត ព្រះរាជអាជ្ញារងខេត្តកំពង់ធំត្រូវបាន ក្រសួងយុត្តិធម៌ បានសម្រេចចេញលិខិតផ្អាកមុខងារលោក ជា សុវណ្ណថេត ព្រះរាជអាជ្ញារង នៃអយ្យការអមសាលាដំបូង ខេត្តកំពង់ធំ ជាបណ្តោះអាសន្ន ពាក់ព័ន្ធនឹងករណីចោទប្រកាន់ពីបទ ផ្តើមគំនិតក្នុងអំពើឈូសឆាយព្រៃលិចទឹក និងព្រៃកោងកាង ។
បើយោងតាមលិខិតរបស់ ក្រសួងយុត្តិធម៌ដែលយើងទទួលបាន នៅថ្ងៃទី២៣ ខែមេសា ឆ្នាំ២០១៩ ផ្ញើជូនព្រះរាជអាជ្ញានៃអយ្យការអមសាលាដំបូងខេត្តកំពង់ធំ បានបញ្ជាក់ថា ក្រសួងយុត្តិធម៌បានទទួលនូវលិខិតចុះថ្ងៃទី១៩ ខែមេសា ឆ្នាំ២០១៩ របស់អយ្យការអមសាលាដំបូងខេត្តកំពង់ធំ ជូនដំណឹងស្តីអំពីការចោទប្រកាន់លើឈ្មោះ ជា សុវណ្ណថេត ព្រះរាជអាជ្ញារងពីបទផ្តើមគំនិតក្នុងអំពើកាប់ឆ្ការគាស់ ឈូសឆាយព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង ប្រព្រឹត្តនៅចំណុចបឹងអាត្រាព្រួល ភូមិទួលនាងសាវ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ កាលពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០១៩ បទល្មើសព្រហ្មទណ្ឌដែលមានចែងឲ្យផ្ដន្ទាទោសតាមបញ្ញត្តិមាត្រា២៨ នៃក្រមព្រហ្មទណ្ឌ និងមាត្រា៩៨ នៃច្បាប់ស្តីពីជលផល ។
ពាក់ព័ន្ធករណីនេះ អ្នកសារព័ទ៌មានយើងពុំទាន់អាចសុំការបញ្ជាក់ពីលោកព្រះរាជអាជ្ញារង ជា សុវណ្ណថេត បាននៅឡើយទេ ដោយសារទូរស័ព្ទដៃរបស់លោក ហៅចូល គ្មានអ្នកទទួល ។
សូមរម្លឹកថា ដីព្រៃលិចទឹក និងដីជម្រកត្រីពងកូនខាងលើនេះ ត្រូវបានគេបំផុសឱ្យមានចលនាចុះទៅឈូសឆាយកាលពីថ្ងៃទី១៣ ខែមេសា កន្លងទៅនេះ ។ ដីនោះដែលគេឈូសឆាយរំលោភយកនោះមានទំហំប្រមាណជា ១០ហិកតា។ចលនាឈូសឆាយទន្ទ្រានយកដីព្រៃលិចទឹក និងដីត្រីពងកូននៅជុំវិញតំបន់បឹងទន្លេសាប កំពុងមានសកម្មភាពផុលផុសខ្លាំង រហូតដល់ថ្ងៃទី១៧ ខែមេសា ឆ្នាំ២០១៩ កម្លាំងគណៈបញ្ជាការឯកភាពខេត្ត បានចុះទៅឃាត់ខ្លួនមនុស្សចំនួន០៩នាក់ រួមជាមួយគ្រឿងចក្រជាច្រើនគ្រឿង ខណៈពួកគេកំពុងធ្វើសកម្មភាពឈូសឆាយដីព្រៃលិចទឹកដែលជាសម្បត្តិរបស់រដ្ឋ ។ បច្ចុប្បន្នមនុស្សទាំងអស់នោះត្រូវបានតុលាការសម្រេចឃុំខ្លួនជាបណ្តោះអាសន្នហើយ ៕
