ភ្នំពេញ ៖ លោកជំទាវ អ៊ុងសាន ស៊ូជី មេដឹកនាំមីយ៉ាន់ម៉ា ដែលមានតួនាទីជាទីប្រឹក្សារដ្ឋមីយ៉ាន់ម៉ា និងជារដ្ឋមន្ត្រីការបរទេសមីយ៉ាន់ម៉ា នឹងបំពេញទស្សនកិច្ចផ្លូវការនៅក្នុងប្រទេសកម្ពុជា នៅចុងខែមេសា ឆ្នាំ២០១៩ នេះ ។
នេះជាដំណើរទស្សនកិច្ចផ្លូវការលើកដំបូងរបស់លោកជំទាវ អ៊ុងសាន ស៊ូជី មកកាន់ប្រទេសកម្ពុជា ចាប់តាំងពីលោកស្រី ឡើងកាន់តំណែងកំពូលរបស់ប្រទេសភូមា ចាប់តាំងពីឆ្នាំ២០១៦ ។
ក្នុងពិធីប្រគល់សញ្ញាបត្រដល់និស្សិត នៃសាកលវិទ្យាល័យជាតិគ្រប់គ្រង (NUM) នៅមជ្ឈមណ្ឌលកោះពេជ្រ នាព្រឹកថ្ងៃទី២៣ ខែមេសា ឆ្នាំ២០១៩ សម្តេចតេជោ ហ៊ុន សែន បានមានប្រសាសន៍ថា នៅថ្ងៃទី២៥ មេសា សម្តេចនឹងដឹកនាំគណៈប្រតិភូ ទៅចូលរួមវេទិកាផ្លូវមួយខ្សែក្រវាត់មួយ លើកទី២ នៅទីក្រុងប៉េកាំង ប្រទេសចិន ដោយក្នុងវេទិកានោះ ក៏មានការអញ្ជើញចូលរួមពីលោកជំទាវ អ៊ុងសាន ស៊ូជី រួមទាំងមេដឹកនាំជាច្រើនផ្សេងទៀត ។ នៅថ្ងៃទី២៩ មេសា សម្តេច និងលោកជំទាវ អ៊ុងសាន ស៊ូជី ត្រូវហោះត្រង់ពីប៉េកាំង មកកាន់ភ្នំពេញ ដោយលោកជំទាវ អ៊ុងសាន ស៊ូជី នឹងបំពេញទស្សនកិច្ចផ្លូវការ នៅកម្ពុជានៅថ្ងៃទី៣០ ខែមេសា ឆ្នាំ២០១៩ ។
សូមជម្រាបថា កាលពីអំឡុងខែកុម្ភៈ ឆ្នាំ២០១៧ កន្លងមក ប្រធានាធិបតីមីយ៉ាន់ម៉ា លោក ធិន ច ក៏បានមកបំពេញទស្សនកិច្ចនៅកម្ពុជា ក្នុងគោលបំណងពង្រឹងកិច្ចសហប្រតិបត្តិការរវាងប្រទេសទាំងពីរ ។ ហើយដំណើរទស្សនកិច្ចរបស់លោក ប្រាក់ សុខុន ទៅមីយ៉ានម៉ាកាលពីថ្ងៃទី១០-១១កក្កដា ដើម្បីឆ្លើយតបនូវទំនាក់ទំនងទ្វេភាគីលើគ្រប់វិស័យបន្ថែមទៀត ដើម្បីស្វែងរកយន្តការនានា ក្នុងការជំរុញកិច្ចសហប្រតិបត្តិការដែលមានស្រាប់ នៅក្នុងក្របខ័ណ្ឌទ្វេភាគីនិងពហុភាគីរវាងប្រទេសទាំងពីរ ៕