ខេត្តកណ្ដាល ៖ ករណីផ្ទុះធុងហ្គាសបំពាក់លើរថយន្តស៊េរីទំនើបមួយគ្រឿងម៉ាកឡិចស៊ីស LEXUS GS470 ពាក់ស្លាកលេខភ្នំពេញ 2M-8062 បណ្តាលអោយអណ្តាតភ្លើងឆាបឆេះយ៉ាងសន្ធោសន្ធៅ ធ្វើឲ្យបុរសម្នាក់ជាអ្នកបើកបររថយន្ត បានរងរបួសរលាកពេញខ្លួនយ៉ាងធ្ងន់ធ្ងរ ហើយត្រូវបានសមត្ថកិច្ចក្រុងតាខ្មៅ និងរថយន្តពន្លត់អគ្គិភ័យ២គ្រឿង ចេញមកជួយអន្តរាគមន៍ ។
ហេតុការណ៍ផ្ទុះធុងហ្គាសរថយន្តនេះ បានកើតឡើងនៅវេលាម៉ោង០១រសៀល ថ្ងៃទី១២ ខែមេសា ឆ្នាំ២០១៩នេះ នៅចំណុចផ្លូវមុខផ្សារតាខ្មៅ(ចាស់) មាត់ស្ទឹងតាខ្មៅ ក្រុងតាខ្មៅ ខេត្តកណ្ដាល ។
ប្រភពព័ត៌មានពីមន្ត្រីនៅនាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះអគ្គស្នងការនគរបាលជាតិ បានអោយដឹងថា មុនពេលកើតហេតុ គេឃើញរថយន្តរងគ្រោះកំពុងធ្វើដំណើរ តាមមាត់ស្ទឹងតាខ្មៅសុខៗស្រាប់តែផ្ទុះធុងហ្គាសរថយន្តឆេះសន្ធោសន្ធៅតែម្តង ហើយការផ្ទុះធុងហ្គាសបំពាក់លើរថយន្តស៊េរីទំនើបឡិចស៊ីសនេះ បណ្តាលអោយឆេះខូចខាតរថយន្តចំនួន២គ្រឿង មួយគ្រឿងទៀត ពាក់ស្លាកលេខកណ្តាល 2B-1385 និងម៉ូតូស្គុបពី១គ្រឿង ព្រមទាំងឆេះរាលដាលដល់ផ្ទះលក់សម្ភារក្មេងលេង (គ្រឿងជ័រ) មួយកន្លែងទៀត ។
ប្រភពដដែលអោយដឹងបន្តថា ជនរងគ្រោះមានឈ្មោះ ងន គន្ធា ភេទប្រុស ជាមន្ត្រីកងរាជអារុធហត្ថលើផ្ទៃប្រទេស មានឋាននន្តរស័ក្តិថ្នាក់វរសេនីយ៍ទោ ជាម្ចាស់រថយន្តឡិចស៊ីសGX470 របួសធ្ងន់ ត្រូវបានបញ្ជូនទៅកាន់មន្ទីពេទ្យ និងអ្នករបួលស្រាល២ទៅ៣នាក់ទៀត មិនទាន់ស្គាល់អត្តសញ្ញាណទេ បានទៅសង្គ្រោះបន្ទាន់នៅមន្ទីរពេទ្យដោយខ្លួនឯង ។
សមត្ថកិច្ច បញ្ជាក់ថា មូលហេតុ ដែលបណ្ដាលឲ្យកើតមានអគ្គិភ័យនេះ បណ្ដាលមកពីផ្ទុះហា្គស់រថយន្តឡិចស៊ីស LEXUS GS470 ។ ហើយករណីឆេះរថយន្តនេះ បានចេញរថយន្តពន្លត់អគ្គីភ័យចំនួន០២គ្រឿង ប្រើប្រាស់ទឹកអស់តែ០១គ្រឿង ស្មើនឹង៧ម៉ែត្រគូប ។
ជាការកត់សម្គាល់ ជារើយៗ គេតែងតែឃើញមានករណីផ្ទុះធុងហ្គាសទាំងនេះ បណ្តាលឲ្យខូចខាតទ្រព្យសម្បត្តិ និងរងរបួសធ្ងន់-ស្រាល រហូតដល់ពេលខ្លះ មានជនរងគ្រោះបានបាត់បង់ជីវិតថែមទៀត ផង គឺបណ្តាលមកពីកែច្នៃ រថយន្តពីប្រើសាំង ឫម៉ាស៊ូត មកប្រើហ្គាសវិញ ដែលជាមូលហេតុចម្បង នៃផ្ទុះឆេះ ដោយច្នៃខុសបច្ចេកទេសដើម ៕
