រាជធានីភ្នំពេញ ៖ បន្ទាប់ពីសារព័ត៌មាន KBN បានចុះផ្សាយនូវអត្ថបទមួយមានចំណងជើងថា «ចិនផលិតគ្រឿងបរិភោគក្លែងក្លាយ៤០មុខ ពេលប៉ូលិសចាប់ ហៅផ្កាយ៣មកឲ្យជួយ» រួចមក ពាក់ព័ន្ធរោងចក្រធុនមធ្យមមួយឈ្មោះថា«មិនវៃសៀន» ផលិតគ្រឿងឧបភោគបរិភោគក្លែងក្លាយ ត្រូវសមត្ថកិច្ចចុះបង្ក្រាប ។
នៅរសៀលថ្ងៃទី២១ មករា ២០១៨នេះ មន្ត្រីម្នាក់សុំមិនបញ្ចេញឈ្មោះ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយក្រសួងមហាផ្ទៃ បានអោយដឹងតាមរយៈទូរស័ព្ទថា ខណៈពេលដែលសមត្ថកិច្ចកំពុងចុះត្រួតពិនិត្យ ជនជាតិចិនម្ចាស់រោងចក្រ បានខលហៅជំនួយពីលោកម្នាក់ ដែលមានមុខងារជាទាហានផ្កាយបីនោះ គឺមកជួយបកប្រែភាសាចិនមកខ្មែរទេ (លោកផ្កាយបី មិនមែនមកកាងអោយថៅកែចិននោះទេ) ព្រោះលោកទាហានផ្កាយ៣ គាត់ចេះភាសាចិន ហើយកម្លាំងនគរបាលក្រសួងមហាផ្ទៃដែលចុះបង្ក្រាបនោះ អត់ចេះនិយាយចិន ថែមទាំងថៅកែជនជាតិចិន អត់ចេះអង់គ្លេសទៀត ។
ទោះជាយ៉ាងណា ក្រោយពីត្រួតពិនិត្យរួច តំណាងព្រះរាជអាជ្ញាបញ្ជា អោយផ្អាកការផលិត និងបិទទីតាំងជាបណ្តោះអាសន្ន និងកំពុងបំពេញសំណុំឯកសា នាំខ្លួនជនសង្ស័យដែលជាម្ចាស់ទីតាំង រួមទាំងជនជាតិចិនដែលពាក់ព័ន្ធ បញ្ជូនទៅកាន់តុលាការ ចាត់ការទៅតាមនីតិវិធីច្បាប់ ។
សូមបញ្ជាក់ថា ក្រោយពីត្រួតពិនិត្យឃើញថា រោងចក្រធុនមធ្យមឈ្មោះ«មិនវៃសៀន» ដែលផលិតគ្រឿងឧបភោគបរិភោគ មិនអនុលោមទៅតាមច្បាប់ស្តង់ដារ ដែលបានកំណត់ និងនៅលើសំបកវេចខ្ចប់ពុំមាន ច.ប.ផ និងសញ្ញា (CS) នោះទេ និងនៅលើសំបកវេចខ្ចប់ដាក់បាកូដប្រទេសចិន ។ មិនមានវិញ្ញាបណ្ណបត្រអនុញ្ញាតដំណើរការសិប្បកម្ម និងមិនមានវិញ្ញាបនបត្រត្រួតពិនិត្យផ្ទៀងផ្ទាត់ទំនិញនោះទេ ។
ផលិតផលការវេចខ្ចប់ខ្វះគុណភាព និងអនាម័យ មិនមានវិញ្ញាបនបត្រ បញ្ជាក់ពីគុណភាព ពីមជ្ឈមណ្ឌលមន្ទីរពិសោធឧស្សាហកម្មកម្ពុជា និងពុំមានចុះបញ្ជីម៉ាកផលិតផលនោះទេ រីឯវត្ថុធាតុដើមលួចនាំចូលពីប្រទេសចិន និងថៃគ្មានច្បាប់អនុញ្ញាត ៕