ភ្នំពេញ៖ រោងពិធីឡើងគេហដ្ឋានថ្មី មួយកន្លែងសង់រំលោភលើផ្លូវបេតុង ដែលជាចំណុចសំខាន់សំរាប់ការធ្វើចរាចរណ៍ចេញចូល របស់អ្នកភូមិ តែត្រូវបានម្ចាស់រោងសង់ បិទផ្លូវទាំងស្រុងតែម្តង នាំឲ្យមានភាពក្តៅក្រហាយ និងរិះគន់យ៉ាងខ្លាំងកាលពី ព្រឹកថ្ងៃទី១៨ ខែមករា ឆ្នាំ២០១៩ នៅចំណុចផ្លូវបេតុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ប្រជាពលរដ្ឋរស់នៅជិតនោះ បានប្រាប់ថា ហេតុអ្វីបានជាម្ចាស់ផ្ទះថ្មីនេះ ហ៊ានឲ្យគេសង់រោង បិតផ្លូវបេតុងបែបនេះ អាងតែខ្លួនមានលុយ មានអំណាច ឬក៏ផ្លូវបេតុងនេះ គាត់អ្នកចេញលុយ ហើយមើលទៅ បានជាហ៊ានធ្វើបែបនេះ ។ ពួកគាត់បន្តថា ប្រសិនជា មានអ្នកជម្ងឺឈឺធ្ងន់ធ្ងរ នៅក្នុងថ្ងៃនោះ ឬត្រូវរថយន្តសង្គ្រោះបន្ទាន់ ដឹកបញ្ជូនយកមកមន្ទីរពេទ្យ តើអ្នកជម្ងឺទៅជាយ៉ាងណា បើផ្លូវវាងវាពិបាកខ្លាំងណាស់ គឺអាចនាំឲ្យជនរងគ្រោះ បាត់បង់ជីវិត ផងដែរ។
លោក ជុំ សារ៉ាយ ចៅសង្កាត់ភ្នំពេញថ្មី បានប្រាប់ឲ្យដឹងថា រោងឡើងគេហដ្ឋានថ្មីនេះ លោកបានចេញច្បាប់អនុញ្ញាត្តិឲ្យសង់ត្រឹមតែមួយភាគបីនៃចំណីផ្លូវប៉ុណ្ណោះ ដោយឲ្យទុកចំណែកផ្លូវសល់សម្រាប់ប្រជាពលរដ្ឋក្នុងមូលដ្ឋានចេញចូលផង។
ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅរដ្ឋបាលរាជធានីភ្នំពេញ កាលពីរសៀលថ្ងៃទី១២កញ្ញា កន្លងទៅ លោកឃួង ស្រេង អភិបាលរាជធានីភ្នំពេញ បានណែនាំ និងជំរុញឲ្យអាជ្ញាធរគ្រប់ខណ្ឌ ត្រូវចាត់មន្ត្រីចុះត្រួតពិនិត្យរាល់ការសុំច្បាប់សាងសង់រោងបុណ្យ ឬរោងការណា ដែលបិទផ្លូវទាំងស្រុង គឺមិនអនុញ្ញាតឡើយ និងត្រូវជម្រុញឲ្យពួកគាត់គោរពច្បាប់ និងការណែនាំពីរដ្ឋបាលរាជធានីភ្នំពេញ ចៀសវាងមានការថ្នាំងថ្នាក់ពីប្រជាពលរដ្ឋ ។
លោកឃួង ស្រេង បានលើកឡើងថា អាជ្ញាធរមូលដ្ឋានគ្រប់ខណ្ឌ សង្កាត់ និងកម្លាំងមានសមត្ថកិច្ច ត្រូវចុះត្រួតពិនិត្យឲ្យបានជាប្រចាំ ចំពោះការសាងសង់រោងបុណ្យ រោងការ ធ្វើឲ្យមានការកកស្ទះចរាចរណ៍ ដែលប្រជាពលរដ្ឋថ្នាំងថ្នាក់ នាពេលកន្លងមកនោះ គួរម្ចាស់រោងបុណ្យ ឬរោងការ រកទីតាំងណាដែលសមស្រប មិនប៉ះពាល់ផ្លូវសាធារណៈ ដូចជា ទីអារាម តាមភោជនីយដ្ឋាន ឬទីតាំងណាដែលសមរម្យ ៕
