ភ្នំពេញ ៖ អំពើហិង្សាមួយបង្កឡើងដោយជនជាតិចិនម្នាក់ ដែលបានយកកាំបិតកាប់លើបុរសម្នាក់ មានតួនាទីជានគរបាល ចំដៃខាងស្តាំបណ្តាលឲ្យរងរបួសធ្ងន់បញ្ជូនទៅមន្ទីរពេទ្យភ្លាមៗ និងស្ត្រីជាអ្នកលក់អំពៅសាងតាមរទេះម្នាក់ទៀត ក៏រងរបួសផងដែរ ។
ជនជាតិចិនដែលយកកាំបិតកាប់ប្រហារលើនគរបាលបណ្តាលឲ្យរបួសចំដៃស្តាំ សមត្ថកិច្ចសង្ស័យថា ជាមនុស្សបែកថ្នាំញៀន ។ ទោះជាយ៉ាងណា បុរសជនជាតិចិនដែលកាន់កាំបិតប៉័ងតោ ក៏បានកាប់ខ្លួនឯងរបួសឈាមស្រោចខ្លួនផងដែរ ត្រូវសមត្ថកិច្ចសម្រេចសម្រុកចូលទៅចាប់ បណ្តាលអោយជ្រុះកាំបិតពីដៃ ហើយនាំគ្នាចូលក្រៀកចាប់ខ្លួនបានតែម្តង នៅវេលាម៉ោង០២ និង៣០នាទីរសៀលថ្ងៃទី០១ ធ្នូ ២០១៨នេះ ស្ថិតត្រង់ចំណុចផ្លូវលេខ៤៣២ ក្នុងសង្កាត់បឹងត្របែក ខណ្ឌចំការមន ។
យ៉ាងណា គេនៅមិនទាន់ស្គាល់អត្តសញ្ញាណជនជាតិចិនរូបនេះទេ ហើយក៏អត់ដឹងជននេះកើតបញ្ហាអ្វីដែរ តែគេសង្ស័យគាត់បែកថ្នាំ(គ្រឿងញៀន) ដោយបានបង្កការអុកឡុកអស់ជាច្រើនម៉ោង ទំរាំឃាត់ខ្លួនបាន ។
ស្ត្រីដែលរងរបួស ដោយសារជនជាតិចិនកាប់មានឈ្មោះ មាស សានី អាយុ៧០ឆ្នាំ មុខរបរលក់អំពៅសាង ស្នាក់នៅម្ដុំស្ពានឈើ លូទឹកស្អុយ ស្ថិតក្នុងសង្កាត់បឹងត្របែក ខណ្ឌចំការមន ។ ចំណែកមន្ត្រីសមត្ថកិច្ចដែលរងរបួសដៃ គឺលោកអនុសេនីយ៍ទោ ម៉ៅ សំណាង ដែលមន្ត្រីនគរបាលប្រចាំនៅខណ្ឌចំការមន ផ្នែកអន្តរាគមន៍ ។
គួរបញ្ជាក់ថា ប៉ូលិសម្នាក់ត្រូវជននេះកាប់ បណ្តាលឱ្យរងរបួសដៃឈាម ខណៈព្យាយាមចូលទៅឃាត់ខ្លួន មិនតែប៉ុណ្ណោះ ក៏មានស្ត្រីជាអ្នកលក់អំពៅសាងម្នាក់ទៀតរបួសដូចគ្នា និងវាយបំផ្លាញទ្រព្យទ្រសម្បត្តិរបស់ប្រជាពលរដ្ឋខូចខាតអស់ជាច្រើន ។
ស្ថិតនៅកន្លែងកើតហេតុ គឺមានការភ្ញាក់ផ្អើលដោយម្នាក់ៗ បានភ័យខ្លាចដោយសារជននេះកាន់កាំបិតដើររេរាពេញផ្លូវ និងស្រែកគំរាមកាប់គេកាប់ឯងទៀតផង ទើបត្រូវសមត្ថកិច្ចប្រើធម៌ក្តៅចូលទៅវាយលែងតដៃរួច ។
ក្រោយកើតហេតុជនសង្ស័យដែលជាជនជាតិចិននោះត្រូវបានប្រជាពលរដ្ឋដែលរស់នៅម្ដុំនោះ នាំគ្នាស្រុកចូលចាប់ ហើយត្រូវបានសមត្ថកិច្ចឃាត់ខ្លួនបញ្ចូនមន្ទីរពេទ្យរុស្ស៊ី ផងដែរ ៕