ភ្នំពេញ ៖ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី០៣ ខែតុលា ឆ្នាំ២០១៨នេះ បានស្នើទៅ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ឲ្យចាត់វិធានការផ្អាកការផ្សាយបទចម្រៀង «ភ្ជុំបិណ្ឌនឹកស្រុក» ដែលច្រៀងដោយ លោក ម៉ៅ ហាជី តារាចម្រៀងផលិតកម្មថោន ដែលបានចេញកាលពីឆ្នាំ២០១៦ ក្រោយពីពិនិត្យឃើញថា ប៉ះពាល់ដល់គោលនយោបាយរបស់រាជរដ្ឋាភិបាលកម្ពុជា ។
លោក អ៊ិត សំហេង បានប្រាប់មូលហេតុទៅកាន់រដ្ឋមន្ត្រីពីររូបទៀតថា បទចម្រៀង «ភ្ជុំបិណ្ឌនឹកស្រុក» មានឃ្លាមួយច្រៀងថា «កម្មករនិយោកជិតមិនទាន់បើកប្រាក់ខែ ក្នុងរដូវបុណ្យភ្ជុំបិណ្ឌដែលធ្វើឲ្យកម្មករនិយោជិតមិនបានទៅស្រុកកំណើតទៅលេងម៉ែ-ពុកបានត្រឹមតែស្រក់ទឹកនេត្រា ហើយបានទូរស័ព្ទប្រាប់ម៉ែ ពុកបន្ទាប់ពីភ្ជុំបិណ្ឌរួចហើយបានអាចទៅលេងស្រុកកំណើត» ។
ត្រង់អត្ថន័យនេះហើយ បានជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ យល់ថា ខុសឆ្គង ដោយផ្ទុយពីការខិតខំរបស់រាជរដ្ឋាភិបាលដែលកំពុងយកចិត្តទុកដាក់លើកម្មករនិយោជិត ។
លោក អ៊ិត សំហេង បានក្រើនរំលឹកដល់ម្ចាស់ផលិតកម្ម និងអ្នកនិពន្ធ ឲ្យមានការយកចិត្តទុកដាក់ខ្ពស់ ចំពោះការតែងនិពន្ធ ឬការសម្តែងណាដែលប៉ះពាល់ដល់គោលនយោបាយរបស់រាជរដ្ឋាភិបាល និងតម្រូវឲ្យស្ថានីយទូរទស្សន៍ ឬបណ្តាញផ្សព្វផ្សាយ បញ្ឈប់ការចាក់ផ្សាយបទចម្រៀង «ភ្ជុំបិណ្ឌនឹកស្រុក» នេះជាបន្ទាន់ ។
បទចម្រៀង«ភ្ជុំបិណ្ឌនឹកស្រុក» ក្រោមហេតុផលថា មានការប៉ះពាល់យ៉ាងខ្លាំងដល់គោលនយោបាយរដ្ឋាភិបាល បានផ្សាយមកច្រើនឆ្នាំដែរហើយ នៅលើ You tube និង Facebook រួមនិងប្រព័ន្ធផ្សព្វផ្សាយផ្សេងៗទៀត បានផ្សាយជាបន្តបន្ទាប់ អស់រយៈពេល២ឆ្នាំមកហើយនោះ ៕
