ទួកគី ៖ អ្នកស្រី ស្រួង ភាវី កីឡាការិនីស្នូកឃ័រ (ប៊ីយ៉ា) របស់កម្ពុជា បានឡើងដល់វគ្គពាក់កណ្ដាលផ្ដាច់ព្រ័ត្រ មកដល់ពេលនេះ នៅសល់តែកីឡាការិនី ៤នាក់ទេ ដែលត្រូវប្រជែងគ្នាថ្ងៃចុងក្រោយ នៃការប្រកួតកីឡាស្នូកឃ័រជើងឯកពិភពលោកនារី ២០១៨ នៅទីក្រុង IZMIR ប្រទេសទួកគី ។
កីឡាការិនី ដែលត្រូវគេគិតថា អាចលើកពានពីររូប Orie Hida មកពីជប៉ុន និង Therese Klompenhouwer មកពីហូឡង់, ជើងឯកម្ចាស់ផ្ទះ Gülsen Degener និងអ្នកចំណូលថ្មីកម្ពុជា ស្រួង ភាវី ត្រូវជួបគ្នាដើម្បីសម្រេចជើងឯក ។
ស្រួង សុភាវី ត្រូវបានគេមើលឃើញថា ជាកីឡាការិនីដៃថ្មីដ៏អាស្ចារ្យ ដែលបានចាប់ផ្តើមអាជីពកីឡានេះប្រមាណប្រាំឆ្នាំប៉ុណ្ណោះ ហើយនឹងត្រូវគេចាត់ជាអ្នកដែលមានទេពកោសល្យល្អបំផុត សម្រាប់អ្នកជំនាន់ក្រោយ ។
ពិភពលោក កំពុងរង់ចាំមើលកីឡាការិនីជម្រើសជាតិកម្ពុជារូបនេះ អាចបន្ដទម្លាក់កីឡាការិនីជើងខ្លាំងជប៉ុន, កីឡាការិនីម្ចាស់ផ្ទះទួកគី ឬ ហូឡង់ ដែលត្រូវប្រកួតវគ្គពាក់កណ្ដាលផ្ដាច់ព្រ័ត្រ នាល្ងាចថ្ងៃទី២០ ខែកញ្ញានេះបានទេ ?
