ខេត្តកំពង់ធំ ៖ រឿងកំពុងល្បីដែលអ្នកប្រើប្រាស់បណ្ដាញសង្គមហ្វេសប៊ុក បានចែកចាយបន្តគ្នា និងធ្វើការរិះគន់លើចំណារបែបអសុរោះ នៅលើលិខិតផ្លូវការរបស់ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ ផ្ញើជូនអភិបាលខេត្តកំពង់ធំ ស្តីពីបទល្មើសព្រៃឈើ ត្រូវបានលោក សុខ លូ ចារថា «ធ្វើរបាយការណ៍យឺតយ៉ាងនេះ បែបស៊ីអាចម៍មិនទាន់ឆ្កែទេមើលទៅ» ។
ក្រោយពីមានការរិះគន់ លោក សុខ លូ បានប្រាប់អ្នកសារព័ត៌មានតាមរយៈសារអេឡិចត្រូនិចថា «ខ្ញុំពិតជាមានការសោកស្តាយចំពោះបញ្ហានេះ ហើយនេះជាពិសោធន៍ក្នុងការងាររបស់ខ្ញុំ ។ ឯកសារនេះ តាំងពីឆ្នាំ២០១៧ មកម្ល៉េះ ហើយជាឯកសារផ្ទៃក្នុង(សម្ងាត់) ដែលមិនបានផ្ញើចេញក្រៅទេ ។ តាមខ្ញុំចាំ កាលណោះ រឿងនេះកើតឡើង ហើយរឿងក្តៅ តែពុំមានអ្នកណារាយការណ៍ឲ្យខ្ញុំទេ ។ ខ្ញុំបានជំរុញការដោះស្រាយ ។ ជិតពីរខែ ទើបមានរបាយការណ៍មកដល់ខ្ញុំ» ។
លោកអភិបាលខេត្តកំពង់ធំ បន្តថា «ដោយសារតែស្និទ្ធស្នាលជាមួយលោកប្រធានមន្ទីរ ខ្ញុំរាប់អានគាត់ តាំងពីគាត់ផ្លាស់មកធ្វើការនៅកំពង់ធំ ហើយធ្លាប់លេងសើចជាមួយគាត់ពាក្យហ្នឹងជាញឹកញយ ។ លោកប្រធានមន្ទីរកសិកម្មកំពុងនៅចិនជាមួយខ្ញុំ ល្ងាចនេះ បានទៅដល់ខ្មែរវិញ ។ គាត់ក៏មិនដែលឃើញឯកសារនេះដែរ ។ ខ្ញុំពិតជាមានការសោកស្តាយ សូមអរគុណ!» ។
សូមបញ្ជាក់ថា រឿងនេះបានកើតឡើងតាំងពីឆ្នាំ២០១៧ មកម្ល៉េះ ប៉ុន្តែមិនដឹងថាយ៉ាងម៉េចបានជាបែកធ្លាយលិខិតផ្លូវការដល់មហាជន ពិសេសអ្នកលេងហ្វេកប៊ុក មានអ្នកខ្លះរិះគន់ និងខ្លះទៀតក៏បានគាំទ្រចំណារមួយនេះផងដែរ ។
អ្នកខ្លះរិះគន់ថា ក្នុងនាមជាថ្នាក់ដឹកនាំ ដែលមានតួនាទីបម្រើប្រជាពលរដ្ឋ បើមន្ត្រីជាកូនចៅ ធ្វើខុសរហូតទៅហើយ មេនៅតែសម្របសម្រួល អនុគ្រោះៗ តើឲ្យប្រជាពលរដ្ឋទៅពឹងពាក់លើអ្នកណាទៅ ? នេះគឺជាលិខិតផ្លូវការ មានត្រាក្រហមត្រឹមត្រូវ ហេតុអ្វីបានជាលោកចារ ដោយប្រើប្រាស់ពាក្យអសុរោះបែបនេះទៅវិញ ? បើទោះបីជាលិខិតនេះ ជាលិខិតផ្ទៃក្នុងក៏ដោយ បើលោកចង់ប្រាប់ ឫណែនាំទៅកាន់មន្ត្រីក្រោមឱវាទ គួរតែធ្វើលិខិតផ្សេងប្រាប់ទៅកាន់បុគ្គលនោះ ហេតុអ្វីចារលើលិខិតផ្លូវការបែបនេះទៅវិញ ?
ក្នុងនោះក៏មានអ្នកគាំទ្រនឹងចំណារបែបអសុរោះ ព្រោះថា ជាក់ស្តែងករណីចុះចាប់ជនល្មើសកាប់ដើមឈើ បានកើតឡើងនៅថ្ងៃទី៥ ខែឧសភា ឆ្នាំ២០១៧ ហេតុអ្វី លោកប្រធានមន្ទីរបែរជាត្រូវប្រើពេលរហូតដល់ជិត២ខែ ដើម្បីធ្វើរបាយការណ៍ ដាក់ជូនចៅហ្វាយខេត្ត ? របាយណ៍ការយឺតយ៉ាវបែបនេះ លោកចៅហ្វាយខេត្ត គួរតែមានសិទ្ធិ ព្រោះលោកជាប្រធានគណៈបញ្ជាខេត្ត អាចស្នើសុំដកចេញពីប្រធានមន្ទីរកសិកម្មខេត្តបាន ដោយហេតុផល របាយការណ៍យឺត បូកនឹងរក្សាទុកជនល្មើសដើម្បីកៀបស៊ី ហើយនៅពេលដែលស៊ីមិនដាច់ ទើបរាយការណ៍ឲ្យចៅហ្វាយខេត្តជាក្រោយ…៕
