ខេត្តពោធិសាត់ ៖ ប្រជាពលរដ្ឋក្នុងភូមិ និងភូមិផ្សេងទៀត ក្នុងស្រុកវាលវែង នៅតែបន្តចូលព្រៃកាប់ឈើ ហើយកាប់អារច្រៀកជាកំណាត់ៗ មានទាំងឈើមូល ឈើជ្រុង ដឹកជញ្ជូនតាមម៉ូតូនិងរថយន្ត មកលក់អោយក្រុមឈ្មួញ នៅចាំទិញយ៉ាងចំហរ គ្មានខ្លាចក្រែងអាជ្ញាធរបង្ក្រាបឡើយ ។
ប្រភពពីប្រជាពលរដ្ឋសុំមិនឲ្យបញ្ចេញឈ្មោះ បានប្រាប់ឲ្យដឹងថា ក្រុមឈ្មួញសង្ស័យមានខ្នងបង្អែករឹងមាំហើយមើលទៅ បានជាហ៊ានបើកកន្លែងស្តុក ចាំប្រមូលទិញឈើ គ្រប់ប្រភេទយ៉ាងពេញបន្ទុក គ្មានឃើញមន្ត្រីជំនាញ និងសមត្ថកិច្ចពាក់ព័ន្ធណា ហ៊ានចាត់វិធានការបង្ក្រាប ។
ប្រភពដដែល បញ្ជាក់ថា ទីតាំងស្តុកឈើចាំទិញអនុផលព្រៃឈើខាងលើនេះ នៅចំណុចទួលគ្រោះ ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិសាត់ ។ នៅពេលប្រមូលទិញបានច្រើន គេនឹងដឹកជញ្ជូនចេញទៅស្រុកយួន ។
មន្ត្រីជំនាញខណ្ឌរដ្ឋបាលព្រៃឈើពោធិ៍សាត់ ក៏ដូចជាកងកម្លាំងសមត្ថកិច្ចពាក់ព័ន្ធ អ្នកសារព័ត៌មានយើង នៅមិនទាន់បានសុំការបំភ្លឺពីទីតាំងខាងលើ នៅឡើយទេ នៅរសៀលថ្ងៃទី១២ កញ្ញា ២០១៨ នេះ ។
ទោះបីជាយ៉ាងណា ប្រជាពលរដ្ឋបារម្ភថា បទល្មើសព្រៃឈើទ្រង់ទ្រាយតូចប្រព្រឹត្តឡើងដោយប្រជាពលរដ្ឋច្រើននាក់នេះ នឹងនាំឲ្យព្រៃឈើ ដែលនៅសេសសល់ នឹងត្រូវបំផ្លាញអស់ នៅពេលឆាប់ៗ ខាងមុខនេះ ៕