ភ្នំពេញ ៖ នៅរសៀលថ្ងៃទី១១ ខែកញ្ញា ឆ្នាំ២០១៨នេះ នៅស្នងការដ្ឋាននគរបាលរាជធានីភ្នំពេញ បាននិងកំពុងរៀបចំពិធីប្រកាសចូលកាន់តំណែង ស្នងការនគរបាលរាជធានីភ្នំពេញថ្មី ក្រោមអធិបតីភាព លោក ចាន់ អ៊ាន រដ្ឋលេខាធិការក្រសួងមហាផ្ទៃ និងលោក ឃួង ស្រេង អភិបាលរាជធានីភ្នំពេញ ព្រមទាំងថ្នាក់ដឹកនាំ និងមន្ត្រីពាក់ព័ន្ធមួយចាំនួនទៀត ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ ជំនួយការដឹកនាំនាយកដ្ឋាននគរបាលការពារ និងអង្គភាពតម្រួតបទបញ្ជា បានចូលកាន់តំណែងស្នងការនគរបាលរាជធានីភ្នំពេញ ជំនួសលោកនាយឧត្តមសេនីយ៍ ជួន សុវណ្ណ ជាផ្លូវការហើយ ។
សូមបញ្ជាក់ថា បន្ទាប់ពីប្រមុខរាជរដ្ឋាភិបាលកម្ពុជា ទូលថ្វាយព្រះមហាក្សត្រ ដាក់ឱ្យចូលនិវត្តន៍កាលពីថ្ងៃទី៣១ ខែសីហា ឆ្នាំ២០១៨កន្លងទៅ លោកនាយឧត្តមសេនីយ៍ ជួន សុវណ្ណ ត្រូវបានព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យ ត្រាស់បង្គាប់តែងតាំងជាអនុរដ្ឋលេខាធិការក្រសួងមហាផ្ទៃ កាលពីថ្ងៃទី៦ ខែកញ្ញា ឆ្នាំ២០១៨ ។
ព្រះមហាក្សត្រ ព្រះអង្គបានចេញព្រះរាជក្រឹត្យ ផ្ទេរភារកិច្ច និងតែងតាំងលោកនាយឧត្តមសសេនីយ៍ ជួន សុវណ្ណ ពីអនុរដ្ឋលេខាធិការក្រសួងមហាផ្ទៃមកជាអនុប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន មានឋានៈស្មើរដ្ឋមន្ត្រី ជំនួសលោកកៅ ខុនដារ៉ា ដែលត្រូវទទួលភារកិច្ចថ្មី ៕