ខេត្តបាត់ដំបង៖ បុរសម្នាក់ចំពាក់បំណុលគេវណ្ឌក ហើយត្រូវប្រពន្ធរត់ចោលទៀត ទើបធ្វើឲ្យគាត់ឈឺចុកចាប់ពេញដើមទ្រូង រហូតលែងចង់រស់ ក៏គិតខ្លីរត់ទៅចងកសម្លាប់ខ្លួន បង្កឲ្យភ្ញាក់ផ្អើលឡើង កាលពីវេលាម៉ោង៩ និង៣០នាទីព្រឹក ថ្ងៃទី៣១ ខែសីហា ឆ្នាំ២០១៨ នៅត្រង់ចំណុចអូរចម្លងស្នេហ៍ ស្ថិតក្នុងភូមិដីល្អ ឃុំអូររំដួល ស្រុកភ្នំព្រឹក។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវគ្រោះអកុសលនោះ ជនរងគ្រោះ និងប្រពន្ធរបស់គាត់បានជំពាក់បំណុលគេវណ្ឌក។ លុះក្រោយមក ប្រពន្ធបានរត់ចោលគាត់ថែមទៀត ទើបធ្វើឲ្យជនរងគ្រោះកើតទុក្ខរីងរៃ គិតតែពីដើរផឹកស្រា ដើម្បីបំបាត់ទុក្ខ។ តែទោះជាគាត់ស្រវឹងយ៉ាងណា ក៏គាត់នៅតែមិនអាចបំបាត់នូវការឈឺចុកចាប់បានដដែល។ រីឯសាច់ញាតិក៏ចេះតែនិយាយលួងលោមគាត់ដែរ តែនៅពេលសាច់ញាតិភ្លេចខ្លួន ស្រាប់តែជនរងគ្រោះបានរត់ទៅចងកសម្លាប់ខ្លួន។
មន្ត្រីនគរបាលស្រុកភ្នំព្រឹក បានឱ្យដឹងថា ជនរងគ្រោះ ឈ្មោះ រស់ គង់ អាយុ៥៣ឆ្នាំ មុខរបរជាអ្នកធ្វើចម្ការ រស់នៅភូមិ-ឃុំខាងលើ។ ជនរងគ្រោះបានយកខ្សែគោមកចងកសម្លាប់ខ្លួន នៅលើដើមឈើខាងក្រោយផ្ទះ។
ក្រោយពេលកើតហេតុ សមត្ថកិច្ចបានចុះទៅពិនិត្យ និងធ្វើកោសល្យវិច័យ រួចហើយបញ្ជាក់ថា ជនរងគ្រោះពិតជាបានចងកសម្លាប់ខ្លួនប្រាកដមែន។ បន្ទាប់មក សមត្ថកិច្ចក៏បានធ្វើកំណត់ហេតុប្រគល់សាកសពជូនសាច់ញាតិ ចាត់ចែងធ្វើបុណ្យតាមប្រពៃណី៕
