ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៃព្រះរាជាណាចក្រកម្ពុជា នៅក្នុងឱកាសជួបសំណេះសំណាលជាមួយកម្មករជិត២ម៉ឺននាក់ នៅក្នុងភូមិព្រែកត្រែង២ ឃុំសំរោងធំ ស្រុកកៀនស្វាយ ខេត្តកណ្ដាល បានផ្ញើសារនយោបាយដ៏សំខាន់មួយថា មានអ្នកកំពុងជាប់ពន្ធគារចំនួន១២នាក់ ដែលជាសកម្មជនអតីតគណបក្សប្រឆាំង អាចនឹងត្រូវដោះលែងពីពន្ធនាគារ ព្រោះខណៈនេះ រដ្ឋមន្ត្រីក្រសួងយុត្តិធម៌កំពុងតែពិនិត្យមើលសំណុំរឿង ដោយសារអ្នកទាំងនោះបានសរសេរលិខិតស្នើសុំលើកលែងទោសរួចហើយ។
សម្តេចតេជោ បានបញ្ជាក់ថា ការលើកលែងទោស និងដោះលែងអ្នកជាប់ឃុំមួយចំនួន កាលពីពេលថ្មីៗនេះ គឺដោយសារតែក្តីមានការសន្តោសប្រណីរបស់នាយករដ្ឋមន្ត្រី។ ប៉ុន្តែកុំយល់ច្រឡំឲ្យសោះថា ការដោះលែងនោះ គឺដោយសារតែមានសម្ពាធពីបរទេស ដោយសម្តេចបញ្ជាក់ថា«សុំកុំនិយាយថា វាមកពីសម្ពាធបរទេស ខ្ញុំស្អប់ខ្លាំងណាស់ពាក្យហ្នឹង» ។
សម្តេចតេនាយករដ្ឋមន្ត្រី បានមានប្រសាសន៍បន្ថែមទៀតថា អ្នកជាប់គុកទាំង១២នាក់នោះ អាចនឹងត្រូវដោះលែង តែបើអ្នកនៅក្រៅ (អតីតមេដឹកនាំអតីតគណបក្សសង្គ្រោះជាតិ លោក សម រង្ស៊ី) ដែលកំពុងតែរត់គេចខ្លួននៅក្រៅប្រទេស ចោទប្រកាន់ថា ការដោះលែងថ្មីៗនេះ គឺដោយសារតែសម្ពាធពីបរទេសនោះ វាសនារបស់អ្នកដែលកំពុងជាប់ឃុំ១២នាក់ អាចនឹងត្រូវបន្ត រស់នៅក្នុងគុកបន្តទៀត។ ករណីនេះអាចនឹងតម្រូវឲ្យអ្នកជាប់ឃុំត្រូវសរសេរលិខិតសុំលើកលែងទោសជាថ្មីម្តងទៀត ហើយលោក សម រង្ស៊ី ក៏ត្រូវធ្វើលិខិតបញ្ជាក់ផងដែរថា ការដោះលែង ឬលើកលែងទោស មិនពាក់ព័ន្ធនឹងសម្ពាធ ឬដោយសារតែការគាបសង្កត់ពីបរទេសនោះទេ។
នៅក្នុងឱកាសនោះដែរ សម្តេចតេជោ ហ៊ុន សែន បានផ្តាំផ្ញើដល់អ្នកនៅក្រៅប្រទេសថា អ្នកហាក់មិនសោកស្តាយ អ្នកកំពុងជាប់ពន្ធនាគារថា ពួកគេធ្លាប់រួមប្រព្រឹត្តបទល្មើសជាមួយរូបគាត់។ ដូច្នេះកុំនិយាយពាក្យណាមួយដែលអាចធ្វើឲ្យអ្នកទាំងនោះ ត្រូវបន្តជាប់ពន្ធនាគារអី។
សម្តេចនាយករដ្ឋមន្ត្រី បានបន្តថា ការលើកលែងទោស និងដោះលែងក្រៅឃុំកន្លងមក គឺមកពី «អំពើសន្ដោសប្រណីរបស់ខ្ញុំ និងការអនុវត្តនូវច្បាប់ពន្ធនាគារ» នៅកម្ពុជា។ ជាមួយគ្នានេះ សម្តេចនាយករដ្ឋមន្ត្រីក៏បានសើចចំអកទៅលើអតីតថ្នាក់ដឹកនាំអតីតគណបក្សប្រឆាំង ដែលរិះគន់ថា សម្តេចប្រើអំណាច ក្នុងការដោះលែងមនុស្សមួយចំនួនថ្មីៗនេះ ដោយសម្តេចបញ្ជាក់ថា ពិតណាស់ គឺអំណាចមានតែសម្តេច គឺនៅលើចុងប៊ិករបស់នាយករដ្ឋមន្ត្រី ជាអ្នកស្នើសុំនូវការលើកលែងទោសទៅថ្វាយព្រះមហាក្សត្រ សម្រាប់អ្នកណាដែលសាលក្រមចូលជាស្ថាពរ។ ដូច្នេះព្រះមហាក្សត្រ ព្រះអង្គមានអំណាចថា លើកលែងទោសតាមការស្នើសុំរបស់នាយករដ្ឋមន្ត្រី ឬអត់? ដូច្នេះសម្តេចសូមផ្តាំផ្ញើទៅអ្នកដែលត្រូវបានដោះលែងផងថា កុំនិយាយអ្វីដែលធ្វើឲ្យប៉ះពាល់ដល់សិទ្ធិរបស់អ្នកដទៃ ព្រោះពួកគេអាចត្រូវប្រឈមមុខ ឬត្រូវចាប់ខ្លួនវិញ។
ដោយឡែក លោក ម៉ាក ហ្វៀល (Mark Field) អនុរដ្ឋមន្ត្រីការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក បានសម្ដែងនូវក្តីសង្ឃឹមថា កម្ពុជានឹងបន្តដោះលែងអ្នកនយោបាយរបស់បក្សប្រឆាំងឲ្យមានសេរីភាពឡើងវិញ ដូចអ្វីដែលបានឃើញជាក់ស្តែងនាពេលថ្មីៗនេះ ដូចជាការដោះលែងអតីតអ្នកកាសែត២នាក់ និងសកម្មជនដីធ្លីជាដើម។ លោក ម៉ាក ហ្វៀល (Mark Field) បានថ្លែងយ៉ាងដូច្នេះ នៅក្នុងសន្និសីទសារព័ត៌មានមួយ កាលពីរសៀល ថ្ងៃទី២២ ខែសីហា ឆ្នាំ២០១៨ ម្សិលមិញ បន្ទាប់ពីលោកបានជួបជាមួយសម្ដេច ហ៊ុន សែន រយៈពេលជាងមួយម៉ោង នៅក្នុងវិមានសន្តិភាព។
លោក ម៉ាក ហ្វៀល (Mark Field) អនុរដ្ឋមន្ត្រីការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក បានថ្លែងប្រាប់អ្នកកាសែត នៅក្នុងសន្និសីទសារព័ត៌មាន ក្នុងដំណើរទស្សនកិច្ច រយៈពេល២ថ្ងៃ នៅកម្ពុជា ថា បញ្ហានយោបាយនៅកម្ពុជា គឺជាកង្វល់ដ៏ធំមួយ។ បញ្ហានេះ លោកបានលើកឡើង នៅចំពោះមុខរបស់សម្ដេច ហ៊ុន សែន ដោយត្រង់ទៅត្រង់មក ក្នុងនាមប្រទេសជាមិត្តដែលមានទំនាក់ទំនងគ្នាល្អខាងពាណិជ្ជកម្ម។ ផ្អែកតាមតួលេខ អង់គ្លេស គឺជាប្រទេសវិនិយោគធំជាងគេទី៦ នៅកម្ពុជា និងជាទីផ្សារដ៏ធំជាងគេទី៤ ខាងការនាំចេញទំនិញពីកម្ពុជា។
លោក អនុរដ្ឋមន្ត្រីការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក រូបនេះ បានកត់សម្គាល់ថា ក្រោយពេលអង់គ្លេសបានបង្ហាញពីកង្វល់ចំពោះបញ្ហានយោបាយ នៅកម្ពុជា ដោយត្រង់ទៅត្រង់មកជាងមួយម៉ោង លោកទទួលបានសញ្ញាល្អពីសម្ដេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ដូច្នេះលោកសង្ឃឹមថា សម្ដេច ហ៊ុន សែន នឹងធ្វើសញ្ញាវិជ្ជមាននេះ កើតឡើង ក្នុងរូបភាពជាក់ស្តែង។ រូបភាពជាក់ស្តែងដែលមន្រ្តីការទូតជាន់ខ្ពស់រូបនេះសំដៅដល់ គឺការដោះលែង លោក កឹម សុខា និងអ្នកនយោបាយរបស់បក្សប្រឆាំងឲ្យមានសិទ្ធិ ធ្វើនយោបាយឡើងវិញ ដូចជាការដោះលែងអតីតអ្នកកាសែតរបស់វិទ្យុអាស៊ីសេរីចំនួន២រូប និងសកម្មជនដីធ្លី អ្នកស្រី ទេព វន្នី។
ទោះជាយ៉ាងណា លោកអនុរដ្ឋមន្ត្រីការបរទេសចក្រភពអង់គ្លេស ទទួលបន្ទុកកិច្ចការអាស៊ី និងប៉ាស៊ីហ្វិក រូបនេះ បានបានបញ្ជាក់នូវជំហរជាថ្មីម្តងទៀតថា ចក្រភពអង់គ្លេសចង់ឃើញនូវការអនុវត្តបើកចំហឡើងវិញជាក់ស្តែងនូវសេរីភាពនយោបាយ សេរីភាពបញ្ចេញមតិ និងសេរីភាពសារព័ត៌មានជាដើម។
ជុំវិញនឹងលទ្ធផល នៃការបោះឆ្នោតដែលគណបក្សប្រជាជនកម្ពុជាឈ្នះអាសនៈទាំងអស់នោះ លោក Mark Field មិននិយាយអ្វីច្រើនទៀតទេ ពីព្រោះមាននៅក្នុងសេចក្តីថ្លែងការណ៍របស់ក្រសួងការបរទេសអង់គ្លេស នាពេលកន្លងមករួចស្រេចទៅហើយ។ នៅក្នុងសេចក្តីថ្លែងការណ៍នោះ អង់គ្លេសបានសម្តែងនូវការមិនពេញចិត្តចំពោះការបោះឆ្នោតជាតិ នៅកម្ពុជា ព្រោះអង់គ្លេសយល់ថា ការបោះឆ្នោតនោះមិនអាចជឿទុកចិត្តបាន ព្រោះគ្មានការចូលរួមពីអតីតបក្សប្រឆាំង និងមេដឹកនាំអតីតបក្សសង្គ្រោះជាតិ ដែលកំពុងជាប់នៅក្នុងពន្ធនាគារ៕