Zhao Wei បានធ្វើឱ្យទស្សនិកជនមានការចាប់អារម្មណ៍យ៉ាងច្រើនបន្ទាប់ពីរូបនាងបង្ហាញខ្លួននៅប្រទេសសិង្ហបុរីកាលពីថ្ងៃទី ២០ ខែតុលា ឆ្នាំ ២០២៦ ដើម្បីចូលរួមកម្មវិធីមួយរបស់អ្នកជំនាញរចនាម៉ូតសក់ Kim Robinson។ នេះជាការបង្ហាញខ្លួនក្នុងកម្មវិធីសាធារណៈដ៏កម្ររបស់នាងបន្ទាប់ពីបាត់មុខពីឆាកកម្សាន្តអស់រយៈពេលប្រហែល ៥ ឆ្នាំ។
រូបរាងរបស់ Zhao Wei ក៏បានក្លាយជាប្រធានបទជជែកវែកញែកលើបណ្ដាញសង្គមដូចគ្នាដោយនាងបានបង្ហាញខ្លួនជាមួយសក់ពណ៌ត្នោតលាយមាស កាត់ប្រវែងត្រឹមស្មា ពាក់អាវក្រឡាការ៉ូឆ្នូត និងសំពត់ពណ៌ស្រាល។ អ្នកគាំទ្រមួយចំនួនបានសរសើររូបរាងធម្មជាតិរបស់នាង ខណៈអ្នកផ្សេងទៀតបានកត់សម្គាល់ពីការផ្លាស់ប្ដូររូបរាងក្រោយមិនសូវបង្ហាញខ្លួនជាសាធារណៈអស់ជាច្រើនឆ្នាំ។
ក្នុងបទសម្ភាសន៍តួអង្គព្រះនាងត្រចៀកកាំ បាននិយាយថាបច្ចុប្បន្ននាងមានអារម្មណ៍សប្បាយរីករាយ ហើយកំពុងផ្ដោតលើការងារនៅពីក្រោយកាមេរ៉ា ដូចជាការសរសេរសាច់រឿង និងសាកល្បងប្រើបច្ចេកវិទ្យា AI ក្នុងការផលិតស្នាដៃភាពយន្តនិងទូរទស្សន៍។ នៅពេលត្រូវបានសួរអំពីការវិលត្រឡប់មកសម្ដែងវិញ នាងបានឆ្លើយតបដោយស្នាមញញឹមថាបើនឹកការសម្ដែង ក៏អាចមើលរឿងចាស់ៗឡើងវិញបានដែរ។ ចម្លើយនេះបង្ហាញថានាងមិនទាន់ប្រកាសផែនការវិលត្រឡប់មកសម្ដែងជាផ្លូវការនៅឡើយទេ។
គួរបញ្ជាក់ថា Zhao Wei បានបាត់មុខពីវិស័យកម្សាន្តចិនចាប់តាំងពីឆ្នាំ ២០២១ នៅពេលស្នាដៃមួយចំនួនដែលនាងបានចូលរួមត្រូវបានដកចេញពីវេទិកាអនឡាញ។ ទោះបីមានការប៉ាន់ស្មានជាច្រើនអំពីស្ថានភាពរបស់នាងក៏ដោយ មូលហេតុពេញលេញមិនត្រូវបានអាជ្ញាធរបញ្ជាក់ជាសាធារណៈទាំងស្រុងទេ។ ការបង្ហាញខ្លួននៅសិង្ហបុរីលើកនេះក៏បានធ្វើឱ្យមានការចាប់អារម្មណ៍ឡើងវិញចំពោះពាក្យចចាមអារ៉ាមពីមុនអំពីការហាមឃាត់ការធ្វើដំណើររបស់នាងដែលមិនមានការបញ្ជាក់ជាផ្លូវការច្បាស់លាស់៕
