កម្មវិធី Miss Asia Pacific International 2026 រងការប្រតិ.កម្មពីអ្នកគាំទ្រមួយចំនួននៅកម្ពុជា

កម្មវិធី Miss Asia Pacific International 2026 ដែលធ្វើឡើងនៅប្រទេសហ្វីលីពីនបានធ្វើឱ្យអ្នកលេងបណ្តាញសង្គមកម្ពុជាមួយចំនួនបង្ហាញការមិនពេញចិត្តនិងចោទប្រកាន់ថាអ្នករៀបចំកម្មវិធីហាក់ដូចជាប្រព្រឹត្តមិនយុត្តិធម៌ចំពោះអ្នកតំណាងកម្ពុជាគឺបវរកញ្ញា រី ស្រីនេត។

ភាពចម្រូងចម្រាសក្នុងចំណោមអ្នកតាមដានវិស័យបវរកញ្ញាបានចាប់ផ្តើមក្រោយពីផេករបស់ Miss Asia Pacific International ពុំបានបង្ហោះរូបភាពរបស់ រី ស្រីនេត Miss Asia Pacific Cambodia 2026 ក្នុងពេលដែលនាងទៅដល់ទឹកដីនៃការប្រកួតនៅឯហ្វីលីពីនឡើយ។ ផ្ទុយទៅវិញអ្នកតំណាងថៃដែលហៀបនឹងធ្វើដំណើរមកកាន់ហ្វីលីពីន ស្រាប់តែផេករបស់កម្មវិធីនេះបានបង្ហោះបវរកញ្ញាថៃនិងជូនពរឱ្យនាងមានសុខសុវត្ថិភាពក្នុងការធ្វើដំណើរ។

សកម្មភាពនេះហើយបានជំរុញឱ្យអ្នកតាមដានវិស័យបវរកញ្ញាកម្ពុជាមួយចំនួនស្រងាកចិត្តយ៉ាងខ្លាំងនិងចោទប្រកាន់កម្មវិធីនេះថាលម្អៀង យល់ចិត្តយល់ថ្លើមប្រទេសថៃ។ អ្នកមួយចំនួនថែមទាំងទប់កំហឹងកុំឱ្យមានភាពចម្រូងចម្រាសខ្លាំងលើករណីនេះដើម្បីកុំឱ្យមានពាក្យចោទប្រកាន់ថាអ្នកគាំទ្រកម្ពុជា TOXIC ឬ Drama នាំឱ្យប៉ះពាល់ដល់ រី ស្រីនេត ដែលកំពុងឈរតំណាងកម្ពុជាប្រកួតនៅលើឆាកអន្តរជាតិ។ មតិខ្លះទៀតថែមទាំងនិយាយថានៅពេលកម្មវិធីនេះចប់ពេលណាពួកគេនឹងព្រលះកម្មវិធី Miss Asia Pacific International ។

គួរបញ្ជាក់ផងដែរថាកម្មវិធី Miss Asia Pacific International គឺជាកម្មវិធីមួយដែលមានការរៀបចំ តាំងពីយូរណាស់មកហើយដោយឈ្មោះដំបូងនៃកម្មវិធីនេះគឺ « Miss Asia Quest» ដែលរៀបចំឡើងក្នុងឆ្នាំ១៩៦៨ ដោយផ្តោតលើបេក្ខនារីមកពីតំបន់អាស៊ី និងអូសេអានី។ នាពេលនោះកម្មវិធីនេះមិនមែនផ្តោតតែលើសម្រស់ទេ ប៉ុន្តែពាក់ព័ន្ធនឹងការលើកកម្ពស់ ទេសចរណ៍ សន្តិភាព មិត្តភាព និងទំនាក់ទំនងរវាងប្រទេសផងដែរ។ ការប្រើឈ្មោះដូចបច្ចុប្បន្ននេះគឺចាប់ផ្តើមឡើងនៅឆ្នាំ២០០៥ ហើយកម្មវិធីនេះក៏មានការផ្អាកជាច្រើនឆ្នាំផងដែរមុននឹងដំណើរការឡើងវិញក្នុងឆ្នាំ២០១៦។ គោលដៅរបស់កម្មវិធីរួមមានការផ្តល់វេទិកាឱ្យស្ត្រីអភិវឌ្ឍជំនាញ ទំនុកចិត្ត ភាពជាអ្នកដឹកនាំ និងការចូលរួមក្នុងសហគមន៍អន្តរជាតិ។

គួរជម្រាបជូនថា វគ្គផ្តាច់ព្រ័ត្រក្នុងកម្មវិធី Miss Asia Pacific International 2026 នឹងប្រព្រឹត្តទៅនៅថ្ងៃទី១០ ខែតុលា ឆ្នាំ២០២៦៕