មេរៀនមួយដែល អាង សុជាតា រៀនពីម្តាយក្នុងការទុកដាក់លុយកាក់

ដើម្បីឱ្យកូនយល់ដឹងក្នុងការទុកដាក់លុយកាក់ពីការចំណាយនៅក្នុងគ្រួសារនិងការរកចំណូលបានតារាសម្តែង សឿន ផានផាភួង បានផ្តល់មេរៀនមួយដល់កូនស្រីខ្លួនគឺ អាង សុជាតា ដោយប្រគល់លុយទាំងអស់ឱ្យនាងជាអ្នកកាន់កាប់។ អាង សុជាតា ថានេះគឺជាអ្វីដែលម្តាយរបស់នាងបានបង្រៀននាងឱ្យយល់ដឹងខ្លាំងក្នុងការទទួលខុសត្រូវនិងការរ៉ាប់រងក្នុងគ្រួសារ។

ថ្មីៗនេះ អាង សុជាតា និងម្តាយគឺតារាសម្តែង សឿន ផានផាភួង បានចូលរួមក្នុងកម្មវិធីផតខាស់ដោយចែករំលែកពីបទពិសោធន៍ទាំងជីវិតផ្ទាល់ខ្លួននិងការងារសិល្បៈស្របពេលសម្ព័ន្ធភាពអ្នកទាំងពីរស្និទ្ធស្នាល បង្អាប់គ្នាលេងនៅលើបណ្តាញសង្គមប្រៀបដូចជាមិត្តស្និទ្ធស្នាល។ ក្នុងនោះ អាង សុជាតា ក៏បានលើកចំណុចមួយដែលម្តាយរបស់នាងបានបង្រៀននាងឱ្យយល់ដឹងខ្លាំងគឺការគ្រប់គ្រងលុយកាក់។

តារាសម្តែងវ័យក្មេងរូបនេះបាននិយាយថាកាលពីមុនម្តាយរបស់នាងមិនបានបើកគណនីធនាគារនោះទេដោយបើកឱ្យនាងតែម្នាក់ប៉ុណ្ណោះដូច្នេះរាល់ការងារនិងចំណូលដែលម្តាយរកបានពីការថតស្ថិតនៅក្នុងកុងធនាគាររបស់នាងទាំងអស់។ នាពេលនោះនាងក៏ឆ្ងល់ដូចគ្នាថាហេតុអ្វីបានជាម្តាយឱ្យនាងកាន់លុយសុខចិត្តមានតម្រូវការអ្វីប្រាប់នាងវិញរហូតចុងក្រោយនេះទើបនាងបានយល់ពីការចំណាយនៅក្នុងផ្ទះ។ អាង សុជាតា ថាទោះបីជានាងចង់ព្រហើនចាយខ្លាំងក៏មិនបានដែរដោយសារតែដឹងពីការចំណាយនៅក្នុងគ្រួសារដែលម្តាយបានបង្រៀនហើយ។

ជាមួយគ្នានេះអ្នកនាង សឿន ផានផាភួង បាននិយាយថាការដែលខ្លួនឱ្យ អាង សុជាតា ជាអ្នកកាន់លុយគឺដើម្បីឱ្យកូនស្រីដឹងថាក្នុងមួយខែៗចំណាយលុយអស់ប៉ុន្មាន ចំណាយលើអ្វីខ្លះដើម្បីកុំឱ្យកូនស្រីគិតថារកចំណូលបានប៉ុន្តែមិនឃើញសាច់ប្រាក់ មិនឃើញសល់អ្វីសោះទាំងនាងខំរកលុយឱ្យម្តាយរហូតដូច្នេះទើបឱ្យ អាង សុជាតា ជាអ្នកទុកដាក់លុយខ្លួនឯងដើម្បីដឹងថាពួកគេចំណាយអ្វីខ្លះអ្វីនៅក្នុងគ្រួសារ៕