នៅលើបណ្តាញសង្គមទិកតុកបានលេចធ្លាយនូវសំឡេងសារដ៏ក្តៅគគុកដែលចោទប្រកាន់ទៅលើ ឡូរីន មានជម្លោះពាក្យសម្តីជាមួយនឹង ឡូឡា នៅឯក្លិបកម្សាន្ត។ ការរីករាលនៃសំឡេងនេះបានជំរុញឱ្យអ្នកគាំទ្ររបស់ ឡូរីន បានឆាតទៅសួរនាងផ្ទាល់ហើយបានបញ្ជាក់ថានោះមិនមែនជាការពិតឡើយគ្រប់យ៉ាងគ្រាន់តែជាការយល់ច្រឡំនិងបានដោះស្រាយគ្នាដោយសន្តិវិធី ខណៈ ឡូរីន អះអាងថាមិនឈ្លោះគ្នាដោយសារតែមនុស្សប្រុសណាទាំងអស់។
ភាពចម្រូងចម្រាសរវាង វណ្ណដា ឡូឡា និង ឡូរីន បានធ្វើឱ្យបណ្តាញសង្គមផ្ទុះកក្រើកនិងមានការពិភាក្សាយ៉ាងច្រើនជុំវិញទំនាក់ទំនងស្នេហាតារាៗ។ អ្វីដែលធ្វើឱ្យរឿងនេះកាន់តែរសើបថែមទៀតគឺមានសំឡេងបែកធ្លាយមួយដែលបង្កឱ្យរឿងចម្រូងចម្រាសកាន់តែខ្លាំងដោយសំឡេងនោះសំដៅដល់ ឡូរីន និង ឡូឡា ធ្លាប់ប៉ះទង្គិចគ្នា។ សំឡេងដែលកំពុងមានការចែកចាយលើបណ្តាញសង្គមបាននិយាយចោទប្រកាន់ថា ឡូរីន បានទាញដៃ ឡូឡា ទៅជេរនៅមុខក្លិបកម្សាន្ត ជាមួយពាក្យសម្តីមិនសមរម្យ ខណៈរឿងនេះបានកើតឡើងជាយូរមកហើយ។
យ៉ាងណាមិញ បន្ទាប់ពីសំឡេងសារនោះបែកធ្លាយនៅលើអ៊ីនធឺណិតអ្នកលេងបណ្តាញសង្គមភាគច្រើនពុំជឿលើសម្តីដែលគ្មានប្រភពច្បាស់លាស់នោះទេ។ ទន្ទឹមនឹងការសង្ស័យថា ឡូរីន ប្រព្រឹត្តមិនល្អអ្នកគាំទ្ររបស់ស្រីស្អាតរូបនេះបានឆាតសួរដោយភ្ជាប់ទៅកាន់គណនីអ៊ីនស្រ្តាក្រាមរបស់ ឡូរីន។
នៅក្នុងសារឆ្លើយឆ្លងរវាងអ្នកគាំទ្រ និង ឡូរីន បានបង្ហាញថាមិនបានឈ្លោះគ្នាដោយសារប្រុសណាទាំងអស់ហើយពាក្យសម្តីមិនល្អ និងអសុរោះ មិនមាននៅក្នុងការសន្ទនារបស់នាងនោះទេ។ ឡូរីន បញ្ជាក់ទៀតថាពួកគេទាំងពីរបានដោះស្រាយដោយសន្តិវិធីនិងបានសូមទោសគ្នាទាំងសងខាងរួចទាំងចាប់ដៃគ្នា ខណៈរឿងនេះបានបញ្ចប់មកជាយូរហើយ។ 
នៅក្នុងនោះ ឡូរីន បានបញ្ជាក់ថាពួកគេមានការយល់ច្រឡំចំពោះគ្នានិងបាននិយាយគ្នាដោយធម្មតាដោយមិនបានប្រើអំពើហិង្សាណាមួយឡើយ។ គួរឱ្យដឹងថាការសន្ទនានេះគឺមានការអនុញ្ញាតពី ឡូរីន ក្នុងការបង្ហោះដោយនាងចង់បង្ហាញអ្វីដែលជាការពិតជុំវិញពាក្យចចាមអារ៉ាមមិនពិតដែលកំពុងរីករាលដាលផងដែរ៕
