ថៃស្នើកម្ពុជាកុំយកភស្តុតាងដែលថៃឈ្លានពានទៅបង្ហាញអន្តរជាតិ ត្រូវពិភាក្សាគ្នាជាមួយថៃមុនសិន

នាយក JIC ថៃ លោក Prapas Sonjaidee បានបង្ហាញភាពស្លន់ស្លោ និងទទូចសុំឱ្យកម្ពុជាកុំយកភស្តុតាងទៅបង្ហាញប្រាប់ពិភពលោក ដោយត្រូវយកវាមកពិភាក្សាគ្នាទ្វេភាគីជាមួយថៃជាមុនសិន។
____________
ក្រឡាស់សម្តី ១៨០ ដឺក្រេ! ប៉ុន្មានថ្ងៃមុនប្រកាសក្ដែងថាត្រៀមបង្ហាញរូបភាពពីផ្កាយរណប និងភស្តុតាងលើរឿងមីនមកដាក់សម្ពាធកម្ពុជាកុំឲ្យតវ៉ា និងចង់ឱ្យកម្ពុជាខ្មាសគេលើឆាកអន្តរជាតិ ឥឡូវស្រាប់តែក្រឡាស់សំដីថា ប្រសិនបើកម្ពុជាមានភស្តុតាងអ្វីពាក់ព័ន្ធនឹងសកម្មភាពឈ្លានពានរបស់ថៃ កម្ពុជាត្រូវយកមកពិភាក្សាគ្នាលក្ខណៈទ្វេភាគីជាមុនសិន មិនគួរប្រញាប់យកទៅបង្ហាញទៅកាន់វេទិកាអន្តរជាតិ ឬទៅកាន់ពិភពលោកឡើយ។ របត់សម្ដីគ្មានជំហរច្បាស់លាស់នេះ បានបង្កើតជាសំណួរចោទថា តើថៃគិតថាកម្ពុជាងាយស្រួលបង្វិលបានតាមចិត្តមែនទេ?

យោងតាមសេចក្ដីរាយការណ៍ពីទីភ្នាក់ងារសារព័ត៌មានថៃ កាលពីថ្ងៃសុក្រ ទី១១ ខែកញ្ញា ឆ្នាំ២០២៦ ម្សិលមិញនេះ នាយកមជ្ឈមណ្ឌលព័ត៌មានរួម (JIC) លោក Praphas Sonjaidee បានចេញមុខផ្ដល់បទសម្ភាសន៍បែបដេញជើង និងបង្វែរដានការទូតយ៉ាងដុតដៃដុតជើងនៅក្នុងការថ្លែងការណ៍នោះ លោកបានព្យាយាមបន្ទន់ឥរិយាបថ និងស្នើឱ្យភាគីកម្ពុជាកុំទាន់អាលយកភស្តុតាងជាក់ស្តែងនៅលើដី ទៅលាតត្រដាងនៅចំពោះមុខសហគមន៍អន្តរជាតិ តែត្រូវរក្សាទុកដើម្បីចរចាជាមួយថៃដោយស្ងាត់ៗវិញ។ ជាងនេះទៅទៀត លោកថែមទាំងបានប្រើប្រាស់លេសដោះសារបែបយោធាថា វត្តមានរបស់កងទ័ពថៃដែលលួចចូលមកបោះទីតាំង និងព័ទ្ធរបងលួសបន្លានៅលើដីអធិបតេយ្យភាពកម្ពុជាកន្លងមក គឺគ្រាន់តែជាការបង្កើនសន្តិសុខបណ្តោះអាសន្ន និងមិនមែនជាចេតនាឈ្លានពាន ឬចង់កាន់កាប់ទឹកដីខ្មែរនោះឡើយ។

ជំហានការទូតក្រឡាស់ចុះឡើងគ្មានសច្ចធម៌របស់មន្ត្រីថៃនាពេលនេះ គឺស្តែងឱ្យឃើញពី «ភាពភ័យខ្លាច និងការបាក់មុខ» ទាំងស្រុង បន្ទាប់ពីល្បិចកលបំភ័យ រឿងរូបភាពផ្កាយរណបរបស់ខ្លួនត្រូវបានបរាជ័យចំពោះមុខភាពរឹងមាំរបស់កម្ពុជា។ នៅពេលដែលកម្ពុជាជម្នះបកអាក្រាតទង្វើដូចចោរព្រៃរបស់យោធាថៃនៅក្នុងមហាសន្និបាត OIF នាទីក្រុងប៉ារីស និងរួមដៃជាមួយអង្គការយូណេស្កូបង្ហូតទង់ជាតិរួមគ្នាខ្ពស់ត្រដែតលើកំពូលភ្នំព្រះវិហារ ទើបធ្វើឱ្យថៃដឹងខ្លួនថាខ្លួនកំពុងចាញ់ប្រៀបផ្លូវច្បាប់ និងត្រូវសហគមន៍អន្តរជាតិថ្កោលទោសយ៉ាងធ្ងន់ធ្ងរ។ ការទទូចសុំចរចាទ្វេភាគីនៅពេលនេះ គឺគ្រាន់តែជារនាំងផ្សែងការទូតចង់បិទបាំងការពិត និងដើម្បីសុំបិទមាត់កម្ពុជាមិនឱ្យបន្តប្តឹងទៅ UN តែប៉ុណ្ណោះ។

សរុបសេចក្តីមក ភាពក្រឡិចក្រឡុចនៃសេចក្តីថ្លែងការណ៍របស់មន្ត្រីថៃ គឺកាន់តែផ្តល់ប្រៀបឈ្នះខាងផ្លូវច្បាប់ និងផ្លូវការទូតយ៉ាងរឹងមាំដល់ព្រះរាជាណាចក្រកម្ពុជា។ កម្ពុជានឹងមិនដើរចូលទៅក្នុងអន្ទាក់ចរចាទ្វេភាគីទាំងងងឹតងងុល ដែលបើកផ្លូវឱ្យថៃក្រឡាស់សម្តីតាមចិត្តនោះឡើយ ពោលគឺត្រូវតែបន្តជម្នះបង្ហាញការពិតទៅកាន់ពិភពលោក ព្រោះអន្តរជាតិបាននិងកំពុងឈរខាងខ្មែរជានិច្ច។ យោធាថៃគ្មានជម្រើសអ្វីក្រៅពីត្រូវទទួលស្គាល់ការពិត ដកកងកម្លាំងប្រដាប់អាវុធ និងរុះរើហេដ្ឋារចនាសម្ព័ន្ធខុសច្បាប់ទាំងអស់ចេញពីទឹកដីអធិបតេយ្យភាពរបស់កម្ពុជាដាច់ខាត ស្របតាមច្បាប់អន្តរជាតិ ដើម្បីបញ្ចប់វិបត្តិព្រំដែននេះដោយសន្តិវិធី និងយុត្តិធម៌៕