ស្របពេលដែលមានព័ត៌មានចចាមអារ៉ាមព្រ.មានរឿងគ្រោះរញ្ជួយដីកម្រិតធ្ងន់ផ្ទុះឡើង មហាជនជាច្រើនបានចោទសួរដោយក្តីបារម្ភថា តើទឹកដីកម្ពុជាអាចនឹងជួបគ្រោះរំងើដីដ៏គួរឱ្យខ្លាចដូចប្រទេសជុំវិញដែរឬទេ? តើសណ្ឋានដីក្រោមដីរបស់កម្ពុជាមានសុវត្ថិភាពកម្រិតណា ហ៊ុមព័ទ្ធដោយខ្សែបំណែកដីសកម្មដែរទេ?
_____________
ស្របពេលដែលមានព័ត៌មានចចាមអារ៉ាមចេញពីទំព័រផេកបរទេសមួយដែលថា ប្រទេសកម្ពុជា ស្ថិតក្នុងបញ្ជីនៃប្រទេសដែលនឹងជួបគ្រោះរញ្ជួយដីក្នុងពេលប៉ុន្មានថ្ងៃខាងមុខ ការវែកញែកក៏ស្រាប់តែផ្ទុះឡើងយ៉ាងក្តៅគគុកនៅលើបណ្តាញសង្គម ដោយមតិជាច្រើនបានចោទជាសំណួរថា តើវាអាចក្លាយជាការពិតដែរឬទេ? តើកម្ពុជាអាចនឹងជួបគ្រោះរញ្ជួយដីធ្ងន់ធ្ងរនៅថ្ងៃអនាគតដែរឬទេ ស្របពេលដែលប្រទេសជុំវិញកម្ពុជាសុទ្ធតែធ្លាប់ជួបប្រទះ និងរងឥទ្ធិពលនៃគ្រោះធម្មជាតិមួយនេះអស់ទៅហើយនោះ?
ផ្អែកតាមលក្ខណៈ និងសណ្ឋានដីផ្នែកភូមិសាស្ត្រ អ្នកជំនាញបានអះអាងថា ទៅថ្ងៃអនាគត ប្រទេសកម្ពុជាគឺស្ទើរតែមិនអាចជួបប្រទះនឹងគ្រោះរញ្ជួយដីកម្រិតធ្ងន់ធ្ងរ និងបំផ្លិចបំផ្លាញដូចបណ្តាប្រទេសជិតខាងឡើយ។ មូលហេតុចម្បងគឺដោយសារទឹកដីនៃព្រះរាជាណាចក្រកម្ពុជាទាំងមូល ស្ថិតចំកណ្តាលនៃ «ប្លុកស៊ូដា» ដែលជាផ្ទាំងដីកម្រាលក្រោមដីដ៏ចំណាស់ មានស្ថេរភាពរឹងមាំខ្លាំង និងគ្មានខ្សែបំណែកផ្លាកតិចតូនិកសកម្ម (Active Fault Lines) កាត់ចំកណ្តាលប្រទេស ដូចជាប្រទេសមីយ៉ាន់ម៉ា ឬថៃនោះទេ។ យោងតាមប្រព័ន្ធវាយតម្លៃហានិភ័យសកល ThinkHazard កម្ពុជាត្រូវបានចាត់ចូលជាតំបន់ «ហានិភ័យទាបខ្លាំង» ពោលគឺមានឱកាសតិចជាង ២% ប៉ុណ្ណោះ ក្នុងការជួបប្រទះការរញ្ជួយដីដែលអាចបង្កការខូចខាតទ្រព្យសម្បត្តិក្នុងរង្វង់ ៥០ ឆ្នាំខាងមុខ។.jpg)
ទោះជាយ៉ាងណាក៏ដោយ ហានិភ័យតែមួយគត់ដែលកម្ពុជាអាចនឹងបន្តជួបប្រទះទៅថ្ងៃអនាគត គឺ «ការរងឥទ្ធិពលរលកចម្លងរយៈចម្ងាយឆ្ងាយ» (Seismic wave propagation) ពីការរញ្ជួយដីកម្រិតធ្ងន់នៅក្នុងប្រទេសជិតខាងតែប៉ុណ្ណោះ។ ជាក់ស្តែង កាលពីព្រឹត្តិការណ៍រញ្ជួយដីកម្រិតធ្ងន់ ៧.៧ រ៉ិចទ័រនៅប្រទេសមីយ៉ាន់ម៉ា កាលពីខែមិនា ឆ្នាំ ២០២៥ កន្លងទៅ រលកលំញ័រចម្លងបានធ្វើឱ្យប្រជាពលរដ្ឋនៅតាមតំបន់ព្រំដែនកម្ពុជា-ថៃ ដឹងខ្យល់តិចតួច និងបានធ្វើឱ្យសំណង់អគារខ្ពស់ៗមួយចំនួននៅក្នុងរាជធានីភ្នំពេញ និងក្រុងព្រះសីហនុ រង្គើអង្រួនរហូតបង្ខំឱ្យមានការជម្លៀសមនុស្សចុះមកក្រោមទាំងវឹកវរ។ នេះសហការបញ្ជាក់ដោយ គណៈកម្មាធិការជាតិគ្រប់គ្រងគ្រោះមហន្តរាយ (NCDM) ថា លំញ័រនៅលើអគារខ្ពស់ៗនោះគ្រាន់តែជារលកឥទ្ធិពលចម្លង និងមិនអាចបង្កហានិភ័យដល់ការបាក់ស្រុតដី ឬគ្រោះថ្នាក់ដល់ជីវិតនោះឡើយ។
សរុបសេចក្តីមក ផ្អែកលើសណ្ឋានដីដ៏មានសុវត្ថិភាពខ្ពស់ ប្រទេសកម្ពុជានឹងមិនជួបគ្រោះរញ្ជួយដីបំផ្លិចបំផ្លាញនៅថ្ងៃអនាគតឡើយ ហើយរាល់ព័ត៌មានព្រមានចចាមអារ៉ាមទាំងឡាយ គឺគ្រាន់តែជាព័ត៌មានមិនពិតដែលគ្មានមូលដ្ឋានវិទ្យាសាស្ត្រច្បាស់លាស់។ ដូចនេះ សាធារណជនមិនគួរមានការភ័យស្លន់ស្លោឡើយ ដោយគ្រោះធម្មជាតិជាក់ស្តែងដែលកម្ពុជាត្រូវរួមគ្នាប្រុងប្រយ័ត្ន និងទប់ទល់ក្នុងពេលបច្ចុប្បន្ន និងអនាគត គឺមានតែបញ្ហាទឹកជំនន់ ខ្យល់កន្ត្រាក់ និងគ្រោះរាំងស្ងួតតែប៉ុណ្ណោះ៕
