ប្រកាសអាសន្នបន្ទាន់! ឡាវត្រៀមបើកទ្វារទឹកធំ ខណៈតំបន់ខ្សែទឹកខាងក្រោមអាចរងឥទ្ធិពល

យោងតាមសារព័ត៌មាន Laotian Times ជំនន់ទឹកភ្លៀងយ៉ាងជោកជាំបានធ្វើឱ្យកម្ពស់ទឹកនៅក្នុងអាងទំនប់វារីអគ្គិសនី «Houay Lamphanh ក្រោម» របស់ឡាវ ហក់ឡើងដល់កម្រិតផ្ទុកពេញសមត្ថភា។ ស្ថានភាពនេះ បង្ខំឱ្យអាជ្ញាធរឡាវប្រកាសអាសន្នត្រៀមបើកទ្វារទឹកបញ្ចេញក្នុងល្បឿនរហូតដល់ ១១០ ម៉ែត្រគូបក្នុងមួយវិនាទី ដែលទឹកទាំងនេះនឹងហូរធ្លាក់ចូលទន្លេសេកុង ឆ្ពោះមកកាន់ខេត្តស្ទឹងត្រែង ប្រទេសកម្ពុជា និងបន្តទៅវៀតណាម។
_______________

កម្ពុជា និងវៀតណាមគួរត្រៀមខ្លួន និងប្រុងប្រយ័ត្ន! ខណៈនេះស្ថានភាពទឹកនៅក្នុងទំនប់វារីអគ្គិសនី «Houay Lamphanh ក្រោម» របស់ឡាវ បានហក់ឡើងដល់កម្រិតផ្ទុកពេញសមត្ថភាព ទៅហើយ ដែលបង្ខំឱ្យអាជ្ញាធរឡាវចេញសេចក្តីប្រកាសអាសន្នត្រៀមបើកទ្វារទឹកធំបន្ទាន់ បង្កជាក្តីបារម្ភពីហានិភ័យនៃជំនន់ទឹកហូរវាយប្រហារបណ្តាប្រទេសស្ថិតនៅខ្សែទឹកខាងក្រោម។

យោងតាមការចុះផ្សាយរបស់សារព័ត៌មាន Laotian Times ផ្អែកលើរបាយការណ៍ផ្លូវការពីអាជ្ញាធរខេត្តសេកុង (Sekong) ប្រទេសឡាវ នាថ្ងៃទី២០ ខែសីហា ឆ្នាំ២០២៦ បានឱ្យដឹងថា ជំនន់ទឹកភ្លៀងយ៉ាងជោកជាំបានចាប់ផ្តើមធ្លាក់បោកបក់ខ្លាំង ដែលបានបង្កើតជាទឹកជំនន់គំហុករុញច្រានលំហូរទឹកចូលទៅក្នុងអាងទំនប់ចន្លោះពី ១០០ ដល់ ១២០ ម៉ែត្រគូបក្នុងមួយវិនាទី។ ស្ថានភាពដ៏គ្រោះថ្នាក់នេះ បានបង្ខំឱ្យក្រុមហ៊ុនគ្រប់គ្រងទំនប់វារីអគ្គិសនី គ្រោងបើកទ្វារទប់ទឹក (Spillway) ដើម្បីបញ្ចេញទឹកចូលទៅក្នុងទន្លេក្នុងល្បឿនចន្លោះពី ៥០ ដល់ ១១០ ម៉ែត្រគូបក្នុងមួយវិនាទី ឬអាចច្រើនជាងនេះ នៅក្នុងចន្លោះថ្ងៃទី២០ ដល់ថ្ងៃទី២២ ខែសីហា ឆ្នាំ២០២៦ នេះហើយ។ អាជ្ញាធរឡាវបានចេញសេចក្តីណែនាំ និងព្រមានជាពិសេសដល់ប្រជាពលរដ្ឋនៅក្នុងភូមិចំនួនពីរ ក្នុងស្រុកឡាម៉ាម (Lamam District) ឱ្យតាមដានកម្ពស់ទឹកយ៉ាងដិតដល់ និងប្រញាប់ជម្លៀសសត្វពាហនៈព្រមទាំងទ្រព្យសម្បត្តិមានតម្លៃទៅកាន់ទីទួលសុវត្ថិភាព។

ផ្អែកលើភូមិសាស្ត្រខ្សែទឹកហូរនៃប្រព័ន្ធទន្លេមេគង្គ ការបើកទ្វារទឹកធំរបស់ឡាវនៅពេលនេះ នឹងហូរធ្លាក់ចូលទៅក្នុងទន្លេសេកុង (Sekong River) រួចបន្តហូរចូលមកទឹកដីកម្ពុជាត្រង់ខេត្តស្ទឹងត្រែង មុននឹងបន្តអូសបន្លាយទៅជន់ហៀរនៅតំបន់ដីសណ្តទន្លេមេគង្គនៃភាគខាងត្បូងប្រទេសវៀតណាម។ ទោះបីជាអត្ថបទព័ត៌មានបញ្ជាក់ថា ការបើកទឹកនេះមិនទាន់បង្កផលប៉ះពាល់បំផ្លិចបំផ្លាញធ្ងន់ធ្ងរដល់កម្ពុជាក្តី ប៉ុន្តែវានឹងធ្វើឱ្យកម្ពស់ទឹកទន្លេសេកុង ក្នុងខេត្តស្ទឹងត្រែង ហក់ឡើងខ្ពស់យ៉ាងគំហុក។ ទន្ទឹមនឹងនេះ ស្ថានភាពគ្រោះមហន្តរាយនៅក្នុងប្រទេសឡាវផ្ទាល់កំពុងស្ថិតក្នុងភាពអាសន្ន ដោយជំនន់ទឹកភ្លៀងបានលិចលង់ផ្ទះសម្បែង និងបង្កផលប៉ះពាល់ដល់ពលរដ្ឋជិត ៩០,០០0 នាក់ រួចទៅហើយ ជាពិសេសនៅក្នុងស្រុកភីន (Phin) និងស្រុកសេផុន (Sepon) នៃខេត្តសាវណ្ណាខេត (Savannakhet) ខណៈក្រុមអ្នកឧតុនិយមព្រមានថា ភ្លៀងនឹងបន្តធ្លាក់ខ្លាំងបន្ថែមទៀត។

ជារួមមក ការប្រកាសអាសន្នបើកទ្វារទឹកទំនប់របស់ប្រទេសឡាវ គឺជាសញ្ញាដាស់តឿនដ៏សំខាន់មួយសម្រាប់បណ្តាប្រទេសអមដងទន្លេមេគង្គ ជាពិសេសគឺកម្ពុជា និងវៀតណាម ឱ្យបង្កើនការយកចិត្តទុកដាក់ និងត្រៀមលក្ខណៈកម្រិតខ្ពស់។ ទោះបីជាមានការវាយតម្លៃបឋមថាផលប៉ះពាល់ស្ថិតក្នុងកម្រិតអាចគ្រប់គ្រងបានក្តី ប៉ុន្តែបម្រែបម្រួលអាកាសធាតុ និងលំហូរទឹកគំហុកភ្លាមៗ ទាមទារឱ្យអាជ្ញាធរដែនដីតាមបណ្តោយដងទន្លេ ចុះផ្សព្វផ្សាយដំណឹង និងតាមដានការប្រកាសអាសន្នជាប្រចាំ ដើម្បីធានាសុវត្ថិភាពអាយុជីវិត និងទ្រព្យសម្បត្តិរបស់ប្រជាពលរដ្ឋ៕