បន្ទាប់ពីរៀបការបានប្រមាណ៨ខែ នាយ ព្រែក និង ឈិន មុន្នីនាថ ទទួលបានចំណងដៃហើយត្រៀមខ្លួនក្លាយជាឪពុកម្តាយគេនាពេលខាងមុខនេះ។ ដំណឹងល្អនេះត្រូវបានអ្នកទាំងពីរប្រកាសនៅលើបណ្តាញសង្គមដោយមានការចូលរួមអបអរសាទរយ៉ាងច្រើនពីទស្សនិកជន។ ទោះយ៉ាងណា នាយ ព្រែក និង ឈិន មុន្នីនាថ ពុំទាន់ប្រកាសពីភេទកូនក្នុងផ្ទៃនៅឡើយទេ។
នៅល្ងាចថ្ងៃទី១៥ ខែសីហា តារាសម្តែង ឈិន មុន្នីនាថ បានបង្ហោះវីដេអូមួយដែលបញ្ជាក់ថារូបនាងកំពុងមានផ្ទៃពោះ។ នៅលើបណ្តាញសង្គមរបស់ នាយព្រែក ក៏បានបង្ហោះវីដេអូមួយផ្សេងទៀតហើយបានសួរយោបល់ពីទស្សនិកជនទាក់ទងនឹងការដាក់ឈ្មោះកូនរបស់អ្នកទាំងពីរ។ នាយ ព្រែក និង ឈិន មុន្នីនាថ ពុំបានបញ្ជាក់ថាកូនរបស់កូនបានប៉ុន្មានសប្តាហ៍ ហើយមានភេទអ្វីនៅឡើយទេ។
ដំណឹងល្អនេះមានសិល្បករ សិល្បការិនី ជាច្រើនរូបរួមទាំងមហាជនបានចូលរួមអបអរសាទរមកកាន់ នាយព្រែក និង ឈិន មុន្នីនាថ ដែលត្រៀមខ្លួនធ្វើជាម្តាយឪពុកគេ។
ឈិន មុន្នីនាថ និង នាយ ព្រែក បានចូលរោងការកាលពីថ្ងៃទី៧ ខែធ្នូ ឆ្នាំ២០២៥ ក្រោមវត្តមានដ៏ខ្ពង់ខ្ពស់ពីថ្នាក់ដឹកនាំ និងមានអ្នកសិល្បៈជាច្រើនរូបចូលរួម។ មុននឹងដឹកដៃគ្នាចូលរោងការអ្នកទាំងពីរបានស្វែងយល់និងមើលចិត្តគ្នារយៈពេល៦ឆ្នាំ។ចាប់ផ្តើមដំបូងនៃទំនាក់ទំនងជាមួយនឹង នាយព្រែក តារាស្រី ឈិន មុន្នីនាថ ធ្លាប់បានសារភាពដោយត្រង់ៗមិនសូវជាមានភាពជឿជាក់លើទំនាក់ទំនងពួកគេនោះទេ។
មិនទាន់មានខ្សែភាពយន្តថ្មីសម្រាប់សម្តែង ឈិន មុន្នីនាថ បានចូលរួមជាមួយនឹងក្រុមកំប្លែងប្តីរបស់ខ្លួន និងបានធ្វើមាតិកានៅលើបណ្តាញសង្គមដោយទទួលបាននូវការគាំទ្រយ៉ាងច្រើនពីអ្នកទស្សនា។ ចំពោះ នាយព្រែក វិញបានខកខានធ្វើជាពិធីករជាយូរមកហើយតែកាក់កបនឹងការធ្វើវីដេអូកំប្លែងៗដោយទទួលបានការផ្សព្វផ្សាយផលិតផលជាច្រើន៕
