«ក្មេងខ្មែរ» មិនបានបំបែកក្រុមការពិតគ្រាន់តែជាការ Prank មុនទម្លាក់អាល់ប៊ុមថ្មី

មិនដឹងថានេះជាផែនការទីផ្សារឬមហាជនជាអ្នកយល់ច្រឡំខ្លួនឯងនោះទេបន្ទាប់ពី ក្មេងខ្មែរ ប្រកាសកាលពីកន្លងមកនេះដែលទស្សនិកជនគិតថាបំបែកក្រុមពេលនេះស្រាប់តែត្រូវបានសមាជិកទាំងពីររូបគឺ ជា សុជាតិ និង កៅ ពន្លឺ ប្រកាសថានោះគ្រាន់តែជាការបំបែកក្រុម ខណៈពួកគេត្រៀមចេញអាល់ប៊ុមថ្មី។

នៅថ្ងៃទី៨ ខែសីហា ជា សុជាតិ និង កៅ ពន្លឺ បានចេញវីដេអូរៀងខ្លួនបង្ហោះក្នុងថ្ងៃតែមួយអំពីក្រុម «ក្មេងខ្មែរ»។ ជាមួយនឹងការរៀបរាប់ពីអនុស្សាវរីយ៍ក្នុងដំណើរដែល ក្មេងខ្មែរ ឆ្លងកាត់ អ្នកទាំងពីរបានបញ្ជាក់ថានោះគ្រាន់តែជាការ Prank ប៉ុណ្ណោះដោយពួកគេមិនបានរំសាយក្រុមឡើយ។ ទាំង ជា សុជាតិ និង កៅ ពន្លឺ ក៏បានធ្វើការសូមទោសមកកាន់ទស្សនិកជនចំពោះការបង្ហោះកន្លងមកដែលធ្វើឱ្យអ្នកគាំទ្រមួយចំនួនសោកស្តាយចំពោះការបាត់បង់ក្រុមក្មេងខ្មែរ។

តារាចម្រៀង ជា សុជាតិ បានលើកឡើងនៅក្នុងវីដេអូរបស់លោកថា ការធ្វើបែបនេះដើម្បីពញាក់ស្មារតីបន្តិចបន្តួចពីក្រុម ក្មេងខ្មែរ និងចង់ដឹងចិត្តអ្នកគាំទ្រក្រោយពីមានការសង្ស័យថា សមាជិកទាំងពីរនាក់មានជម្លោះផ្ទៃក្នុងដោយសារតែមិនឃើញទម្លាក់បទថ្មី ស្ងប់ស្ងាត់អស់រយៈពេលយ៉ាងយូរ។ តារាចម្រៀងរូបនេះក៏បានបញ្ជាក់ថា អាល់ប៊ុម ថ្មីរបស់ពួកគេនឹងទម្លាក់នាពេលឆាប់ៗខាងមុខនេះផងដែរ។

ការយកអារម្មណ៍របស់ទស្សនិកជនមកលេងសើចជាមួយនឹងការ Prank បែបនេះមតិខ្លះក៏បង្ហាញការសប្បាយចិត្តរបស់ខ្លួនដែលឃើញថាក្រុម ក្មេងខ្មែរ ពុំទាន់បំបែកក្រុម ខណៈមតិខ្លះទៀតបានរិះគន់ចំពោះសកម្មភាពបែបនេះ។

គួរបញ្ជាក់ផងដែរថា កាលពីល្ងាចថ្ងៃទី២៤ ខែកក្កដា ឆ្នាំ២០២៦ ក្មេងខ្មែរ បានប្រកាសថា «ពួកគេមិនអាចបន្តដំណើរជាមួយគ្នាទៀតទេ ការជួបជុំតែងតែមានការបែក ក្មេងខ្មែរសូមអរគុណ និងសម្រាបលា»។ ការប្រកាសនេះបានធ្វើឱ្យមានការភ្ញាក់ផ្អើលនៅក្នុងសង្គមសិល្បៈនិងអ្នកគាំទ្រ ប៉ុន្តែនៅទីបំផុតការប្រកាសនោះត្រូវបានបង្វែរមកវិញថា នោះគ្រាន់តែជាការ Prank ប៉ុណ្ណោះ៕