New Jeans ត្រឡប់មកវិញជាមួយសមាជិក៤នាក់

ដើម្បីអបអរសាទរខួបលើកទី៤ របស់ពួកគេ នៅក្រុមចម្រៀងនារី NewJeans បានចេញវីដេអូមួយជាមួយនឹងសមាជិក ៤ នាក់គឺ Minji , Hanni, Haerin និង Hyein។ វីដេអូពិសេសនេះត្រូវបានបង្ហោះនៅលើឆាណែលផ្លូវការរបស់ក្រុមដោយមិនបានជូនដំណឹងជាមុន។ នេះគឺជាលើកដំបូងក្នុងរយៈពេល១ ឆ្នាំ និង ៤ ខែដែល NewJeans បានចេញផ្សាយខ្លឹមសារថ្មីជាក្រុម។

កាលពីខែមីនា ឆ្នាំ២០២៥ នៅឯកម្មវិធីមួយនៅហុងកុង ក្រុមនេះបានប្រកាសថា «យើងនឹងគោរពតាមការសម្រេចរបស់តុលាការ ហើយផ្អាកសកម្មភាពទាំងអស់»។ NewJeans បានមានជម្លោះជាមួយក្រុមហ៊ុនគ្រប់គ្រងរបស់ពួកគេ គឺ ADOR បន្ទាប់ពីអតីតនាយកប្រតិបត្តិ Min Hee Jin ត្រូវបានបណ្តេញចេញ។ នៅខែវិច្ឆិកា ឆ្នាំ២០២៤ សមាជិកទាំងអស់បានធ្វើសន្និសីទសារព័ត៌មាន និងបានប្រកាសបញ្ចប់កិច្ចសន្យាផ្តាច់មុខរបស់ពួកគេជាមួយ ADOR។
ទោះជាយ៉ាងណាក៏ដោយ ទាំងនៅក្នុងដីកាបង្គាប់បណ្ដោះអាសន្ន និងបណ្តឹងផ្លូវការ តុលាការបានសម្រេចគាំទ្រ ADOR ជាប់លាប់ ដោយហេតុនេះរារាំងសមាជិករបស់ខ្លួនមិនឱ្យធ្វើសកម្មភាពដោយឯករាជ្យ។

នៅចុងខែតុលា ឆ្នាំ២០២៥ NewJeans បានចាញ់ក្តីជាផ្លូវការទាក់ទងនឹងសុពលភាពនៃកិច្ចសន្យាផ្តាច់មុខរបស់ខ្លួនជាមួយ ADOR។ បន្ទាប់មក នៅក្នុងខែវិច្ឆិកា ឆ្នាំ២០២៥ Haerin និង Hyein បានត្រឡប់ទៅ ADOR វិញ។ មួយខែក្រោយមក Hanni ក៏បានវិលត្រឡប់មកក្រុមហ៊ុនវិញជាផ្លូវការផងដែរ។
ទាក់ទងនឹងករណីរបស់ Minji ADOR ពីមុនបានបញ្ជាក់ថា ភាគីទាំងពីរនៅតែកំពុងពិភាក្សាគ្នាអំពីបញ្ហានេះក្នុងទិសដៅវិជ្ជមាន។ ទន្ទឹមនឹងនេះ ក្រុមហ៊ុនបានប្រកាសបញ្ចប់ កិច្ចសន្យាចំពោះសមាជិក Danielle កាលពីខែធ្នូ កន្លងទៅដោយបញ្ជាក់ថានាងភាគច្រើនទទួលខុសត្រូវចំពោះជម្លោះកិច្ចសន្យារវាង NewJeans និងក្រុមហ៊ុន ក៏ដូចជាការចាកចេញ និងការត្រឡប់មកវិញយឺតយ៉ាវរបស់សមាជិកផ្សេងទៀត។ ADOR កំពុងបន្តប្តឹងទាមទារសំណងចំនួន ៣៣,១ ពាន់លានវ៉ុនប្រឆាំងនឹង Danielle ក្រុមគ្រួសាររបស់នាង និងអតីតនាយកប្រតិបត្តិ ADOR គឺ Min Hee Jin។

យោងតាមឧស្សាហកម្មកម្សាន្តកូរ៉េខាងត្បូង ការចេញផ្សាយខ្លឹមសាររបស់ NewJeans ដែលមានសមាជិកបច្ចុប្បន្នទាំង៤នាក់តាមរយៈ ADOR បន្ទាប់ពីជាងមួយឆ្នាំ ត្រូវបានគេមើលឃើញថាជាសញ្ញាវិជ្ជមាន ដែលបង្ហាញថាសកម្មភាពរបស់ក្រុមអាចនឹងបន្តឡើងវិញក្នុងពេលឆាប់ៗនេះ។ ទោះបីជា ADOR មិនទាន់បានប្រកាសជាផ្លូវការអំពីស្ថានភាពរបស់ Minji ក៏ដោយ ក៏អ្នកទស្សនាភាគច្រើនប៉ាន់ស្មានថា តារាស្រីរូបនេះទំនងជានឹងវិលត្រឡប់មកក្រុមហ៊ុនវិញ ហើយបន្តសកម្មភាពរបស់នាងជាសមាជិកក្រុម NewJeans។

បន្ថែមពីលើការចេញវីដេអូ ADOR ក៏បានបង្ហាញសំណុំរូបថតរំលឹកពី NewJeans ដោយសមាជិកម្នាក់ៗមានរូបរាងពីរដែលខុសគ្នា។ ADOR បាននិយាយថា «នេះគឺជាខ្លឹមសាររំលឹកខួបលើកទី៤ របស់ NewJeans ដែលមានគោលបំណងជួយសមាជិក និងអ្នកគាំទ្រចែករំលែកសេចក្តីរីករាយនៅថ្ងៃពិសេសនេះ។ ផែនការជាក់លាក់ និងវិធីសាស្ត្រប្រតិបត្តិការសម្រាប់ NewJeans នឹងត្រូវប្រកាសនៅពេលដែលការពិភាក្សាទាំងអស់ត្រូវបានបញ្ចប់យ៉ាងពេញលេញ»។
ក្រុម NewJeans បានបង្ហាញខ្លួនជាផ្លូវការនៅថ្ងៃទី២២ ខែកក្កដា ឆ្នាំ២០២២ ជាមួយនឹងវីដេអូចម្រៀងសម្រាប់បទ «Attention»។ ក្រុមនេះបានក្លាយជាក្រុមចម្រៀងដ៏ល្បីល្បាញយ៉ាងឆាប់រហ័ស និងទទួលបានជោគជ័យជាបន្តបន្ទាប់ជាមួយនឹងបទចម្រៀងល្បីៗដូចជា «Hype Boy», «Ditto», «OMG» និង «Super Shy»។

នៅក្នុងខែសីហា ឆ្នាំ២០២៣ អាល់ប៊ុមខ្នាតតូចទីពីររបស់ពួកគេគឺ «Get Up»បានជួយ NewJeans ក្លាយជាក្រុមចម្រៀងនារី K-pop ទីពីរក្នុងប្រវត្តិសាស្ត្រដែលឈានដល់លេខ ១ នៅលើតារាងអាល់ប៊ុម Billboard 200 របស់សហរដ្ឋអាម៉េរិក។ ចាប់តាំងពីការចេញបទចម្រៀងជប៉ុនរបស់ពួកគេ «Supernatural» ក្នុងខែមិថុនា ឆ្នាំ២០២៤ ក្រុមនេះមិនបានចេញបទចម្រៀងថ្មីណាមួយឡើយ៕