ផ្ទាំងទឹកកកនៅហ្រ្គីនឡេន រលាយលឿនខុសប្រក្រតី សង្ស័យថាជាសញ្ញាអាសន្ននៃមនុស្សជាតិ

នៅក្នុងពេលឆាប់ៗខាងមុខនេះ ភពផែនដីអាចនឹងត្រូវប្រឈមមុខនឹងគ្រោះមហន្តរាយអាកាសធាតុដែលមិនធ្លាប់មានពីមុនមក ខណៈផ្ទាំងទឹកកកនៅកោះហ្គ្រីនឡែនកំពុងរលាយក្នុងល្បឿនលឿនខុសប្រក្រតី រហូតបាត់បង់ទឹកកករាប់រយពាន់លានតោន ក្នុងពេលដ៏ខ្លី។ បាតុភូតដ៏គួរឱ្យបារម្ភនេះមិនត្រឹមតែជាសញ្ញាព្រមា.នធម្មតានោះទេ ប៉ុន្តែវាត្រូវបានអ្នកវិទ្យាសាស្ត្រចាត់ទុកថាជាសញ្ញាអាសន្នផ្ទាល់របស់មនុស្សជាតិ ដែលកំពុងរុញច្រានភពផែនដីឱ្យខិតទៅក្បែរចំណុចរបត់គ្រោះថ្នាក់បំផុត។

យោងតាមការចុះផ្សាយរបស់ទីភ្នាក់ងារសារព័ត៌មានអន្តរជាតិធំៗ ដូចជា BBC និង Reuters បានឱ្យដឹងថា ក្រុមអ្នកវិទ្យាសាស្ត្រអន្តរជាតិប្រហែល ៨០ នាក់ បានសម្រេចចិត្តបើកបេសកកម្មបន្ទាន់មួយ ដោយដាក់ពង្រាយនាវាពិសោធន៍ទំនើប និងហ្វូងមនុស្សយន្តស្វ័យប្រវត្តិកែច្នៃដោយ AI ឱ្យចុះទៅស្កែនវាស់ស្ទង់កម្រិតកម្តៅទឹកសមុទ្រដែលកំពុងច្រោះរលាយទឹកកកពីខាងក្រោមជម្រកទឹកកកហ្គ្រីនឡែន។ ទិន្នន័យពីផ្កាយរណបបានបង្ហាញថា កោះហ្គ្រីនឡែនបានបាត់បង់ទឹកកកយ៉ាងសន្ធឹកសន្ធាប់រហូតដល់ទៅ ១០៥ ពាន់លានតោនក្នុងមួយឆ្នាំៗ។ អ្វីដែលរឹតតែគួរឱ្យព្រួយបារម្ភនោះគឺ ផ្ទៃទឹកកកលែងមានពណ៌សភ្លឺថ្លាដូចមុនទៀតហើយ ប៉ុន្តែវាបានប្រែជាពណ៌ក្រម៉ៅដោយសារកំទេចផេះពីភ្លើងឆេះព្រៃ ដែលកត្តានេះធ្វើឱ្យវាស្រូបយកកម្តៅពីព្រះអាទិត្យកាន់តែខ្លាំង និងធ្វើឱ្យបរិមាណទឹកសាបដែលរលាយចេញកើនឡើងរហូតដល់ទៅ ៦ ដង បើធៀបនឹងទសវត្សរ៍ឆ្នាំ ១៩៩០។

ការកកកុញនៃបរិមាណទឹកសាបដ៏មហិមាចាក់ចូលទៅក្នុងមហាសមុទ្រនេះ មិនត្រឹមតែជម្រុញឱ្យកម្រិតទឹកសមុទ្រសកលលោកកើនកម្ពស់គំរាមកំហែងដល់ទីក្រុងឆ្នេរសមុទ្រប៉ុណ្ណោះទេ ប៉ុន្តែវាថែមទាំងកំពុងបង្កហានិភ័យដល់ការដួលរលំនៃប្រព័ន្ធចរន្តទឹកក្នុងមហាសមុទ្រអាត្លង់ទិកខាងជើង (AMOC) ទៀតផង។ អ្នកជំនាញបានព្រមានថា ប្រសិនបើប្រព័ន្ធចរន្តទឹកក្តៅ-ទឹកត្រជាក់សកលនេះត្រូវខូចខាត វានឹងផ្លាស់ប្តូរតំបន់ធ្លាក់ភ្លៀង បង្កើតជាព្យុះសាហាវបំផ្លាញទិន្នផលកសិកម្ម និងធ្វើឱ្យតំបន់អឺរ៉ុបខាងលិចត្រូវធ្លាក់ចូលក្នុងអាកាសធាតុត្រជាក់ខ្លាំងហួសប្រមាណភ្លាមៗ ដែលប៉ះពាល់ដល់ជីវភាពរស់នៅ និងការងាររបស់មនុស្សជាតិរាប់លាននាក់នៅទូទាំងពិភពលោក។

សន្និដ្ឋានមកវិញ វិបត្តិរលាយផ្ទាំងទឹកកកនៅហ្គ្រីនឡែននាពេលនេះ គឺជាកញ្ចក់ឆ្លុះបញ្ចាំងយ៉ាងច្បាស់ពីផលវិបាកពិតប្រាកដនៃវិបត្តិឡើងកម្តៅសកល ដែលលែងជាបញ្ហាឆ្ងាយដៃទៀតហើយ។ នេះគឺជាការអំពាវនាវ និងជាសញ្ញាអាសន្នចុងក្រោយសម្រាប់មេដឹកនាំពិភពលោក ក្នុងការរួមដៃគ្នាកាត់បន្ថយការបំភាយឧស្ម័នផ្ទះកញ្ចក់យ៉ាងម៉ឺងម៉ាត់ មុនពេលដែលចំណុចរបត់គ្រោះថ្នាក់នៃធម្មជាតិត្រូវដើរហួសបន្ទាត់ក្រហម ដែលមិនអាចស្រោចស្រង់ត្រឡប់ក្រោយវិញបាន៕