ប្រិយមិត្តមួយចំនួនជ្រាបមកហើយថាកន្លងមកថ្មីៗនេះផលិតករ ហ៊ុយ យ៉ាឡេង បានបញ្ចេញមតិរិះគន់អ្នករៀបចំកម្មវិធីប្រគល់ពានរង្វាន់របស់រោងកុន លេជេន ដែលសម្រេចឱ្យតារាវ័យក្មេងពីររូបឡើងប្រគល់ពានរង្វាន់កិត្តិយសដល់លោកស្រី ឌី សារ៉េត។ ទោះយ៉ាងណាអ្នករៀបចំកម្មវិធីបានចេញមកពន្យល់ហេតុផលរបស់ខ្លួនហើយត្រូវបានគេជឿថាជាការឆ្លើយតបទៅកាន់លោក ហ៊ុយ យ៉ាឡេង និងអ្នករិះគន់គិតថាមិនសមផ្សេងទៀត។
.png)
នៅយប់ថ្ងៃទី១៥ ខែកក្កដា រោងកុន លេជេន បានបង្ហាញថាពានរង្វាន់ដ៏មានកិត្តិយសសម្រាប់លោកស្រី ឌី សារ៉េត ដែលបានសាងស្នាដៃក្នុងវិស័យភាពយន្តក្នុងរយៈពេលជាច្រើនឆ្នាំត្រូវបានប្រគល់ជូនដោយតារាសម្តែងវ័យក្មេងពីររូបដែលជានិមិត្តរូបនៃការគោរព និងការបន្តស្មារតីពីសិល្បករជំនាន់ថ្មី ចំពោះអ្នកត្រួសត្រាយដែលបានបើកផ្លូវមុនពួកគេ។ វាជាការអបអរសាទរដល់ការបន្តផ្ទេរការបំផុសគំនិត ទឹកចិត្តស្រឡាញ់សិល្បៈ និងកេរដំណែល ដ៏មានតម្លៃ ពីសិល្បករមួយជំនាន់ទៅសិល្បករជំនាន់បន្ទាប់។
ការទទួលបានពានរង្វាន់នេះទៀតសោតដោយសារតែលោកស្រី ឌី សាវ៉េត ជាតារាសម្តែងជើងចាស់ដ៏ល្បីល្បាញ និងជានិមិត្តរូបនៃវិស័យភាពយន្តខ្មែរចាប់តាំងពីយុគមាសនៃវិស័យភាពយន្តកម្ពុជាក្នុងទសវត្សរ៍ឆ្នាំ ១៩៦០ រហូតមកដល់សព្វថ្ងៃ។ ស្នាដៃដំបូងៗដែលទទួលបានការគាំទ្រច្រើនរបស់តារាសម្តែងជើងចាស់រូបនេះមានដូចជា «ក្បូនជីវិត» នៅក្នុងឆ្នាំ១៩៦២ «កុំភ្លេចគុណម្តាយ កុំណាយប្រពន្ធស្មោះត្រង់» «វាសនាផ្ការំដួល» «លាហើយដួងតារា » និងខ្សែភាពយន្តជាច្រើនទៀត។
ចំណែកខ្សែភាពយន្ត «រឿងពស់កេងកង»នៅក្នុងឆ្នាំ១៩៦៩ ដែលជាខ្សែភាពយន្តដែលបានទទួលស្គាល់ជាអន្តរជាតិ ដោយបានរួមចំណែកជំរុញឱ្យវិស័យភាពយន្តកម្ពុជារីកចម្រើនយ៉ាងខ្លាំង។ ការចូលរួមដ៏មានតម្លៃរបស់លោកស្រី ឌី សាវ៉េត ក្នុងនាមជាសិល្បការិនីដ៏មានទេពកោសល្យរបស់កម្ពុជា ក្នុងភាពយន្តឯកសារ «Golden Slumbers» របស់អ្នកដឹកនាំរឿង ដាវី ជូ បានជួយធ្វើឱ្យប្រវត្តិសាស្ត្រភាពយន្តកម្ពុជាដែលមានការធ្លាក់ចុះយ៉ាងខ្លាំងចាប់ផ្ដើមងើបឡើងវិញ។
ការបង្ហាញពីមូលហេតុដែលតារាសម្តែងវ័យក្មេងពីររូបឡើងប្រគល់ពានរង្វាន់ដល់លោកស្រី ឌី សាវ៉េត នេះត្រូវគេជឿថាជាការឆ្លើយតបដោយប្រយោលរបស់អ្នករៀបចំកម្មវិធីទៅកាន់លោក ហ៊ុយ យ៉ាឡេង ដែលបានបញ្ចេញមតិរិះគន់ជាសាធារណៈកាលពីពេលកន្លងមកនេះ។ នៅថ្ងៃទី១២ កក្កដា លោក ហ៊ុយ យ៉ាឡេង បានរិះគន់អ្នករៀបចំកម្មវិធីប្រគល់ពានរង្វាន់របស់រោងភាពយន្តលេជេនថាភ្លេចគុណតម្លៃចាស់ព្រឹទ្ធាចារ្យឱ្យតារាសម្តែងវ័យក្មេងប្រកាសពានដល់តារាសម្តែងជើងចាស់លោកស្រី ឌី សារ៉េត។ ជាមួយនឹងបទពិសោធន៍របស់ខ្លួន២៦ឆ្នាំផលិតកររូបនេះឱ្យអ្នករៀបចំសិក្សារៀនសូត្រពីបរទេស ហើយយ៉ាងហោចណាស់តារាវ័យក្មេងដែលឡើងប្រគល់ជូនគួរជ្រើសរើសអ្នកអង្គម្ចាស់ក្សត្រិយ៍ ចេណ្ណា៕
