វៀតណាមរងការរិះគ.ន់ ក្រោយផ្ដល់សំណងត្រឹម ៣០០០ដុល្លារ ដល់ស.ពអ្នកទេសចរឥណ្ឌាដែលលិចទូកនៅកោះត្រល់

រលកនៃការរិះគ.ន់បានផ្ទុះឡើងពេញប្រព័ន្ធអ៊ីនធឺណិត! ទោះបីជារដ្ឋាភិបាលវៀតណាមបានប្រកាសចេញថ្លៃចំណាយ និងជួយសង្គ្រោះទាំងស្រុងដល់គ្រួសារជនរងគ្រោះជនជាតិឥណ្ឌា ១៥ នាក់ ដែលបានបាត់បង់ជីវិតក្នុងហេតុការណ៍លិចទូកល្បឿនលឿន នៅកោះត្រល់ក៏ដោយ ប៉ុន្តែទំហំទឹកប្រាក់ឧបត្ថម្ភត្រឹមតែ ៣,០០០ ដុល្លារអាម៉េរិកក្នុងម្នាក់ បាននិងកំពុងរងការរិះគ.ន់យ៉ាងខ្លាំងពីសាធារណជនបរទេស និងអ្នកលេងអិនធើណេតថាមានកម្រិតទាបពេក និងមិនសមស្របទៅនឹងតម្លៃជីវិតមនុស្សឡើយ។

យោងតាមការចុះផ្សាយផ្លូវការរបស់សារព័ត៌មានវៀតណាម Tuoi Tre News សោកនាដកម្មនេះបានកើតឡើងដោយសារគ្រោះថ្នាក់លិចទូកល្បឿនលឿន (Speedboat) នៅក្បែរតំបន់សមុទ្រនៃកោះត្រល់ បណ្តាលឱ្យអ្នកទេសចរជនជាតិឥណ្ឌាចំនួន ១៥ នាក់បាត់បង់ជីវិត ដែលញ៉ាំងឱ្យរដ្ឋាភិបាលវៀតណាម និងអាជ្ញាធរខេត្តគៀនយ៉ាង (Kien Giang) ដាក់ចេញនូវវិធានការគាំទ្រជាបន្ទាន់ ដោយផ្តល់ប្រាក់ឧបត្ថម្ភបឋមចំនួន ៣,០០០ ដុល្លារអាមេរិកក្នុងម្នាក់ ព្រមទាំងប្រកាសរ៉ាប់រងលើថ្លៃចំណាយការងារភស្តុភារ សេវាវេជ្ជសាស្ត្រ និងការស្នាក់នៅបណ្តោះអាសន្នសម្រាប់ក្រុមគ្រួសារសាច់ញាតិ។

ទន្ទឹមនឹងនេះ ក្រសួងការបរទេសវៀតណាមបានសហការជាមួយស្ថានទូតឥណ្ឌាប្រចាំទីក្រុងហាណូយ ដើម្បីចាត់ចែងសេវាកម្មដឹកជញ្ជូនតាមជើងហោះហើរពិសេស ក្នុងការបញ្ជូនសាកសពជនរងគ្រោះទាំង ១៥ នាក់ត្រឡប់ទៅមាតុភូមិវិញដោយសុវត្ថិភាព និងឥតគិតថ្លៃ ស្របពេលដែលក្រុមហ៊ុនម្ចាស់ទូកល្បឿនលឿនដែលបង្កហេតុ ក៏បានយល់ព្រមចូលរួមផ្តល់ប្រាក់សំណងបន្ថែមចំនួន ១,០០០ ដុល្លារអាមេរិកក្នុងមួយគ្រួសារដើម្បីជួយសម្រាលបន្ទុកផងដែរ។

ទោះជាយ៉ាងណា កិច្ចប្រឹងប្រែងផ្នែកភស្តុភារការទូតនេះ មិនអាចទប់ទល់នឹងរលកនៃការខឹងសម្បាររបស់អ្នកលេងបណ្តាញសង្គមជុំវិញពិភពលោកបានឡើយ។ មហាជននៅលើប្រព័ន្ធអ៊ីនធឺណិតបានរិះគន់ចំៗថា ទំហំទឹកប្រាក់ ៣,០០០ ដុល្លារ គឺតិចតួចហួសហេតុសម្រាប់គ្រោះថ្នាក់កម្រិតពាណិជ្ជកម្មបែបនេះ។ ក្រុមអ្នករិះគន់បានបង្វែរការចាប់អារម្មណ៍ ដោយជម្រុញឱ្យរដ្ឋាភិបាលវៀតណាម ត្រូវផ្តោតលើការស៊ើបអង្កេតរកខុសត្រូវផ្លូវច្បាប់លើក្រុមហ៊ុនបង្កហេតុ និងរឹតបន្តឹងប្រព័ន្ធសុវត្ថិភាពផ្លូវទឹក (ដូចជា ការត្រួតពិនិត្យអាវកាក់សង្គ្រោះ និងការតាមដានអាកាសធាតុ) ឱ្យបានតឹងរ៉ឹងបំផុតជាជាងការផ្តល់ប្រាក់សំណងដែលមានតម្លៃទាប ដើម្បីការពារកុំឱ្យសោកនាដកម្មដ៏រន្ធត់បែបនេះកើតឡើងសារជាថ្មី។

សោកនាដកម្មលិចទូកនៅកោះត្រល់បានក្លាយជាវិបត្តិការទូត និងទេសចរណ៍ដ៏ធំមួយសម្រាប់ប្រទេសវៀតណាម ក្នុងការស្តារទំនុកចិត្តពីសំណាក់ភ្ញៀវអន្តរជាតិ។ ទោះបីជាមានការវែកញែកខ្វែងគំនិតគ្នាចំពោះទំហំទឹកប្រាក់សំណងនៅលើបណ្តាញសង្គមក៏ដោយ ក៏ការចេញមុខរ៉ាប់រងការដឹកជញ្ជូនសាកសពរបស់វៀតណាម គឺជាជំហានមនុស្សធម៌ដ៏ចាំបាច់មួយ។ ផ្អែកលើព្រឹត្តិការណ៍នេះ វាបានផ្តល់ជាមេរៀន និងបទពិសោធន៍យ៉ាងសំខាន់ដល់បណ្តាប្រទេសក្នុងតំបន់អាស៊ាន រួមទាំងកម្ពុជាផងដែរ ក្នុងការរៀបចំឱ្យមានប្រព័ន្ធស្តង់ដារសុវត្ថិភាពសេវាកម្មផ្លូវទឹក និងការធានារ៉ាប់រងទេសចរណ៍ឱ្យបានច្បាស់លាស់បំផុត ដើម្បីធានាដាច់ខាតនូវសុវត្ថិភាពអាយុជីវិត និងទំនុកចិត្តរបស់ភ្ញៀវទេសចរមកពីគ្រប់ទិសទី៕