ប្រឡូកក្នុងវិស័យសម្តែងអស់រយៈពេលជាង១០ឆ្នាំ តារាសម្តែង ស៊ីន យូប៊ីន បានលើកឡើងថាវិស័យភាពយន្តប្រៀបដូចជាជីវិតមួយទៀតរបស់នាង។ ទន្ទឹមនឹង PNN បិទស្ថានីយស៊ីន យូប៊ីន មិនទាន់មានដំណឹងថានាងនឹងចូលរួមសម្តែងក្នុងខ្សែភាពយន្តណាមួយនៅឡើយទេពេលនេះ។
នៅក្នុងព្រឹត្តិការណ៍នាពេលថ្មីៗនេះតារាសម្តែង ស៊ីន យូប៊ីន បានផ្តល់សម្ភាសន៍ជាមួយនឹង jaikonverse ដែលបង្ហាញពីគោលគំនិតរបស់ខ្លួនទាក់ទងនឹងវិស័យភាពយន្តក្នុងនាមកញ្ញាជាតារាសម្តែងជួរមុខប្រចាំប្រទេសមួយរូប។ ស៊ីន យូប៊ីន បានលើកឡើងថារូបនាងបានធំធាត់ឡើងជាមួយនឹងវិស័យភាពយន្តដូច្នេះវាលើសពីរូបភាពដែលបញ្ចាំងឱ្យទស្សនិកជនបានឃើញ។
កញ្ញា ថាភាពយន្តគឺបានបង្ហាញពីអត្តសញ្ញាណខ្មែររបស់យើងមិនថាភាសា ប្រពៃណី ជីវភាពក្នុងការរស់នៅរបស់ប្រជាជនពីមួយសម័យកាលទៅមួយសម័យកាលទៅកាន់ទស្សនិកជាតិនិងអន្តរជាតិដោយមិនចាំបាច់ប្រកាសប្រាប់ឡើយ។ តារាសម្តែង ស៊ីន យូប៊ីន បន្ថែមទៀតថា សម្រាប់រូបនាងផ្ទាល់ភាពយន្តគឺជាជីវិតរបស់នាងតែម្តងពីព្រោះនាងបានធំធាត់ឡើងជាមួយនឹងវាមកជាង១០ឆ្នាំមកហើយ ពោលភាពយន្តប្រៀបដូចជាជីវិតមួយទៀតរបស់ ស៊ីន យូប៊ីន។
ស្ថិតក្នុងអាជីពជាតារាសម្តែង កញ្ញា ស៊ីន យូប៊ីន បានឆក់ឱកាសសម្តែងជាច្រើនមិនថាតែក្នុងរឿងភាគឬភាពយន្តខ្នាតធំនោះទេ។ ការសម្តែងរបស់តារាស្រីរូបនេះត្រូវបានចងភ្ជាប់ជាមួយនឹង ខាត់ វៃហាំង ដែលទស្សនិកជនភាគច្រើនចាត់ទុកថាជាដៃគូដ៏ស័ក្តិសមបំផុតមួយរបស់អ្នកទាំងពីរ។ 
ជាមួយនឹងការសម្តែងរបស់ខ្លួន និងការរីកចម្រើនក្នុងអាជីព ស៊ីន យូប៊ីន ទទួលបាននូវពានរង្វាន់ក៏ដូចជាឱកាសជាច្រើននៅលើឆាកអន្តរជាតិ។ សកម្មភាពសិល្បៈចុងក្រោយនេះគេក៏បានឃើញ ស៊ីន យូប៊ីន ចូលរួមកម្មវិធីជាបន្តបន្ទាប់នៅឯប្រទេសចិនផងដែរ។
គួរបញ្ជាក់ថា ស៊ីន យូប៊ីន មិនត្រឹមតែពូកែទៅលើការសម្តែងប៉ុណ្ណោះទេប៉ុន្តែនាងក៏មានទេពកោសល្យសិល្បៈផ្សេងទៀតទាំងការចេះច្រៀងនិងរាំទាំងបុរាណនិងសម័យ ព្រមទាំងធ្វើជាគណៈកម្មការក្នុងកម្មវិធីមួយនិងជាអ្នកជំនួញដូចគ្នា៕
