បែកការណ៍សម្ងាត់! អាល្លឺម៉ង់ចំណាយប្រាក់រាប់លានដុល្លារទិញដ្រូនវាយប្រ.ហារ ៥០,០០០គ្រឿងឱ្យអ៊ុយក្រែន

ការបញ្ជាទិញសម្ងាត់ត្រូវបានបែកធ្លាយ៖ រដ្ឋាភិបាលអាល្លឺម៉ង់បញ្ជាទិញដ្រូនវាយប្រ.ហាររហូតដល់ទៅ ៥០,០០០គ្រឿងឱ្យអ៊ុយក្រែន! ខណៈដែលក្រសួងការពារជាតិនៃប្រទេសអាល្លឺម៉ង់ និងអ៊ុយក្រែន ព្យាយាមរក្សាការសម្ងាត់កងទ័ព បែរជាបែកការណ៍រឿងអាល្លឺម៉ង់ចំណាយប្រាក់ចំនួន ៩០លានអឺរ៉ូ (ប្រហែល ១០៣លានដុល្លារអាមេរិក) លើការទិញដ្រូន។ ដ្រូនវាយប្រ.ហារទាំងនេះត្រូវបានបញ្ជូនទៅដល់ដៃកងទ័ពអ៊ុយក្រែនជាបណ្តើរៗហើយ ដើម្បីត្រៀមប្រើប្រាស់ក្នុងសមរភូមិដ្រូនទ្រង់ទ្រាយធំមិនធ្លាប់មាន ប្រឆាំងនឹងកងទ័ពរុស្ស៊ីនៅឆ្នាំ២០២៦។

វាជាដ្រូន FPV (First Person View) ម៉ាក Shrike ដែលផលិតដោយក្រុមហ៊ុន SkyFall របស់ប្រទេសអ៊ុយក្រែនផ្ទាល់ ដែលដ្រូនទាំងនេះបំពាក់ដោយកម្មវិធី Software របស់ក្រុមហ៊ុនបច្ចេកវិទ្យាការពារជាតិអាមេរិក Auterion។ វាអាចស្វែងរក និងវាយប្រហារចំគោលដៅដោយស្វ័យប្រវត្តិ បើទោះជាមានការរំខានពីរលកសញ្ញាក៏ដោយ។

តាមការចុះផ្សាយរបស់សារព័ត៌មានបរទេស គឺការសម្រេចចិត្តរបស់រដ្ឋាភិបាលអាល្លឺម៉ង់ បន្ទាប់ពីមើលឃើញថា កងទ័ពអ៊ុយក្រែនបានប្រើប្រាស់ដ្រូនជាច្រើនប្រភេទក្នុងការធ្វើសង្គ្រាមជាមួយរុស្ស៊ី ដែលអូសបន្លាយអស់រយៈពេលជាង៤ឆ្នាំមកនេះ និងបានវាយប្រហារគោលដៅដោយដ្រូនរាប់ពាន់លើកក្នុងមួយថ្ងៃ ខណៈក្រុមហ៊ុនអ៊ុយក្រែនបានផលិតដ្រូនរាប់លានគ្រឿងក្នុងមួយឆ្នាំៗ។

ប្រធានក្រុមហ៊ុនបច្ចេកវិទ្យាការពារជាតិអាមេរិក Auterion អះអាងថា ប្រាក់ជាច្រើនលានដុល្លារសម្រាប់ទិញដ្រូននេះ គឺរដ្ឋាភិបាលអាល្លឺម៉ង់ទទួលបានពីបណ្តាប្រទេសនៅតំបន់អឺរ៉ុប។ ដ្រូនមួយចំនួនត្រូវបានប្រគល់ឱ្យរដ្ឋាភិបាលអ៊ុយក្រែនរួចហើយ ហើយអាល្លឺម៉ង់គ្រោងនឹងបញ្ចូនឱ្យគ្រប់ចំនួននៅឆ្នាំ២០២៦។

ចំណែកក្រុមហ៊ុនផលិតដ្រូនរបស់អ៊ុយក្រែន SkyFall ថា រដ្ឋាភិបាលអាល្លឺម៉ង់ពិតជាបានចំណាយប្រាក់ទិញដ្រូនឱ្យកងទ័ពអ៊ុយក្រែនមែន ប៉ុន្តែក្រុមហ៊ុនមិនអាចបកស្រាយលម្អិតបានទេ។ ដូចគ្នានេះដែរ ក្រសួងការពារជាតិអាល្លឺម៉ង់ និងក្រសួងការពារជាតិអ៊ុយក្រែន ក៏បានបដិសេធមិនបកស្រាយលម្អិតដែរ ដោយលើកឡើងពីហេតុផលដើម្បីសុវត្ថិភាព។

សូមបញ្ជាក់ថា ដ្រូនម៉ាក Shrike មានតម្លៃសមរម្យ និងត្រូវបានប្រើប្រាស់នៅប្រទេសអ៊ុយក្រែនតាំងពីឆ្នាំ២០២៣ មកម៉្លេះ ហើយវាទទួលបានការចាប់អារម្មណ៍ពីសំណាក់ប្រទេសនានាក្នុងរយៈពេលចុងក្រោយនេះ៕